السلام عليكم
شحالكم ؟؟
ياخواني من يومين رحت معارض العوير ويا ريال … وليتني مارحت .!!
حليله كان عنده فتك 2009 ,, واحد دعمه وجلبه فالعين ,, فقال بس تعبت من النيسان كل ماياخذ واحد لازم يستويله شي ,,
فقرر انه ياخذ كايين جي تي اس ,,
حصلنا وحده فمجلة الاوتو تريدر ,, فرحنا نشوفها ,,
يوم وصلنا هناك ,, رحنا عند المعرض نشوف البورش
البورش بصراحه داخليا وخارجيا نظييييييفه ,, بس يووم يينا للتفاصيل ,, انصدمت من وايد اشيا .!!
اول شي الريال ……. وااااايد يحلف بدررجه غير طبيعيه .!!!
كل مايقول شي يقول قبلها كلمة قسم بالله ولاا والله العظيم .. وعزة ربنا .!!
اقوله انزين الله اعز عنك لاا اتم تحلف واايد .. وهو مصر الا يحلف ..
ثاني شي شباب انا انصدمت من ممشى الموتر
فكروو ويايه بالعقل .. الموتر ع قولته استخدام حرمه من العين ,, ويحلف ان الحرمه ماتسرع فيه فوق ال 120 ولاا تحب الحشره والدعاس .!! ,, ومركبه اكزوز سستم تفصييل وصوته حشره .!!! وعليه برمجه .!!!
هاي مشيناها ,, ثاني شي الموتر مدخل تجييك ال 40 الف من سنه كامله .!!! والحينه الموتر ماشي 41 الف .!!
بالعقل طول هالفتره الحرمه مشت الموتر 1000 كيلو بس ؟!!
الشي الثالث اونه الموتر مشراي من الحرمه قبل 4 ايام ,, ب 195 الف .. ويحلف ويقول شوفو الفواتيير وشوفوو وشوفوو ., حشى 6 فواتير ع نفس الموتر .!!! ويبا يبيعه ب 190 الف .!!
يعني بيخسر 5000 درهم عسب يبيعه ؟!! انا عرفت ان السالفه ومافيها ان الموتر منزل الكيلوو وان اكيد الحرمه باعته ب 170 وهو سجل فالفاتوره 195 شرات ماقال واحد من الاعضاء قبل يوم باع موتره ..
يعني ابدا مافيييه اي مصداقيه فالبيع .!!
عقب قلنا بناخذ لفه نشوف المواتر وبنرد له لو ماشي امل ,, رحنا وشفنا المواتر ودرنا فكل المعارض ,, بصراحه ابد ماشي مصدااقيه والاسعاار فووووووق ,, عنبوو ورافعين خشومهم مادري ع شوو ,, نقولهم كم سعر هالموتر يردون علينا سعرنا جيه تبا تبا ماتبا شوف غيرنا .!!!
عنبوو انا ياي اشتري ولاا ياي اشحت ,, قسم بالله تندمت لاني رحت هالمعرض ,,
لو رايح معرض صناعية العين عند الشيبان قوم بو الكروزرات والفتكات والاستيشنات ابرك 
لاتعور راسك بمعارض ولا خرابيطهم اذا انك ناوي عسياره يازينها يوم تاخذها من الوكاله ولا اذا انك ماترووم عاليديده المستعمل دوره في المواقع احسن وابعد عن المعارض …. حلاته يوم الفلوس كاش تشوف السعر ينزل سرعه ههههه
موفق بإذن الله … لك مني أجمل تحية .
والله انا أأيدك وانا كنت احد الضحايا في شرائي ل بي ام البينا ههههههه
حلف مليون حلفه انها سيارة شيخ وانها نظيفه
وبعد مده اكتشفت انها مدعومه
وانها كانت مزوده رادين الراديتر ورا عشان القطع خلها على الله من بعدها حرمت على نفسي اشتري شي من هناك
قاطعوووووهم قاطعهم الله هههههههه
معارض العوير انا بخبركم سالفتهم الله يسلمك
هايل مايعتمدون على شغل السياره والسيارتين
من جي تلاحظون متمسكين بالاسعار ومايعامل الزباين بهايج الطريقه الممتازه عشان يكسبهم
اعتمادهم الاول على تجار الجمله
الأفارقه والروس والكازاخيين
إيك الواحد ويخلص فوق 30 و 40 سياره مره وحده وفلوسه كاش ويشحنها ع طول
دائما انت كشخص حاول ادور على سياره استخدام شخصي افضل من ناحيه السعر وانك تعرف الي مستخدمها وتقعد معاه واكثر الشباب والناس ماشالله تخاف ربها وبتقولك الصراحه وتقدر تفحص ع راحتك وبالتوفيج ان شاء الله
معارض العوير اكبر عيوبها الاسعار والا المواتر نظيفة
لكن بخصوص تنزيل الكيلو كيف نكشفه ؟!
معروفين المعارض حراميه ياخويه وماشي مصداقيه وخصوصا العوير صدقك من تدخل المعرض وخصوصا لو جنسيه عربيه يالس على الكرسي ولابس نظاره ويدوخ ولايرد السلام تساله عن السعر يرد عليك سعره جذه ومافي مجال عنبوه تقول داش بيته مب معرض يرمسك ورا خشمه الله يعينك ولو بغيت معرض اعرف ريال والنعم ولد البلاد وفي العوير ومابيقصر وياك ومواتره مضمونه خذ الكلام مني ..