السلام عليكم ورحمة الله وبركاته
شحالك يا اخواني اعضاء منتدى الامارات
انا حبيت احذركم من التعامل مع العضو مستر تكت هذا لاني تعاملت معاه وبشرح لكم كل اللي صار معاي التفصيل …. وانا قبل ما انزل الموضوع تواصلت مع الاخ كبير المستثمرين وخبرته بالموضوع وقالي حذر الاعضاء من التعامل مع العضو مستر تكت
العضو مستر تكت
هذا العضو عارض موضوع تذاكر على طيران الامارات لمجموعة من الدول منها تايلند بسعر 1499
المهم انا طرشتله رسالة عسب احجز عنه رحلة لعدد 7 اشخاص لتايلند
الحبيب ارسل لي ايميل وعطاني حجز ثلاث اشخاص وقالي باقي الاشخاص باكر لانه السيستم معلق وعطاني رقم الحجز وعطاني موقع وقالي ادخل وتاكد من الحجز
المهم انا خذيت رقم الحجز واتصلت على طيران الامارات على طول عسب اتأكد من الحجز واكدوا لي انه في حجز صحيح ولكن الحجز قابل للإلغاء وقالو لي انه تم حجز التذكرة الواحدة بسعر 2840
وبصراحة هذا الشي شككني في الموضوع ………. المهم اتصلي الريال ثاني يوم من امريكا وقالي اسمه (خليل) وعطاني اسم شخص اسمه بهاء الدين مجاهد من فلسطين من غزة وقالي حول الفلوس عليه وعقبها طرشلي اسم ثاني من بلجيكا وقالي خلاص طرش المبلغ على الاسم الثاني …….
وانا سألته ليش ما اطرش المبلغ لك انت في امريكا طبعا رفض هالشي …… وقلته انا تاكدت من طيران الامارات وقالولي انه الحجز تم ولكن بمبلغ 2840 وقلته اشرح لي كيف الحجز بهذا السعر وانت قايل سعر التذكره 1499 ….. قالي انا عندي سعر خاص وسيستم معين اخذ عليه السعر ولكن ما اقدر اقول لطيران الامارات انه هذا السعر 1499 اعطيه للناس …..
المهم انا قلتله انا بصراحة ابغي شي يضمن حقي اني ما اخسر تذاكري لاني دافع مبلغ 10493 عن 7 اشخاص
طبعا عصب وقال ليش ما قلت هالشي من قبل ……… وللعلم هو منزل موضوع وقايل في الموضوع انه تقدر تحجز وتسافر وتدفع بعد ما ترجع اهم شي تحط ضمانات
هذا هو الموضوع اللي منزله
فانا قلتله شو الضمانات اللي تبغيها عسب اني اسافر ومن ارد بدفع لك الفلوس عسب اضمن انه التذاكر مافيها شي غلط
أولا رفض اي شي وقالي ارسل المبلغ كامل ….. وانا شخصيا رفضت بصراحة
المهم قالي في واحد من اهله في عيمان وانه بيتصل علي وقالي ارسل نص الفلوس والنص الثاني عطه الريال اللي في عيمان
انا قلتله انا بعطيه كل الفلوس بشرط يوقع على اوراق تضمن حقي انه اقدر اطالبه في حالة صار شي في التذاكر
الريال اتصلي وقالي انا ما اعرف الريال الا عن طريق النت وقالي انه كلمه وقالي انا بعطيك عمولة …… المهم انا قلته ما يهمني شو صاير بينكم اهم شي انك تضمن حقي اذا صار اي شي في التذاكر ……. طبعا الريال رفض هالشي
انا طرشت ولد خالي وراح طيران الامارات وطلعت التذاكر محجوزة برقم بطاقة مسروق …… وطبعا سوو تحقيق مع ولد خالي لانه العضو مستر تكت حاط اسم ولد خالي على اساس انه هو اللي مشتري التذاكر
انا تواصلت معاهم وقلتلهم اني انا اللي اشتريت التذاكر وخبرتهم بالموضوع ..
