بسم الله الرحمن الرحيم
السلام عليكم ورحمة الله وبركاته..
اعزائي اعضاء هذا المنتدى الطيب..
لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..
انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)
نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير
ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم
والسموحه على الإطاله
والله العظيم ربيعي يرشي واحد فالشو روم فوكالة الفطيم وياخذ سيارات يديده ويبيعهن برع بفايده كبيره انا استغربت من الموضوع بس والله حرام
الراشي والمرتشي فالنار استغفر الله
يا اخواني انتم جنيتم على انفسكم …
يعني شي تدفع فيه بيزات وبعد تتريا وتنذل ليش …؟؟؟؟؟؟
والله اني عندي استيشن 2002 وناوي اني ابيعه وكنت افكر اني آخ الاستيشن اليديد جي اكس ار 8 سلندر بس على شو … مواصفاتها ما تيي ربع مواصفات السيارات الثانيه … وسعر غالي .. وعيوب مصنعية .. ووكيل يذلك … زين ليش ؟؟؟؟… والبديل تارس الدنيا مننيسا وانفنتي وجمس وشفرلت …..وبمواصفات دبل دبل الاستيشن وبسعر اقل …
(لكني اذا قررت اني آخذ تويوتا او لكزس فما باخذ لا من بهوان بلا مذلة وبلا واسطة ….)
الحمد لله البديل موجود … ليش مطيحيين على التويوتا .. شو فيه …. كل شي تحافظ عليه بيدوم … ميزتها الوحيده ان سعره يثبت بعد البيع … لكن لا تنسى انك اشتريته بغالي يعني الفرقية في النهاية بينه وبين السيارات الثانية شي بسيط
يعني نتكلم عن الوكيل … ولا عن شركة التيوتا الي قامت تستهين بعقول الناس … ياخي بالعقل الكورولا (الشكل اليديد) سيارة موديلها 2008 … تشوف منها تكاسي موديل 98 !!!!!!
ولا الاستشين دقة شوي ينخفس …. يعني بالعربي التويوتا ووكيلها يلعب علينا ونحن نساعده
يا جماعه الخير البديل موجود يس قووا قلبكم وما عليكم من التاريخ ….. الي بينمسح في يوم من الايام
عندي مداخله واتمنى انكم ما تاخذونها ( بحساسيه )
لو كان راعي الحلال ( الفطيم ) يشوف حلاله روحه او ع الاقل يجيك
ع الاداره اللي اتجابل حلاله ما كان كل ها استوا..
وفي الأخر ما اقول غير ( راجع ادارتك يا راعي الحلال لانه دعوه
المظلوم ليس بينها وبين الله حجاب )
والسموحه ع المداخله..
والله يعينك يا راعي الموضوع ويوفقك..
هذا مش حل … بي غيره والتاريخ بيعييد نفسه….
الحل عند جهات الاختصاص، يحطون قوانين تمنع احتكار الوكالات…. يعني فتح السوق للمنافسة بدال ما يكون وكييل واحد، ما بنقول 1000 (مثل امريكا اللي راعي السوبرماركت يصير عنده وكالة بعد) بنقول 10
اما الصيانة ممكن اتكون محتكرة اكثر نظرا لطبيعتها (الغش فيها وارد)
اخوي
كثرة الدق يفج اللحام
وانا اشوف انه المشاكل زادت على الفطيم
من صوب الوكاله ومن الورشه
عيل ابشر بسعدك و الفطيم بيقول (( باي باي يا تيوتا!!)) لانه اذا ما عدل اوضاعه الوكاله بتنسحب عنه والعبره في الاخرين
(( الفورد و الشيفر))