السلام عليكم وعيدكم مبارك
طبعا حبيت ابشركم طلعت النا موافقة الاسكان من قبل اسبوع تقريبا والحمد الله بعد تقريبا 8 سنوات من الانتظار
المهم الحمد الله والشكر
بس حبيت اطلع على نماذج مخطط لبيت طابقين ويكون جميل وطبعا مب وايد عود لانه مساحة الارض 100 * 100 يعني بيطلع زعنطوطي
المهم .. ادريبكم ما بتقصرون بس بقولكم بغيت ايكون
* اربع غرف فوف
* تحت غرفة طعام-مجلس- مطبخ – غرفة ضيوف وخدامة والصالة
اهم شيء الصالة تكون مستاسعة
ياالله شدو الهمة واللي عنده نصايح يضيفها قبل البناء
واذا في عندكم استشاري ومقاول مضمون يخلص الشغل بسرعه دلوني عليه بس ايكون في عيمان
وكم المدة اللي بيخلص فيها البيت 
ابا اسكن بسرعه
القرض 500 الف وطبعا الباقي على عمي البنك
ومشكورين
شوفي التصميم الي تبغين تسوانه بس نصيحه خلي البيت مرتفع يعني عن الشارع الرائسي او الي يمر جدام البيت فوتين وخلو الفله 7 درجات مرفوعه
رفع الفله البناء عن مستوي الشارع بيريحكم من ماء المطر وانتي عارفه عيمان
في أبوظبي والعين برنامج الشيخ خليفة مليونين
في دبي 750ألف
برنامج زايد للأسكان 500 ألف+مذلة فوقهن
برنامج الشيخ سعود بن صقر القاسمي 500 ألف يلين ألحين ما شفنا شي منه…
السلام عليكم ورحمة الله وبركاته…
بالبركة عالقرض وإن شاء الله بالهناء والسعادة في البيت ليديد ولاتنسين العزيمة…
بالنسبة للمخططات أنا حاليا قاعد أبني بيت دور أرضي 4غرف وجلس وصالتين بدون ملاحق بـ720ألف درهم البرنامج 500 والباقي انا سلمته… وبعده باقي الملاحق وغير وغير الحمد الله على كل حال…
أخوي قاعد يبني دورين ب4غرف ومطبخ داخلي وصالة وسور خارجي بـ 735ألف درهم ه
بس عاد المساحات صغيرة يعني الغرفة4.5 في 4.5 متر غرفة النوم الرئيسية 5.5في 6 متر والباجي في هالمساحات.. إذا تبين تشوفين المخططات بخذ السي دي عنه وبطرش لج إياه جاهز مع مخططات الكهربا..
السعر يعتمد على الإمارة أنا أبني في رأس الخيمة – منطقة المنيعي جنوب رأس الخيمة والإستشارة القلعة للإستشارات الهندسية..
في النهاية الله يعينج على الأسكان ومطالبهم وحاظرين في الخدمة ….
مبروك ع القرض!
احيد في مواضيع في قسم بيع وشراء مخططات فلل على سي دي