السلام عليكم ورحمة الله وبركاته

اخواني حبيت استثير موضوع مب صغير حصلي من فترة قصيره ….

الحاصل اني من 1/9/2005 اشتريت سياره لكزس صالون ال اس 400 وارد امريكا وكنت قد عارضنها للبيع في المنتدى والحاصل من التاريخ الي ذكرته اني يوم اشتريت السياره فحصتها في ادنوك وقالوا لي السياره سليمه للسير واشتريت السياره على ضمان الفحص وجددتها فالسنه الي بعدها وقالوا لي ما فيها اي شي والسنه الثالثه يوم حبيت ابيع السياره واشتراها واحد من الربع وعطاني عربون وراح فحص ادنوك فالعين قالوا له السياره فيها لحام فالشاصي وانا بنفسي بعد الي صار شليت السياره ورحة للفحص وشافت اللجنة الفنيه فالفحص السياره وقالوا لي السياره ملحومه من زمااااااااااان بس اللحام جيد والمهم السياره مانقدر نمشيها لك الا في حال وديتها الوكالة هات لنا تقرير من الوكالة ان السياره صالحه للسير .
انا رحت وكالة بهوان فالبريمي وقالوا لي مانقدر نعطيك تقرير الا اذا صلحت الشاصي عندنا وبنعطيك تقرير قرنتي للسياره انها صالحه للسير , بس الجماعه طالبين للتصليح 6000 درهم وهذا مب شوي المهم والله هالسياره كنت شاريها بـ 68 الف درهم وبعتها لواحد بـ 30 الف درهم يعني والله هالفحص لادنوك وايد ضروني بهالقرار مالهم .

الله يسامح الي كان السبب

والحين اخواني كل واحد يبديلي رأيه فالموضوع

وانا انصح اي واحد يريد يشتري سياره مستعمله انه مايطيح فالغلط الي طحت فيه ويجب ان يفحصها فالوكالة احسن عشان يحصل ضمان ع الفحص والسموحه اذا طولت عليكم

27 thoughts on “الله يسامح الي كان السبب؟؟”

  1. السلام عليكم

    اخوي ييب السيارة دبي عيمان الشارجه اي مكان غير بوظبي و العين و افحصها في ادنووووك يعطووونك اووووكي انا عندي لكزس موديل 2002 شريتها من واحد بـ 20.000 درهم ملكيتها منتهيه ثلاث سنين و شاصيها مضروب من الجنبين و الريال اللي اشتريتها منه من بوظبي و يبتها عشان اخذ سامانها و اركبه على نفس الموديل سيارة الوالد و عقب قلت بروح افحصها دبي والله فحصتها و عطوووني اوكي كل شي اوكي و سجلت السياره و لين يومك السيارة عني من سنه 2006 و الحمدلله تمشي اوكي

    انت تعال افحصها دبي و توكل على الله و ان شالله ربنا يعوضك

    و موفق ان شالله

  2. سير كراج التوائم في مصفح عند واحد اسمه احمد مصري او يوسف تركي بيسوونلك التقرير و تقريرهم معتمد من المرور و عقب ها سير المرور و خلهم يفحصون السياره و راويهم التقرير بينجحونها طبعا بيتم عندهم في السيستم انها فيها شاصي و مصلحه و مشت عندهم ساعتها لو اي حد فحصها بيمشونها بس يفضل يوم تبيع الموتر تخبر الي بيشتريه انه فيها العيب ترا دعوة المظلوم ب 100 الف درهم مب ب 30 الف و حياك

  5. كأني سمعت مشكلتك في الراديو !! ولا إنته واحد ثاني ؟؟

    اخوي بنسبة لسيارات الوارد أو بالمجمل لا تفصح السياره عند شرااااائك في أدنوك

    فحصهم مب شيء بتاتا

    ودي السياره صوب المعارض لو كنت في بوظبي أو أي مكان بتحصل يمب المعارض مكان تشييك السيارات وشوف كيف يشيك لك على السياره من مكانيكي إلى كمبيوتر إلى كل حاجة .

    يعني أدنوك تنفع لترخيص ليس إلا ، أما تشتري سياره عن طريق فحص أدنوك أبد ما أنصح الجميع

    والله يوفق الجميع إن شاء الله والله يعينك

    دمت بود

    هيه اخوي انا هذا الي سمعت شكوتي فالراديوا وان شاء الله بداية الاسبوع الجاي موعدي وياهم على الهواء مباشره وبتسمعون شكوتي عليهم والله بياخذ حقي منهم

Comments are closed.