بسم الله الرحمن الرحيم
السلام عليكم ورحمة الله وبركاته..

اعزائي اعضاء هذا المنتدى الطيب..

لو سمحتوا يامراقبين الموقع لاتحذفون موضوعي لأني احس اني انسان مظلوم والشكوى لغير الله مذله..ولو تشوفون في موضوعي اي غلط احذفوا الموضوع وانا مب زعلان..

انا واحد من الي انقص عليهم وحجزوا الـ FJ طبعاً هدفي من إنشاء هذا الموضوع اني احصي الحالات الي صار معاها هل شي..
اول شي انا حاجز سيارة FJ اللون ابيض من تاريخ 8/3/2008 في بوظبي والبايع الي حجزت عنده قالي نحن نعطيك فتره طويله ونقولك 3 اشهر لين ماتوصل السياره لين هني وانا صدقته وقالي انها مابتاخذ اكثر عن شهرين وان كثرت كثير شهرين بالضبط المهم بنقول انهم عادلين بالموضوع ولكن للأسف بعد بحث وتعميق وحفر الخ الخ..اول شي قبل ما اقول اي شي بالبركه على اخوي وربيعي وولد عمي وربيع ولد عمي الي حجزوا بعدي السياره بشهر وحصلوها بفترة شهر ونص تقريباً ويعطيهم خيرها ويكفيهم شرها يارب..اخوي ياجماعة الخير فاجأني بإتصاله يقولي حمدان سيارتي وصلت وبروح استلمها قلتلها كيف ياخوي اكيد انا معاك وصلت بس نسوا يتصلوا بي وبالفعل رحت ويا بو نهيان واستلم سيارته وانا تفاجئت يوم اسأل عن حجزي يقولولي والله انته في قائمة الإنتظار وما ندري متى سيارتك توصل شهر شهرين المهم..
الشباب حجزوا سياراتهم وبنفس اللون بس لون واحد يختلف وهو اللون الرصاصي اما الباقي ابيض..
سرت عند المدير الي موجود في الفرع وماراح اذكر اسم الريال الي حجزت عنده والمدير عشان ماتقولون ممنوع وتشويه لسمعتهم بس انا ريال مظلوم دخلت عند الريال مدير المبيعات قبل شهر بالضبط طبعاً اسلوب المدير يدل على انه انسان غير لبق في الكلام مشيناها له هل مره واتعوذنا من ابليس قالي قبل نهاية 5 تعال عندي وفالك طيب..سرت عند الريال اليوم والله ياجماعة الخير و الله على ما اقول شهيد اني من دخلت عنده حتى السلام يرده بدون نفس يمأ يمأ براسه (فقط) ياخوي انا حاجز السياره الفلانيه .. بكل برود اعصاب والله ماعندنا سيارات ومافي اخبار عن استوك ياي لبعد 15 – 30 يوم يعني انتظر لين شهر7 – 8 البائع يقولي ان في دفعه بتوصل في بداية شهر 6 تناقض في الكلام المهم طرشني عند البايع والبايع ردني عليه وقلتله البايع ردني عليك وعطني حل دوختوني انا بشتري ببيزاتي ليه انذل يقولي وش اسويلك يعني انا مالي خص في الحجز ولا اتدخل في المواضيع هذي وروح خذ فلوسك ماشي سياير وبرايك منك للبايع عاد لو شفتوا الأسلوب الي يكلمني به تقول الريال يوزع سيارات من عنده ولا من ماله المهم خذتني الحميه وهزبته هزاب وغسلت شراعه وعلمته الأدب وللأسف يا اخواني في هذا الملتقى الطيب انا ما افتخر اني ارد عليه بهل اسلوب لأننا تعودنا نرد الإساءه بإحسان بس في ناس ماينفع معاها الا الصوت العالي والزعيق بس خذتني الحميه اكثر يوم شفته يعامل واحد من الشباب الي يالسين عنده بهل اسلوب يعني يقوله الريال قدامي اخوي ماخذ لكزس ومعطينه معاها شي المهم من اجزاء الحديد .. وانا ماعطيتوني مثله ليش رد عليه وقاله بنييبلك 2 طن حديد تخيلوا الرد الوقح وازيدكم من الشعر بيت بعد بحث للأسف على قولتهم ناس حاجزين من شهر 2 وللحين ماوصلت السياره ياجماعة الخير انا ابى اعرف هل هي لعبه من الوكيل نفسه بإحتفاظه بالسيارات لبيعها فيما بعد لرفع قيمة السياره اما شو السبب يعني لو قلنا لكزس استيشن بتلقونها متوفره بس يبالها *واو* وامورك مسلكه وماشيه
متى ببيي اليوم الي بينتهي فيه الإحتكار من قبل وكلاء السيارات ونلقى مليون الف وكيل للسيارات
ياجماعة للتنويه فقط السيارات الي خذوها الشباب ما كان حاجزنها حد وماخذها والدفعه الي يت فيها سيارة اخوي كنت انا فيها بس سيارتي (تفبركت)

