السلام عليكم ورحمة الله وبركاته
اخواني اسمحولي اليوم افتح موضوع قد تكرر عدة مرات
ولكن هذه المره غير
لاني كملت حلقات المسلسل المفقوده من المواضيع السابقه
ما بطول عليكم انا خليت المسلسل فيلم قصير والذي اطلقت عليه اسم
(( النصابين وبطاقات اتصالات المفقوده ))
احداثه كلها صارت يوم الثلاثاء 27/4/2010 ما بين الساعة 4 م الي 5 م
يعني ساعه فقط
باختصار شديد اليكم ملخص الفيلم
(( اتصل بي احد الاسئويين طبعا هو يتكلم الانجليزيه الهنديه او الباكستانيه المكسره
ترى مب اول مره يتصلون بس يوم اتكلم معاهم انجليزي عدل يسكروا في ويهي
المهم قالي معاك المركز الرئيسي لاتصالات مبروك ربحت 500.000 درهم يعني نص مليون درهم
انا سويت عمري ما اعرف انجليزي واايد وقمت اكسر وبينت له اني ما فهمت
رد لي الكلام مره ثانيه طبعا انا قمت اصيح من الفرحه ومب مصدق ههههههههه
قالي بس نباك تتاكد من الشريحه مالتك اذا عليها ها الرقم 88771120 اعتقد هالرقم ما اذكره
قال لي اذا هالرقم على الشريحة رد واتصل فينا قلت له اوكيه
سكرت من عنده واتصلت بعمليات شرطة ابوظبي خبرته عن الموضوع قال لي روح المركز وافتح بلاغ ما ناخذ بلاغ بالتلفون
فقلت له اخي العزيز انا بعده ما نصبوا علي وانا مواطن ورقمي اللي اكلمك منه باسمي ومكالمتي مسجله يعني اتروموون اتيبووني من بيتنا او من اي مكان لاني بياناتي كلها عندكم
فال لي بس الاجراءات جيه
قلت له اخوي هل فيه خط مباشر للبلاغات اللي من هالنوع لانها اتضر بالمواطنين بالدرجة الاولى
سار وسال المسؤول ماله ورد وقال لي لا والله للاسف ماشي خط مباشر
قلت مشكور وما قصرت
انا ما ادري شو ياني واتضايجت وقلت لازم اكمل وياهم واعرف كيف ينصبون ع العالم لانه دوم اسمع عن هالشي بس ما اعرف كيف
رديت واتصلت من رقم ثاني بطاقه مدفوعه لانه الرقم اللي اتصل عليه قبل كان خط
قلت له انا صاحب الرقم اللي كلمتني عليه من شوي بس خلص الرصيد
قال لي اتاكدت من الرقم اللي وراء الشريحه قلت له هيه وطلع نفسه
طبعا الغبي ما فرق بين الخط والمدفوعه وهنيه عرفت انه نصاب
المهم من قلت له هالكلام قال لي مبروووووووووك انت فائز ب 500.000 درهم طبعا رديت انا اصارخ وازااعج الحمدلله الحمدلله
عقب قلت له متى استلم المبلغ ؟
سالني شو اسمك قلت له اسم غير اكيد مب اسمي قالي صبر يالس يتاكد من الاسم قالي صحيح الحينه عطني رقم الجواز ,,,طبعا عطيته اي رقم فالي صبر خلني اتاكد من سيستم الجوازات وحطني ع الانتظار بعد 5 ثواني رد عليه وقالي معلوماتك صحيحه سجل عندك رقم الحواله اللي تقدر تستلمها من الامارات للصرافه
سجلت رقم الشيك وانا فرحاااااااان طبعا خخخخخخخ
عقب قلت له اقدر اسير الحينه استلمها قالي اكيد بس السستم مب طائع يسوي (( ريليس للشيك )) يعني مب طائع يصدر الشيك قلت ليش قالي صبر شوي خلني اتاكد
عقب رد عليه وقالي السستم يطلب منك ادخال ثلاث ارقام بطاقة رصيد قيمة كل وحده 500 درهم قلته له ما عندي الحينه بسير اسحب وبتصل بك قال لي لاااا لا تسكر لو سكرت الخط السستم بيلغي معاملتك — فلت له والحل قال خلك معاي لين تشتري وعطني الارقام ……………))
اعتقد اللي يهمنا هو لين هنيه وبس
الحينه الاسئله اللي تمت فخاطري ومب ملاقي لها جواب وهي
1- ليش الشرطه ما تتعاون مع المواطن في القبض على هالنصابين ؟؟!!!
