السلام عليكم ورحمة الله وبركاته،،
يقووولكم يا جماعة الصحه تاج عى رؤوس الاصحاء ،، والي احين صاير في قطاع الصحه سواء الحكومي او الخاص والله انه يفقع المرارة ويقصر العمر 
الواحد يدخل العيادة او المستشفى عنده زكام او احتقان في اللوز،،بيطلع عنده القولووون والمرارة وارتفاع في ضغط الدم من الروتين الي صاير عندهم 
يعني معقولة اقعد 40 دقيقة في الاستقبال بس عشان يطلعون الملف ،، والله هذا الي صار معاي يوم الاحد في عيادة (…….) في بوظبي ،، دخلت الساعه 11 الضحى وعطيتهم البطاقة قعدت انتظر وانتظر وانتظر والوقت يمر وانا كأني ابو الهول
،، ومالي بااااااااااارض اسير أسأل لاني عارف شو بتكون الاجابة ،، وبعد مرور 40 دقيقة نادو اسمي ،،رحت الاستقبال قلت جاء الفرج،، طلع مناديني عشان اوقع ورقة ثقة!!!
يعني بتستمر رحلة الانتظار مره ثانية قلت لا حول ولا قوة الا بالله ،، وقعدت انتظر ،، بعدين نادوووني بعد ربع ساعه ثانية ،، يعني تقريبا مر علي ساعة وعشر قايق لين ما ادخل عند الدكتور ،، واخر شي والله اني يمكن ما كملت عنده عشر دقايق ،، قلت يا دكتور الله يرحم ايام الروشته ،، قال لي صدقك والله ،قبل نقعد مع المريض عشر دقايق ونكتب في الملف دقيقتين وكان الله غفور رحيم،، احين لا ،، احين يقعدون مع المريض مال بو دقيقتين ويكتبون مال نص ساعه 
والله والله والله وانا قاعد انتظر دوري انه في دكتور يمكن قاعد فاضي مووول ما يسوي شي
والعياده ممزورة خلق ،، ويوم نادوني في الرسبشن قالو لي اي دكتور تبا ،، قلت مش فارقه عندي اذا الملف عشان اطلعونه خذ 40 دقيقه عيل عشان ادخل عند الدكتور كم يبالي !! قالوا والله انه الكل يشتكي من هالنظام
صار الاعتماد على الكمبيوتر في كل شي ،،حتى الدكتور يقول لو كتبنا تشخيص المرض وحرف واحد غلط يطلع ايرور في السيستم،، انزين ليش ها كله ،، شو فيها بطاقه الصحه الاوليه يا زينها والله ،، تدخل وتعطي الرسبشن البطاقه وما ياخذ ثلاث دقايق الا وهو مطلع الملف ،، الله يبحص التطور اذا جذه بيسوي في الخلق ،،
وكله صوب وسالفه صرف الدوا هااااي روحها صووووب ،، قبل شخط لك الصيدلي على كروتن الدوا ثلاث شخوط وكتب قبل الاكل او بعده وتوكل ،، احين لا انقع لين يطلع لك الدوا 
بتقوووولووون روووح خااص،، انا بحكم طبيعة شغلي عندي تأمين صحي قبل سالفة ثقة،، يعني من قبل لاتعالج في الخاص واموري طيبة الحمد لله ،،من ماحكومه بوظبي الله يعزها يارب ويطول بعمار شيوخها سوت نظام ثقة للتامين اصحي ،، والعيادات الخاصة صارت فالتووووه،، زحمة ،،زحمة،،زحمة،، تسير على الموعد تتريا مال نص ساعه،، غير طبعا التلاعب الي صاير في الفواتير 
الي يكتبونها عشان يحققون اكبر قدر من الربح 
حتى لو كان على حساب صحة المريض ..
لين متى بنتم نعااااني مع النظام الصحي ؟ والله مش قصدي النقد لغرض النقد فقط،،لا اتمنى نحصل حل لهاي المشكله والي الكل يعاني منها،، خاصه مع انعقاد مؤتمر الصحه هالاسبوع في امارة دبي ،،
ياريت لو حد يوصل هالكلام لحد من المسؤوليييين
ويشوووفون لنا حل ،، لان فعلاً تعبنا،،
السموحه ان طولت عليكم ،، وانتظروني لاكمل بقية الحديث عن مستشفى العجب والعجاب ،، اكيد عرفتووووه ،، مستشفى خليفه في بوظبي ( هذا لو اكتب فيه المعلقات السبع بعد ما ببرد)!!!
مرات اسوي جييه
اسير الصيدليه واوصفهم لهم الاعراض واخذ الدوا
والحمدالله ع كل حال
وربي يشفيك اخوي هالتأخير يحدث في ارقى الاماكن حسب الاستااف وضغط الشغل
ياريال خلها على الله
انا اشتكيت بس مافي فايدة
شو هالنصيحه تبا تنفد الريال
اول شي
الله يشفيك
ثاني شي
الله يرزقنا الصحة وما نشوف مستشفى خاص ولا حكومي
ثالث شي
إذا مرضت شوف لك اقرب صيدلية وقوله كذا كذا فيني بيعطيك دوا على كيفه قول بسم الله وتشهد وتوكل على الله واستخدمه وانت وحظك
حلوه مستشفى العجب والعجاب والله المستعان