السلام عليكم ورحمه الله وبركاته
شحالكم يالغوالي عساكم بخير ؟!
الغالين انا لي فتره ف عمان وتوهق الصراحة ويا الخياطين خبركم هني ممنوع الخياط يخيط كندورة غير العماني وبعد ممنوع الغير عماني يلبس كندورة عمانية
عاد انا اقرب شي لي الامارات سرت خياط اسمه اظن غناتي او الغناتي ف بوظبي الخالدية وكل مره يرفع لي ضغطي وارد عمان كل الكنادير ارميها ف الزبالة وانا اقسم بالله بسير الامارات بس علشان الخياط
ف بغيت فزعتكم شباب جان تدلوني ع خياط زين اسير له ف بوظبي وشو أحسن نوع قماش بس مايكون ثقيل تكفون لان والله حرام كل مره افصل وتروح للزبالة الله يعزكم
والسموحة
تمام يالغالي لا خلاص بسير العين بأذن الله
مشكور ماقصرت بيض الله ويهك
عزيزي ليش تضرب خط لين بوظبي ؟
العربي الممتاز في العين
المغرب في العين
عبدالجليل
الختم راحت موضتها البس لك من الرقع الخفيفه
وحبيت أضيف لك معلومه أخوي أن العقال بعد ممنوع منعاً باتاً في الدوام الرسمي
والغريب ف الامر ان العقال هو خليجي وعمان دولة خليجيه ؟
وبالنسبة لعقوبة العماني لا لبس كندورة مب عمانية او عمانية بس معدله ( علشان في مواصفات ومقاييس ويمنع التلاعب فيها من قبل الخياطين )
عقوبته انه ينحرم من الدوام يعني اذا كان موظف ينطرد او طالب يتسجل غياب ماشي غرامة مجرد حرمان من الدوام في يومها
واذا كان مراجع لأحدى الدوائر الحكومية طبعاً بعد مايستقبل
الصراحة السالفة تضحك هع مع ان العقال اهو عربي الأصل وهالشي معروف بينما الكمه ياللي يلبسونها والكل يعرف هني ف عمان ان اصله افريقي (زنجباري)
مشكور اخوي ويزاك ربي الف خير
وبالنسبة للكندورة العمانية انا استفرت والمعلومات ياللي عندي اهي من شرطه عمان السلطانية
1- ممنوع المواطن العماني يلبس غير الكندورة العمانية ف الدوام الرسمي وفي المدارس
2- ممنوع اي خياط وهذا قرار من وزاره التجارة يخيط كندورة غير العمانية وبدون اي تعديلات ( يعني ماتروم تقوله الكركوشة سوها اطول او مثلا بدون مثلث هذا اللي اييك تحت اليد عند الابط والخ)
وطبعا اذا ييت مسقط راح تشوف كل الخياطين حاطين قرار وزاره التجارة انه ممنوع يخيطون غير الكندورة العمانية .. اللهم الا في بعض المناطق مثل البريمي او صحار اظن خبرك هالمناطق متأثرين ف الامارات وشعب الامارات ومخربينها يلبسون كنادير اماراتية بس طبعا بالدوام الرسمي مايستوي.
اما بالنسبة للمخالفة اذا شخص غير عماني ولبس عماني أهي غرامه ماليه وتتصادر الكندورة بس هالمخالفه محد يعمل فيها يعني قالو لي ماستوت عندنا حاله فيوم وخالفنا حد بس ياخوي تنحرج
يعني الاحراج ياللي يستوي لك كفاية شراتي ف المطار كنت بستقبل ناس يايين والشرطي شاف لهجتي مب عماني وسألني اخر شي قالي لو سمحت افصخ الكمه
يعني هالأحراج يساوي الف غرامه
طبعا هالمعلومات راح تستغرب اخوي يوم تعرفها بس وقسم بالله انا انصدمت يوم ييت هني وعرفتها
اونه يبون يحافطون على الزي العماني القديم يعني مايستوي فيه تغييرات وعلشان يميزون العماني عند الوافد او علشان يبقى للزي هيبته
اهي فيها وجهه نظر بس بنفس الوقت اهي مجرد كندورة وانا من وجهه نظري بالعكس المفروض يستانسون يوم حد يلبسها اونه شي عماني وتفاخرون فيه
وعلى فكرة بالنسبة لطلاب المدارس لا عادي كل الجنسيات لازم يلبسون كندورة عمانية + كمه ف الدوام
والسموحة على الاطالة يالغلا