بسم الله الرحمن الرحيم
السلام عليكم ورحمة الله وبركاته..
اعزائي اعضاء هذا المنتدى الطيب..
لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..
انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)
نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير
ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم
والسموحه على الإطاله
نحن السبب زادوا الرواتب والزيادة خذها الفطيم وربعه
والله يا جماعة انا اؤيد كل واحد فيكم وصار لي نفس الحالة بالظبط
اخوي حجر لكزس في بدايات شهر 10/2007، حتى قبل لا يشوفها في معرض السيارات اللي صار في دبي في نهاية السنة.
المهم ما خلى حد في الوكالة ما تضارب وياهم… وصل للمدير في دبي (ما شي فايدة).. وصل لواحد من عيال راعي الوكالات ( الفطيم) (ما ودي اذكر اسمه) واخر شي قالوله اتريا… و بعد مرور حوالي 8 اشهر تقريبا من الانتظار وصلت السيارة واستلمها ولله الحمد قبل اسبوع
تخيلوا يا جماعة ناس حجزو في شهر3 وصلت سياييرهم و سيارته اللي حاجزنها قبلهم ب 6 اشهر وصلت عقبهم !!!!!
على فكرة خذنا لاند كروزر ونفس الحركة، الحجز شهر 1 والاستلام نهاية 4 … اكتشفت ان السيارة وصلت الميناء في بداية شهر 3، على ذاك الوقت كان سعر السيارة اقل ب 7 الاف درهم …..
شو تفسييير هذا يا جماعة ؟؟؟؟ هذا احتكار محرم في الشرع…. علشان يرفع الطلب والسعر ؟!؟!؟!؟
ويا جماعة اللي يقول خذوا غيرها من سيايير برد عليكم واقولكم … انا انسان عجبتني سيارة و جربتها ليش انغصب على سيارة ثانية ما ودي اياها علشان الوكيل حظرته يبغي يحتكر ويلعب على كيفه ؟؟؟
ليش نحن عايشين في نظام شيوعي والا اشتراكي ؟؟؟ الناس بفلوسها ما تقدر اتسوي شي؟؟؟
يعني انا ودي اشتري تويوتا والا لكزس ما ودي اشتري من الفطيييييم ما ريد خدمتهم التعبانة ؟؟ ونظامهم التعييس ….
في النهاية الحل هو فك الاحتكار
يا اخوان هالشي راجع للجهات المختصة علشان اتسرع دخول المنافسة في الاسواق
لكن للاسف يوم اتشوف منو بيسن هالقوانين وعلاقته بالتجار اتقول على الدنيا السلام…
والسموحة منكم
للأسف ياجماعة الخير اليوم سرت عندهم وعلى نفس الحاله وبنفس الوقت الي رحت فيه حصلت واحد يسلتم نفس السياره بيضه الريال مصري قلتله متى حجزتها قالي 15/3 وبعد بحث وتعميق اكتشفت ان في 6 حاجزين بشهر 3 وسيارتهم وصلت اما عني انا فا قالوا ما نقدر نعطيك وعد ع الشهر الياي يعني انسا ياولد يقولي خذ فلوسك طبعاً الي بسويه باجر من صبح الله خير إن شاء الله بسير حماية المستهلك وبقدم شكوى بالموضوع لأن الموضوع زاد عن حده والأخو الي قالي اني هزبته وان هل شي خارج موضوع البيع والشراء .. ودي تسير عندهم وتشوف معاملتهم كيف مع الزبائن بس ما نقول الا الله يرحم ايام بداية 2001 يوم خذيت عنهم الاستيشن والله يراكض ورايه نفسه هل ريال احينه حطوه مسؤول مبيعات ورافع خشمه وحالته صعبه ورديه وإن شاء الله بنوافيكم بأخر المستجدات ويعطيكم الله العافيه على تفاعلكم الطيب في الموضوع
أفضل وسيلة هي المقاطعة واللجوء للقضاء في حال إخلال الشركة بالاتفاق المبرم ..ولكن الأمر فعلا يحتاج لعملية مراقبة من قبل جهات الاختصاص..وأزيدكم من الشعر بيت تسعى الشركة حاليا لمنح امتياز تمويل السيارات لإحدى الشركات فقط..بمعنى عدم قدرت البعض على تمويل السيارات بواسطة بنوكهم المعتمدة ..فقط من خلال الوسيط ..والثمن هو محل النظر..لاحول ولاقوة إلا بالله…
السلام عليكم انا حجزت لكزس lx570شهر 1732008 يابوليها 283 السالفه وماافيها كل شيء بالواسطه انا يوم سرت روحي قالولي 6اشهر كلمت الوالد 11 يوم ويابوها الوالد سوالي ترتيب وماكانو يحترموني ويوم يتهم عقب الترتيب شووووو احتراام قالولي سيارتك واصلا المينا قتلهم لاتاخرون قال لومافي سياره اتيبها قالو بحماله خاصه منيبلك ايها شفتوا كيف يتغيرون ويزيد الاحترام