نقطه نسيت اوضحها وحبيت اضيفها عن طريق التعديل يوم سألتهم عن سبب وصول سيارات الشباب قبلي قالولي والله يمكن حد حاجز السياره وماخذها والمشكله كل واحد منهم يسألهم قبل ما استلم السياره هل كان في حد حاجزنها ورفض ياخذها يقولولهم لا ونفس الشي يوم واجهت البايع والله سيارة ولد عمك وصلت في الدفعه من الباخره طبعاً هم حاجزين عند ريال غير عن الي حاجز عنده ماعطوني سبب ولا حاولوا يقنعوني حتى او يعطوني تبرير

ياجماعة الخير هذي دعوه مني لكل من تعرض لمثل موقفي اننا نقوم بشكوى جماعيه بإتصالنا بحماية المستهلك او وزارة الإقتصاد يوم الأحد لنقوم بتقديم شكوانا للجهه المعنيه بالأمر وإن شاء الله يتخذون الإجراءات المناسبه ضدهم

والسموحه على الإطاله

52 thoughts on “الفطيم وسياسة حجز السيارات

  1. مرحبا اخوي

    يعطيك العافيه على هل موضوع

    انا بصراحه قبل شهرين تقريبا رحت الفطيم وسالت عن اف جي وقالولي تحجز الحين وتسليم من 5 الي 6 شهور

    طبعا هذه مده طويله

    رحت عند النعيمي موجود عندنا ف عيمان وحصلت عنده وبنفس السعر وخذيته من عندهم
    خلال 3 ايام السياره كانت وياي وبلا عوار راس

  2. الصراحه يا اخوان كان لي خاطر بان اشتري اف جي بس بعد ما قرات عن وكاله الفطيم وطرق الاستغلال والمعامله الرديئه واالواسطات ، بكل الصدق وامانه اقول اني ذهبت الي وكاله جمعه الماجد لاشتري سياره لي وللوالد من فلوسي بدون اي طرق الاستغلال والمعامله الرديئه واالواسطات
    والحمد الله اني قرات موضوعكم قبل ما اشتري سياره من (وكاله الفطيم)

  3. بعد كل الكلام اللي قلتوه

    اذا حد يعرف شركة أو وسيط يبيع سيارات التيوتا

    عن طريق البريمي وعندهم مكتب في بوظبي

    الرجاء ارسال رقم تليفونهم على الخاص

    بنشتري منهم ولا ذل الفطيم

  4. ياجماعة الخير انا اشكركم على تفاعلكم في الموضوع

    شي قوانين كثييييييييييييييره لصالح المستهلكين بس للأسف مخفيه عن اعيوننا ومانعرفها الا بالبحث

    اذكر قبل 3 اشهر كانوا يتكلمون في قناة ابوظبي عن وكلات السيارات وتكلموا عن العديد من المشاكل الي تواجه الناس يوم يشترون سياره
    يرحبون فيهم بصدر رحب ويوم يواجهون اعطال ماحد يدزلهم ويه

    طبعاً القانون رقم 24 على ما اعتقد من صحة الرقم

    يفيد بأن المستهلك اذا واجه عيب مصنعي في سياره ماخذنها يقدر يسوي التالي
    *يستبدلها بسياره اخرى
    *يسترجع فلوسه
    *تصليح السياره مع اعطاء سياره مؤقته حتى الانتهاء من تصليح العطل

    طبعاً انا صارت لي مشكله ورحت حماية المستهلك .. كان عندي اوريون لأخوي الصغير وفيها عيب بالقير ورحت عندهم وخبرتهم السالفه وصبغتها طايره من صوب الدبه .. بس قالولي لو تبى بنبدلك القير والأمور هذي فالك طيب الغلط الي سويته المفروض السياره قبل ماتمشي 1000 كيلو اوديها الوكاله واعقها عندهم وارفض استلامها بس غابت هل نقطه عن بالي
    اما عن حماية المستهلك كلمة الحق تنقال الدكتور الهاشمي الي عندهم والنعم فيه بس المشكله انه ماعندهم سلطه تنفيذيه تجبر الوكيل على إستبدال السياره او عمل شيئ قانوني تجاهه و في حالة عدم المقدره على التوافق بين شخصين يحال الموضوع للمحاكم..وطبعاً من بيقدر على محامين وكلاء السيارات وعوار الراس والواحد يشتري راحة باله ابرك .. بس مايكون ساكت عن الغش الي صاير من صوب الوكالات ولي تعقيب قريب إن شاء الله على مشاركاتكم

Comments are closed.