السلام عليكم و الرحمه
شخباركم و جيف انتووو
عساكم بخير و سهاله
يا جماعة الخير انا محتاجه ارمس حد و مب لاقيه ..فأتمنى القى اذان صاغيه هنيه عشان تسمعون سالفتي و تشورون عليه
طبعا تدرون و الا ما تدرون اني اشتغلت
الحين من 3 شهور و انا اكافح كل يوم ..و يوم زين و يوم مب زين و اغلب الايام مش حالك
و تعبت الصراحه مع ان الجماعه اللي ويايه طيبين و فنانين و شغلي وايد فيه تغيير اماكن و الحمدلله كل ناس اقابلهم اخير عن غيرهم و لو ان تلقى نفر و الا نفرين وغود بس عادي طاف و الحياه حلوه ..و بالنسبه للراتب الحمدلله راتبي اعلى عن كل ربيعاتي مع ان كلنا نفس الشهاده و بالعكس هم عندهم خبره اكثر
النقطه الاولى عندي ان الدوام ما يخلص وقت محدد..المفروض الساعه هنتين بس الواقع شي اخر ..يعني الاسبوع اللي طاف راده مره البيت المغرب الساعه سبع …و اغلب الاوقات اربع ..و ياليتني اسوي شي!! انا بس جي سمنديقا يعني لو يرخصوني احسلهم لان مضيقه عليهم بالاكسجين لووول
النقطه الثانيه هالشغله ما حبيتها..فكرت يمكن اتقبلها بس ما احس اني احب شغلة البنوك
النقطه الثالثه ما احس اني مستفيده شي…يمكن في البدايات هيه وايد تعلمت اشياء و حسيت اني بستوي شي …بس الحين ماشي شي يديد و حتى لو تبا تتعلم شي يديد محد يعطيك مجال
النقطه الرابعه يوم السبت دوام ..اتغصص يوم ربيعاتي كلهم مكملين الويكند الا انا حليلي لازم ارد البيت ارقد
النقطه الخامسه شرات ما تدرون و الا ما تدرون انه بنك ربوي بس انا من الاساس داخله لان برنامج التدريب اللي دخلته من اقوى البرامج شرات ما سمعت ..و فعلا كان اووكي ..و كنت حاطه في بالي اني بخلص تدريبي و بفلسع
النقطه السادسه ابا ادرس ماجستير في الصيف و ادري ان في ناس يرومون يدرسون و يشتغلون بس انا مب منهم ..و لا يكلف الله نفسا الا وسعها
النقطه السابعه انا انسانه احب سوالف التجاره و البزنسات بس هالدوام مب مخللي وقت..يعني انا اتاجر لان هالشي اللي احس اني احبه بس الحين ماشي وقت
النقطه الثامنه انا فقدت حياتي الاجتماعيه و استوى بيني و بين الناس شرخ كبير..حتى يدتي ما سرتلها من 3 شهور..و يوم سرت هزبتني هزاب …و يدتي الثانيه ما شفتها من قرن و لا لقيت وقت اسير..
و اذا طلعت ويا البنات اتم ماده اطول بوز في العالم لاني تعبانه …هلكانه بس محتاجه اغير جو ..فأدش في هالمود العجيب
يعني قلنا دوام بس مب موت جي !! و الا تحسون انا مكبره الموضوع و اتدلع لان من سنه و انا يالسه في البيت؟؟
و شي نقاط وايد ما بخلص منهم لو اتكلم لكن نكتفي بهاييل..خلونا نرد على القرار الموهيم
الحين ماعرف و واقفه على مفترق الطرق
و اختياراتي كما يلي
1. اودر الشغل و ايلس في البيت لين ما اكمل ماجستير و عقب يحلها الف حلال و لكل حادث حديث
2. اودر الشغل و اشوفلي دوام ثاني يناسبني اكثر
3. اتم اكافح في هالدوام يمكن نشوف نتيجه بعدين
طبعا انا بستخير …بس حبيت اشاوركم لان من شاور ما خاب
يلا جماعة الخير اتحفوني بأرائكم الجميله و تفكيركم السديد
أنتي اداومين السبت ،، وأنا
شلوا عني دوام السبتحبيبتي
” Dubai Baby “
استخيري ،، وبتشوفين أمورج مُيسـّره ،، بإذن الله
الله يعينج حبوبة
هو الدوام فالبنك بحد ذاته صعب
وربوي !!!
انا انصحج تمي فدوامج وحاولي تنبشين تحت الارض عن دواام ثاني ..
ويوم بتضمنين انج حصلتي على طول قدمي استقالتج
وعلى سالفة الكراف لين الساعة 2 .. انتي رمسي السوبرفايزر هناك واستفسري اذا الدوام ينتهي عالساعة 2 شلي قشج واظهري ماله داعي اتمين
الله يعينج
وبالتووووووفيج
فتوقعي المزيد و المزيد من الآراء، وقد تزيد حيـرتج حيـرة
بالنسبة لـي لو وقت بنفس هذا الوضع، أول شيء بستـقيـل لأنه راتبـي صعـب أبلع منـه و ألبس. ( ربا )
الشيء الثانـي صحتـي أولى، وهم وعدوج الدوام ليـن 2، هذيـله يبالهم واحد عينـه حمـره لأنه أكيد شافوج على نيـاتج و ماقلتـي شي
وفي النهـاية، بطلـع من الشغـل و بكمـل دراسة المـاجستيـر أفضـل، لأنه وبحسب رأيي الشغل يتعـوض، لكـن الدراسة لهـا وقت معيّن و الإنسان من بعدهـا تزيد مسؤولياته وخصوصاً بعد الزواج.
فإغتنمي الفرصة و اكسبي أكبـر قدر من الشهادات قبل الأمومة، لأنج ما بتتفرغين.
واما الوظائف، فهي متوفـرة وبسهولة لأمثـالج، من المميزين، حملة الشهايد و المثابرين، و بعد إنتهائج من الماجستيـر قد تزول آثـار الأزمة العالمية ان شاء الله تعالى
ماتدرين كيف فرحت لج يوم توظفتـي ، لكن تألمت كثيـر من شفت هالموضوع.
ياسر
أنا اؤيد رأي أخوي .. وبصراحة أي شغله في العالم تبا لها وقت لين تتعودين عليها وتقدرين تكسبين رضاهم ووهم … انتي خلج فالشغل وحاولي تدورين لج شغل في مكان ثاني … وع الاقل خذي لج خبرة .
والصعوبة صدقيني بتروح … وبخصوص التواصل اعتقد التلفون موجود تواصلي معاهم بالتلفون كل يومين وامورج بتكون طيبة .
مجرد ررأي