السلام عليكم

اشحالكم ؟؟؟

موقف صار معي اليوم وانا راد من الدوام(فلم اكشن)
الساعة وحدة تقريبا اليوم الظهر كنت بروح فيها ,,,,,,,اتخيلوا معي,,,,,,,,

أخذت طريق دبي العابر وانا ياي من صوب دبي الى الشارقة…..ونزلت المخرج(عاليمين) الي هو منحى الي
اتدخلك طريق الذيد تقريبا عدال مصنع الاسمنت.فنص المنحنى كانت في شاحنة تمشي بسرعة 100 تقريبا وانا كنت على يمينه بس ورا عند التواير الخلفية واسايره.

تفاجأت ان كمية كبيرة من المياه متجمعة فالمنحنى فالشارع يمكن العمال شغالين اهناك وعلى الشارعين,,تفاجأت بصوت ابريك من الشاحنة لانها شاحت وانا نسيت الشارع واطالع الفيلم الي قاعد يصير على يميني ..وفجأة راس الشاحنة خذت يمين ويو تيرن وضربت الحواجز الي اهناك وصوت الضربة رهيبة واجوف ذيل الشاحنة ياية صوبي على السيد اليسار وتبا تضربني من جنب ,,بس والله ما ادري كيف الله سلمني ودست عالريس كامل وشردت عن ذيل الشاحنة( اتخيل ذيل الشاحنة واقفه بالعرض في شارع يتكون من مسارين) بس فيه مواتر كانت وراي بصراحة مادري شو صار لهم وانا ما فكرت اني اوقف ..,,,وتميت اذكر الله طول الدرب وأحمده لأنه سلمني من شر الشاحنات…..
…
ديروا بالكم على ارواحكم فالشوارع واتوقعوا أخطاء الاخرين

والسموحة منكم عالاطاله

9 thoughts on “الله سلمني من هالشاحنة,,”

  2. الحمدلله الي سلمك ياخوي !!

    انا من قريب كنت ماشيه و حذالي شاحنتين ماشيين ورى بعض
    يت الثانية بتتجاوز الي جدامها و لفت علي ..

    من الخوف كسرت السكان مرة وحده ع اليسار
    ورديت يمين و فقدت السيطرة وتميت السيارة تروح يمين و يسار 6 مرات
    والحمدلله ربي سلمني والشارع كان فاضي ..

    بعدين ابوي قاللي انه الشاحنات مب دوم تبين عندهم السيارات من المنظرة الجانبية
    من يوووووووووومهاااااااااا اتجنبهم او اخطف حذالهم بسرعة ..

    ربي يحفظ الجميع ديرو بالكم و تجنبوهم ..

  3. تستاهل السلامه …

    الله يعينّا من الشحنات وبلاويها …

    مواترنا اتكسّرت عالخط والسبب الشاحنات …

    تطاير الحصا والرمل والكنكري والاسمنت ….

    صبغة الموتر اتقشّرت والسبب الشاحنات حسبي الله عليهم

    من غير اكثر الحوادث هم سببها … وخاصه يوم يطلعون على اليوووتيرن

Comments are closed.