بالصور فقط طريقتي في صنع الدخون^__^حياكم درس ابلاش

السلام عليكم ورحمة الله وبركاته ^__^
اكيد وايد الي حابين يتعلمون هالشغلة بس مب امحصلين الي يعلمهم
وان حصلوا الي يعلمهم فبيكون الدرس عن طريق دورة يشترك فيها العضو وبتكلفه بحدود600الي800درهم
فليش ما نستغل هالمبلغ فالتبرع ولا فتقديم مساعدات عينية او حتى نقدية للناس المحتاجة وبالاخص فهالشهر الفضيل وفهالايام العظيمة ^___^
شو رايكم بلي يعلمكم كيفية صنع الدخون وبأبسط واسهل طريقة اتخلي الكل يشتغل فهالمجال ^___^
ما بطول عليكم بتركم فعرض سريع وشرح بسيط على كل صورة راح اعرضها وان شاء الله راح اعلمكم فالمرات اليايه حركات ثانية بطور من شغلكم ^____^ والله من وراء القصد
اولاً وقبل شي انجهز القفازات ^_____^

شوفوا الصور من اليمين لي اليسار ,,انا اموزعه الاغراض الخاصة بالدخون فعدة علب عحسب الاغراض الي فيها ^___^ من اليمين لي اليسار(السحال*بودرة عود* واتحصلونه عند العطارين بس نوعيته ما اتكون جيدة ومعظمة مغشوش فسيروا عند أجمل اضمن لكم و على50درهم للجيس الواحد -مسك طياري ب125 من اجمل ويكون على شكل حصى بس انا اهنا طحنته وحطيته فعلبه*مسك بودرة ب25درهم مادري ب50 مب متذكرة >_<من اجمل -عنبر ب200من اجمل) ^_____^

وهاي صورة من فوق^_____^

اهنا انلاحظ شي دبات وهالدبات فيها زيوت عطريه بنستخدمها فالدخون اتلاقونها فوايد اماكن وعلى حسب العطر اتلاقون الاسعار شي على 100وشي150 انا ماخذه هاييلا من الرصاصي وبتلاقون شي منهم بعد فمحلات لعطور العادية-دهن الورد ب45اظن وبعد خذته من اجمل بس انا فريت القوطي يوم فتحته اول مرة ولازم يتغطى وعلبته اتكون اصغيره -شكر)^___^

انخل السحال^____^

لاحظوا الشوايب الي فيه(معنه نوعيته ممتازة بس بعد ما يخلى من الشوايب)
^____^

اضيف المسك الطياري وانخله^___^

واحينه المسك البودرة وانخله^_____^

لاحظوا الفرق بين الاثنين(الطياري ايي لونه على صفار وريحته اقوى) ولازم ما اكثر من المسك عسب لا يلبق الدخون ولا اتكون ريحة الدخون ما تنقبل>_<

اضيف الشكر وانخله^___^

احينه احط خلطة العنبر وهاي مكوناتها (عنبر+دهن الورد+ماي ورد)^_____^

هذا العنبر (آخذ منه كسرة )^____^

وهذا ماي الورد ويكون امركز(لا اتحطون العادي مال الاكل >_< وشي ناس ما اتفرق بين القابل للأكل والغير قابل)

اهنا ما رمت اصور هاللقطة وانا اشتغل على الجولة لأنه الغازات سامة وحارة والمفروض الواحد ما يقرب ويهه من الخلطة وهي عالنار(اييب طاسة واحط كسرة العنبر +ماي الورد+دهن الورد)واخليهم عالنار بس اوطي عليهم واتريا لين ايذوب العنبر وعقب اشله
لاحظوا هذا لونه من عقب ما يذوب العنبر-عقب احطه فوق السحال وباجي المقادير^_____^

احينه اييب لزيوت^____^

واصبهم فوق الخلطة ^___^

واخلطهم-لاحظوا فهالصورة ممكن اخلي الدخون عبارة عن دخون بودرة ابهالطريقة ,,يعني ابجذا يكون هالدخون جاهز بس نحن بنزيد من كمية لعطور وبنكور الدخون ^___^

اهنا كورت الدخون–احينه لازم اخليه يومين فحجرة فيها تهوية–اكبر غلطة انك اتخلي الدخون فالشمس لأنك جذا اتخلي العطر يتبخر منه وبتكون ريحته مب شي وانته ادخن منه^___^

عقب ما اخلص هاليومين اقوم واييب غرش نفس هااييلا ^____^

واعبيهم واخليهم مدة اسبوع ما افتحهم الا من عقب ما اخلص هالمدة و عادي اتبخر ^___^

هاي انواااع مختلفة من الدخون منه البودرة ومنه لمكور (بليز لا اتقولون اسوي دعاية لدخوني ترى ازعل >_< )

وسلامتكم ^____^
اتمنى استفدتوا من الدرس ومابا منكم غير الدعوة الطيبة فظهر الغيب لأني تعبت وانا احمل وسامحوني عالاخطاء المطبعية ان وجدت>_<