معلوم لدى جميع المحلات أنها تقدم ضمان على البضائع. هذا الضمان يكون بمثابة تعهد من البائع بأن البضاعه قابله للرد أو الإستبدال خلال فتره معينه. ولكي يكون الضمان ساريا، لابد من وجود فاتورة الشراء.
مقدمه حلوه، صح. أسميني تفلسفت لين ما قلت بس.
المهم،
سرت من سنه تقريبا كارفور و إشتريت دفايه (شيبتكم المتعني كان ميت من البرد). حسب كلام البياع في كارفور، الدفايه مضمونه لمدة سنه، كل اللي علي، إني أبرزلهم الفاتوره إذا إختربت، و هم بيقومون باللازم.
اللي صار إن الدفايه إختربت عقب شهرين تقريبا من تاريخ الشراء. فتوقعوا شو شفت يوم طلعت الفاتوره؟ لقيتها خاااااااليه. مافيها ولا حرف !!!!
طار عقليه، قلت مب معقوله، يمكن أنا صبيت شي على الفاتوره، وهالشي سبب إن الحبر خاز عن الفاتوره. ففي هالحاله، أيقنت إنهم ما بيردون الدفايه، فسكت عن السالفه.
وقتها، قلت لنفسي، ليش ما أيمع فواتير المشتريات العاديه و أشوف شو بيصير لها عقب مده. تخيلوا، لقيت إن الحبر يبدأ يختفي عقب ثالث يوم. و يستمر في هالحاله لين ما يتلاشى. يعني الشباب نصابين، يحطولك حبر ما يتم في الفاتوره عشان ما تطالبهم بالضمان. بصراحه أنا ما أعرف سبب الإختفاء، هل هو من الحبر أو من الورقه.
ومن هاك اليوم، كل ما أشتري بضاعه مضمونه، أجلد الفاتوره، عشان ما أعطيهم الفرصه لإستغلالي.
نصيحه يا جماعة الخير. جلدوا فواتير البضايع المضمونه من كارفور، عشان ما يضيع حقكم. لأن الجماعه ذمتهم واسعه الظاهر.
غريبه
مشكور على الموضوع
حسبي الله عليهم
انا عيل خلاص بجيك فواتيري >>> عاد هذا اذا لقيتهم
شكر اخوي على التنبيه وخلاص بنسوي مثل ما قالوا الاخوان
بنخليهم يكتبون لنا فاتورة بخط اليد
الصراااااااااااحه هاذيل مجرمين
وعيل تصدقون كنت اريد اشتري من عندهم نفس الكرفان وعليه ضمان 15 سنة؟؟؟
الله المستعان
تحياتي
اختكم
سهمي عالي
هذا نصب على كبير
الله يعيين مشكور خوي على التحذير