وهم طبعا سوو بلوك على الماستر كارد ……. وقالو حاليا هذي طريقة جديدة منتشرة للنصب .. وقالوا ما نعرف اذا عنده بطاقات ثانية مسروقة او لا
الريال من نص ساعة متصلي وقالي شو صار عشان موضوع الفلوس …. وقالي شو صار مع الريال اللي في عيمان وليش ما عطيته الفلوس …….. صبعا انا خبرته عن موضوع البطاقة المسروقة وتم يحلف ايمان انه مب مسروقة وقال انا اصلا حجزت عن طريق الاميريكان اكسبرس .. المهم اخر شي قال خلاص انا ما ابغي شي منك وسكر التلفون
المهم انا حبيت ابلغكم بالسالفة اللي صارت وبالتفصيل
واكيد هالفترة الناس تدور تذاكر وكونه يعطي تذاكر بسعر حلو ومميز اكيد العالم كلهم بروحون عنده …….. علما بان سعر التذكره لتايلند حاليا 3000 وهو يعطي التذكرة بسعر 1499 ………. وكثير اللي بصدقون الموضوع
اسف جدا على الاطالة ولكن حبيت اوصلكم اللي صار معاي بالكامل
والسموحة مره ثانية على الاطالة … واتمنى اني اكون وصلت لكم الموضوع بشكل واضح ………
لا حول ولا قوة الا بالله
الله يعوض عليك اخوي ………… ومهما صار شو بيستفيد من المبلغ اللي ما خذنه .. تراه لا يغني ولا يسمن من جوع
وعلى فكره انا نفس الشي الريال تم يحلف حلف غير طبيعي والله اني صدقته بس الله ستر وكشفه
المهم الله يوفقك اخوي ويعوضك عن اللي راح عنك
الله يبعدنا ويبعدكم عن إعياااال الحرااااام
مشكور أخوي على التنبيه
أنا تابعت مشاركات هذا العضو وكنت شاك فيه مقارنه بأسعاره الخياليه وأسعار السوق,
عمليات النصب كثرت جدا بأشكال وطرق مختلفه والمشكله أنها مغريه,
قصتي كلأتي
قبل سنتين حصل معاي نفس الموقف, شخص مسوي أعلان في النت عن مجموعة بطاقات أقامه في مجموعة فنادق حياة, الي شدني في الموضوع أني وايد أتردد على الفندق بحكم سفري.
المهم أتصلت في الشخص الي حاط الأعلان وأستفسرت أكثر عن البطاقات, البطاقه الواحده تشمل أقامه ثلاث ليالي + بطاقه 100$ تستخدمها في الفندق للمطاعم وغيرها من خدمات الفندق وكل هذا بسعر 2500 درهم مع العلم أن السعر العادي مقابل ماهو مذكور في البطاقه هو 10000 درهم تقريبا يعني يبيع البطاقه بربع السعر,
بعدها تواعدت معاه في فندق جراند حياة دبي, تلاقيت معاه في اللوبي كان شخص عربي بس مايعرف يتكلم عربي بس أنكليزي و فرنسي شكيت فيه بصراحه
, وسألته عن سر السعر المغري قالي أنا أشتري من النت بسعر مخفض!!
قلتله أبي أتأكد من البطاقات أنها شغاله, خذت وحده من البطاقات وسرت للرسيبشن في الفندق وسألته ابي أحجز 3 ليالي عندكم والدفع بواسطة هالبطاقه, سار الموظف عند المدير عسب يسأله البطاقه اذا معتمده عندهم وعقب 10 دقايق خبرني الموظف ان كل شي أوكي ممكن تدفع في البطاقه الحين, سألت يعني البطاقه مافيها مشاكل وحجزت عندهم الثلاث ليالي بس للتأكد يعني ما أستفدت منها بشي.
رديت للشخص النصاب وخذيت منه 10 بطاقات يعني دفعتله 25000 درهم
بعدها استخدمت البطاقه الثانيه وتوهكت, يالي مدير الفندق للغرفه يخبرني ان البطاقه مدفوعه من بطاقه مسروقه في أمريكا!!
تم المدير يقنعني ساعدنا نشتكي على هذا النصاب لأنه مشتري وايد من بطاقات مسروقه ومايعرفون كيف يصيدونه…
وراحت علي باقي البطاقات والشخص مغلق تليفونه
مأعرف عقب أسير أشتكي على الريال الي ما أعرف عنوانه وله أسير أشتكي على الفندق الي أكدلي أن البطاقه شغاله وممكن أستخدمها؟
وبلأخر أستسلمت وبعدها البطاقت راكده على جبدي.
الله يعوض علينا ويبعد عنا أولاد الحرام
وأسمحولي على الأطاله
الحمدالله عندي قاعده في حياتي
اني ما اتعامل مع اي زلمه ولو يبيعلي بلاش
وادفع اضعاف لمواطن بس اهم شي ما اتعامل مع ناس حياتهم عايشينها بالنصب على الناس
بيض الله ويهك
ويا اخوان رجاء داذما اتخذوا الطرق الصحيحه للشراء روح للشركه او الوكيل دايركت واشتري ولو غالي