( بيرة ) في الامارات السبع

السلام عليكم

بغيت اخبركم في هذا الموضوع عن السالفة الي استوت امس في مباراة ميلان وهامبورغ في دبي في ستاد الامارات السبع The sevens الجديد

المباراة اقييمت في ستاد غير جاهز نهائيا من ناحية المدرجات .. مادري ليش مستعيلين عليه وخلوا المباراة عليه .. ما علينا من هذا كله

المصيبة الي حصلت في الملعب هي بيعهم (للبيرة) عزكم الله في الملعب وهي نوع من انواع المشروبات الكحولية .. وطبعا الاجانب ما صدقوا ونحصلهم شالين كراتين وياهم كل كرتون فيه فوق 10 قلاصات .. دقايق والا الريحة القذرة فايحة في المدرجات .. استغرب انهم منعوا التدخين في المدرجات ومفتشين الشرطة ما خلوا الناس يدخلون وياهم سجاير .. وفي المقابل سمحوا للمشروبات الكحولية في الملعب

كنت بطلع من الملعب وما بكمل المباراة لأنه ما يشرفني ايلس ويا هالأشكال بس المشكلة ان وياي ربيعي ياي من الكويت بس عشان يحضر المباراة

والقهر بعد المباراة ونحن طالعين الممر مزدحم .. وعندي مجموعة من البريطانيين يشروبون .. ما قدرت ابعد منهم لان مافي مجال بسبب الزحمة .. واحد منهم شكله كثر وقام يخورها اخر شي .. وكان شال بإيده كوب كامل والله يعلم كم شارب قبله .. المهم تم يمشي ويصارخ ويخبرط بالكلام جان يحيس الكوب الي بإيده وجب نص الي فالكوب على الارض عند ريلي .. الحمدلله اني كنت منتبه وبسرعة سحبت كندورتي وريلي قبل ما يخيسني بالي يشربه .. وهو مكمل ولا يدري شو السالفة .. كان خاطري اهفه بكف بس قلت لنفسي
يا غريب كون اديب .. يا راعي الكندورة والغترة

والله قمة المصخرة انهم يسمحون ببيع الخمور في ملاعبنا

بس نحن شو انسوي .. لا حول لنا ولا قوة ..
ما بيغون يزعلون الشقر واصحاب العيون الزرق ويبغون يونسونهم بأي طريقة على حساب ديننا وعاداتنا

الله كريم الله كريم