أتمنى تقرون الموضوع كامل للأهميه التامه
اخواني و خواتي حبيت اني افتح هالموضوع لأنه كم واحد انصب عليهم و عسبة انبهكم لأخر أنواع الغش الي صاير فالسوق … و حسبي الله .. الي ما يخافون الله و الغشاشين و النصابين كثيرين …
طول عمرنا نسمع الوارد ايي غرقان لكن خليجي غرقان هذي جديده !!!!!!!!
هي نعم اخواني خليجي غرقان … لو تذكرون اعصار جونو الي صار فـ ((عُمان)) من فتره … للأسف بعض الي ما يخافون الله قاموا يشترون هالسيايير ويصلحونهم و يبيعونهم …
و انته يا غافل لك الله .. اخر ما تتوقع انه خليجي غرقان !!!!!
وللأسف كم شخص اعرفهم انصب عليهم … بوقول لكم أمثله …
تخيلوا اعرف صاحب معرض .. وتعرفون اصحاب المعارض ما يقصرون فالفحص و عندهم خبره … قالي انا انصب علي … قلت له كيف ؟؟ قال جاني رجال عنده لكزس gs خليجي و اخر ما اتوقع انه غرقان … بس فحصت المكينه و القير و الشاصي .. و البدي حالته جيده و شريته من الريال .. بعد فتره قام يخترب الموتر … و اكتشفت انه غرقان … خليجي غرقان …
و معرض ثاني حسبي الله عليه كنت باخذ من عنده جاكور .. قالي الموتر وكاله بس وارد عمان .. قلت له بفحصه فالوكاله .. وما طاع … المهم بالصدفه ساير عند كراج متخصص فالجاكور اتخبره لو عنده سياره للبيع … و قلت له حصلت سياره جيه مواصفاتها … قالي ابعد عنها هاي غرقانه و كانت واقفه عندي فتره اصلحها !!!!!
و انا شايف بعيوني فصناعية الشارجه .. لكزس 460 واقف وحالته حاله ويوم سألت راعي الكراج قالي هذا غرقان من اعصار جونو فـ عمان و يايبينه عسبة يصلحونه …
و غيرها بعد شفت كم سياره تويوتا يارس عليهم قراطيس الوكاله و الجلاد الأبيض الي ايي عالبونيت … و استغربت ان الجامات مفتوحه و الغبار مهلك السياره .. و يوم تخبرت راعي الكراج قالي نفس السالفه غرقان فـ عمان ويايبينه يصلحونه ….
يعني اخر ما يتوقعه البني ادم انه خليجي و غرقان !!!!!
الي بقوله يا اخوان اعصار جونو على ما اذكر كان 2007 … فأي سياره وارد عمان مديل 2007 و نازل افحصوها بدال المره ألف … و لو غلطان فالسنه حد يصحح لي …
لأن المشكله ما بتحصل نفس امريكا تقرير الفوركس يطلع لك تاريخ السيارات الخليجية بالتفاصيل …. والغش و النصب في عروق بعض الناس …
بس انبه مره ثانيه تأكدوا لأنه البليته ايي عليها خليجي … بس اسألوا لو السياره وارد عمان و لا الإمارات .. لو عمان هالله هالله بالفحص .. و الي يشك يسير الوكاله و يتخبر عن رقم الشاصي من الامارات و لا عمان …
ولو في حد يفيدنا كيف الواحد ممكن يكتشف هالسيارات الغرقانه جزاه الله ألف خير …. و الي عنده اي معلومه يفيدنا
و انا كتبت هالموضوع للفايده .. لأنه شفت ناس انصب عليهم بهالسيايير الغرقانه بعيوني و شفت النصابين بعيوني … و حبيت اني انشر هالشي عسبة ما حد منكم يطيح فإيدين هالنصابين و يا ريت كل من يقرا الموضوع يخبر الي يعرفهم …
و السموحه منكم اخواني
بارك الله فيكم و منكم نستفيد..
فحص الغرقان
اول شي تروح على الولاعه وتشوف اذا مصديه هذي غرقانه (وعادي اللي يصلحون الغرقان اول شي يبدلونها)
ثاني شي تروح على براغي الكراسي اللي في القاعده مالته اذا مصديه او مركبين مقاسات مختلفه ابعد عنها
ثالث شي لازم تكون كهربة الكراسي ماتشتغل عدل او تحس فيه خلل في الحركه
رابع شي قواعد الفيوزات غالبا تكون مصديه في الغرقان
الخامسه الحدايد التابعه لدواسات البريك والبترول يكون مصديين
اتمنى اني افدتكم
تحصل براغي الكرسي مصديه
وافتح الدبه بتحصل بعد البراغي مصديه
ولول شكيت شكيت حاول تبطل فرشة الارضيه وطالع تحت اذا شفت في صدى افهم السالفه
الغالي اظن الغرقان ينعرف من ربلات السياره … يعني بطل الربلات كلها اللي على الموتر وجوف الصبغه تحت الربلات .. هل هي مصديه ؟؟ او مصبوغه معجون ؟؟؟ هذا انا اللي اعرفه ونتريا ردود الاعضاء ……… ومشكور حبيبي قلبي على التنبيه
اتمنى لو المشرف يلوّن و لا يثبت الموضوع كم يوم خل الناس كلهم يشوفونه