2- ليش الشرطه تباني افتح بلاغ والمعروف انه البلاغ ما ينفتح الا اذا انت متضرر وانا للحينه مب متضرر ولا حد نصب عليه بس بغيتهم ياخذون الرقم ويراقبونه او يقطعونه ؟؟
3- معقوله طول هالفتره والنصابين بعدهم شغالين وكل يوم نقراء في الجريده انهم قبضوا عليهم ؟؟
4– اليس بامكان الشرطه بالتعاون مع اتصالات تحديد موقع الرقم المتصل والقبض عليهم قبل لا ينصبون على حد ؟؟
السوال الرابع يرني لسؤال كبير وهو
هل اتصالات بعدم تعاونها مع الشرطه في تحديد المكان او في اصدار بطاقات لناس مغادرين البلاد او متوفين او او او بتكون المستفيد من شراء تلك البطاقات فئة ال 500 درهم !!!!!!!!!!!!!!؟؟؟؟؟؟؟؟؟؟؟
تساؤلات ياريت تشاركوني في الجواب عليها
وسامحوني ع الاطاله ولكن والله لم اكتب هذا الموضوع الا من دافع حبي للوطن والمواطنين وعلشان ما نتم محل للنصب وانظار النصابين من خارج دولتنا الحبيبه
وهذا الرقم اللي اتصل فيه 0566717547
يا اخي الكريم صاحب الموضوع اذا انته فعلا تبا مصلحة المجتمع وخايف علينا من النصابين ليش مارحت المركز وقدمت
بلاغ بخمس دقائق ولا بس ادورون الحلول السهله والكتابه في المنتديات مع احترامي لك يعني …… يا اخي اذا انته خايف
علينا وعلى المجتمع من هذه العصابه روح المركز وقدم بلاغ وكان الهل غفورا رحيما ….
اخويه اذا احنا صح فاهمين ونعرف بالسالفه بس الشواب وغيرهم في ناس بعدها ما تعرف وماتفهم
وينقص عليهم ..
يعني السالفه من الفون وراعيتها الاتصالات يعني بالعقل تبانا نشتكي على شركة المياه والكهرباء .؟ اكيد اتصالات هي اللي تقدر تسوي شي مع الشرطه فلا تلوم حد لو رمس عنها
ياااااااااااااااااا جمااااااعة صلوا ع النبي .. ما يسوى عليكم هالجدااال كله .. اللي عنده معلومة حلوة يقولها .. واللي عنده رااي مفيد يطرحه .. هدوا اللعب اشوي .. تراكم لخبطوووووووونا ^^ ..
بالأخير لازم نكون حذرين من هالنصابين والأفضل ما نعطي أي حد ويه .. وشوفوا قانون الدولة شوو يقول واتبعوه أحسن ..
اولا انا ما قلت كلمة متواطئه مع المحتالين على قولتك !!!!!!!!!!!!!
ثاني شي وهو المهم بالنسبة لي
اني ما فتحت الموضوع الا من دافع وطنيتي وخوفي على اخواني المواطنين من هالنصابين والله على ما اقول شهيد
وترى دفاعك عن اتصالات لهالدرجه يبين انك موظف فيها وخائف على شركتك قبل لا تخاف على مصلحة اخوانك
مع إني ما كنت أعنيك بالسالفه،
و بصراحه مب متفيق أشرح لكل شخص شو يعني أجهزة الدوله. بس الملاحظه الوحيده اللي أقدر أضيفها، إن في أكثر من جهاز في الدوله هدفه المعلن و الصحيح ربحي.
ما علينا،
برد عليك دامك تعتبر ردي السابق لك.
إنته قلت إن الإتصالات متواطئه مع المحتالين يوم ما تتعاون مع أجهزة الدوله.
ممكن تييبلي مثال واحد قامت فيه أجهزة الدوله التي تحمي الوطن و المواطن و ردت عليهم الإتصالات إنها ما بتسوي شي ؟
ولا هو كلام و خرط عـ الجماعه بس.