صباح الخير شباب
الحمدلله توفقت و شريت نيسان تيتان موديل 2006 نظيف بس عندي بعض الاستفسارات و المشاكل اريد المساعدة من اصحاب الخبرة و حلول من الفنيين….
اولا : صرفية بترول السيارة.. بالمقارنة مع غلاء سعر البترول و انا استعمل السيارة بشكل يومي و لكل مشاويري الاحظ انه الصرفية كبيرة بالمقارنة ان التانكي فل 135 درهم لكن بالخط الموتر ما يصرف.. داخل المدينة صرفية رهيبه هل ممكن من جب او كمبيوتر يساعد على تقليل الصرفية…
ثانيا: كان عندي صوت مزعج بالكزوز ما اعرف هل هو صوت الموتر طبيعي ام و لكن غيرت الكزوز و خف الصوت 60% لكن بعد 4 ايام رجع نفس الصوت و هو عبارة عن صدى و كان الكزوز كاتم لما يكون ال ار بيام على 1 و نص لكن من يعدي او يقل ال ار بي ام يروح الصوت و يخف وايد… يعني الموتر لما يكون مكسل و انا اسوق بريس خفيف يطلع صوت مزعج يجبرني اسرع عسب يروح الصوت.
ثالثا: شو هي التزاويد اللي ممكن اضيفها على الموتر و ما تسبب مخالفة قانون سير المركبات.. لانه وايدين يبون يداعسون معاي و انا مالي في هالسوالف و لكن الموتر يخرش هب ريح ما شاء الله بسرعه ينزل الكيج…. سمعت انه الهدرز و فلتر الهوا يزيد ما مقداره 12 حصان من قوة السيارة….
رابعا: سمعت ان الكثير يشتكي من المينيفول للسيارة لانه المشكلة نفسها موجودة بالارمادا فشو هو المينيفول و شو دوره و شو المشاكل اللي ممكن يسببها في حالة اهمال تصليحه و كيف اعرف انه عطلان عسب ما يقصون علي البنغالية…
خامسا: وين احسن كاراج بمصفح او بالشارجه للنيسان و خصوصا الارمادا و التيتان….
سادسا: مشكورين على المرور و بانتظار ردودكم……
جيّك الرد على الخاااااااااااااااااص ..
شيخي عاليين المقامي كفيت و وفيت ما قصرت الغالي ريحتني من من صدعة الراس….
بس شيخي وين ممكن احصل حد عنده البرمجه مالت التيتان و الخاصة بصرفية البترول و شو اقوله بالضبط عن نوع البرمجة….
و بخصوص الصوت يعني لو بدلت المينيفول بيتغر للاحسن و بيروح الصوت…. وشو اسباب الشرخ…
و بخصوص دبة الكزوز والله توني مبدلنها بوحده جديدة من الوكالة ب 800 درهم يعني تسوى و بيروح الصوت لو بدلتها بالامريكية…
بس الغالي ما قلتي لي ما اتعرف حد متخصص بالتيتان
و مشكور على نصايحك فادتني وايد….
شـكــ وبارك الله فيك ـــرا لك … لك مني أجمل تحية .
مرحبا وسهلا يا بو شيخة
بخصووص صرفية البترول .. انصحك اتبرمج الكمبيوتر ماله ودام انه الموتر امريكي وايدين يبرمجون الكمبيوتر الامريكي وبأسعار حلوة .. مب شرات الفتك لو اتبرمج كمبيوتره ما اتحصل حد يبرمج غير خرباش وضارب علينا ضربة في البرمجة ..
المهم بخصووص صوت الاكزوز ..
فعلاً وايدين يشتكون من المنفوول .. واحد من ربعي عنده ارمادا والمنفول فيه شرخ .
وواحد من ربعي عنده الانفنتي اللي تشبه الارمادا موديل 2008 وبعد المنفوول فيه شرخ ..
نصيحتي لك ركب منفوول امريكي (( سيراميك )) منفول جاهز للارمادا والتيتان والانفنتي Q65
المنفول تقدر تطلبه عن طريق الانتر نت .. وبتحصله موجود عند كراج بروجكت اكس اللي في بوظبي (( مصفح ))
وسعره 3400 درهم تقريباً .. وحاول اتنقص في السعر ..
وبخصووص الصوووت اللي يطلع عندك من الاكزوز يوم يكون الار بي ام على 2 او اوحد ونص هذا تقريباً صوت الدبة مال الاكزووز يمكن الفلتر مال الدبة منتهى .. حاول تشتري دبة امريكية من الانواع الاصلية
. ان شاء الله اكون افدتك .. والسموحه على الاطالة ..