السلام عليكم ورحمه الله وبركاته

كيف الحال يا اخوان.؟

بخبركم سالفتي ويا الاب توب اللي اشتريته عن طريق احد الاعضاء في منتدى الامارات.
قال عنده التكترونيات ولابتوبات واسعار اقل عن سعر السوق.. عنده تلفزونات بلازما سامسونج وغيرها مع لابتوبات وغيرها.
عرض عليه لابتوب سوني سعره الاصلي في السوق 7 الاف درهم ..لكن سعر الحبيب كان 3900 درهم.
عرض مغري طبعا..
قال لو محتاج اي نوع من الالتكرونيات نقدر نوفرها الكم باسعار محروقه …مقر شركتهم حسب كلامه فدبي والشارقه.
ويقول البضاعه ايبونها من امريكا ويدخلونها الدوله بدون جمرك على انها استخدام شخصي وليس لغرض التجاره .وهذا هو السبب لي يخليهم يبيعون البضاعه باسعار محروقه.

اشتريت منه لابتوب سوني بسعر 3900 درهم من اليوم الاول اسمع صوت فالمروحه .. ..اتصلت فصاحب البضاعه …وقالي ماشي مشكله ببدله لك …لانه عاطني ضمان 6 شهور..ويبدله مره وحده بس..وبدلته بلابتوب توشيبا بنفس السعر ولي اسعارهن الاصليه 7 الاف درهم…لكن طبعا عطاني اياهن بسعر 3900 ..

الاب توب الثاني ما كمل يومين ولا اسمع صوت فالشاشه يوم افتحه واسكره ..طلعت المشكله من توصيل الوايرات الداخليه.. ضاغطه على كفر الشاشه.. وكل ما افتح الاب توب واسكره اسمع صوت ..
بعد اسبوع انكسر كفر الشاشه ..حاولت الزقه بشي عشان اثبته ..بعدها بفتره انكسر الكفر من الطرف الثاني ..وطاح الكفر كامل ..حاولت اثبته لكن ماشي فايده ..وطلعت علل ثانيه بعد فلابتوب…اتيه فترات يسكر اروحه ..
طلع لابتوب كحيان شكله مستعمل ومغيرين فالنظام والكفرات بسسسس…وتجميع غلط في غلط..
لو زدت الفين وخذتلي الاصلي من الوكيل ابركلي ..

المهم بغيت احذر كل عضو فالمنتدى من هالاسعار المحروقه …لي كلها تجميع فتجميع وما استبعد تكون مستعمله ومغيرين الكفرات فقط ويبيعونها على انها اصليه وجديده. ..

هذا موقف صار معايه… وحبيت احذركم من هلغشاشين ..

..

السموحه

9 thoughts on “####تحذير###”

  1. اخوي خذها نصيحة يوم تشوف الاسعار محروقة خاصتاً في الالكترونيات اعرف ان هذه البضائع فيها عيوب مصنعية ويتم بيعها بأسعار اقل كثيراً الى اذا كان يوجد ضمان من الوكيل اما اذا كان الضمان من البائع المحل فهيا من بضائع الاستوكات والتقليدية وهناك امر اخر ويجب ان يعيه الجميع وهو عند شراء اصحاب المحلات للبضائع يطلبونها بدون ضمان الوكيل اي ضمان الصيانة فقط في الثلاجات والمكيفات يقولون لك مضان على الكمبريسير 5 سنوات وعند اختراب الكمبريسر يطلبون منك بدل فك وتركيب على الاقل 800 درهم في المكيفات يعني كنك يا بوزيد ما غزيت

    ارباب

  2. انزين خبرني منو الريال

    لاني ناوي اشتري تلفزيون ههههه اخاف اطيح فالفخ

    نصيحه لو بتاخذ تلفزون خذلك من الوكيل او من كارفور ..اسعار مناسبه مع ضمان.
    لو كانت البضاعه فيها خدوش او غيرها مستحيل تنعرض ..عشان يحافظون على سمعتهم ما يعرضون الا الشي المضمون..

    قبل فتره خذتلي لفه فصناعيه الشارجه..حصلت تلفزونات بلازما لي شاشتهن مسطحه باسعار رخيصه .
    قال هاي اشيا مردوده من شركات لان فيها خدش او كسر بسيط ..
    ويبيعونها على انها مستعمل ..واضحين في عمليه البيع والشرا..

    نصيحتي لك.. لو تبا تلفزون خذلك جديد من محلات معروفه ..انسب واضمن

  3. أنا استوى لي موقف مشابه
    وما أعرف إذا هو نفس العضو اللي انت تتكلم عنه ولا غيره
    طلبت منه تلفزيون وكان فعلاً سعره مغري
    يوم وصل التلفزيون تفاجأت بأن الكرتون مب مذكور عليه أي شي عن نوع التلفزيون
    كاتبين بخط اليد نوع التلفزيون ورقمه
    قلت ما عليه
    يوم فتحت الكرتون كانت المفاجأة
    يعني حتى الأعمى بيعرف إن التلفزيون هذا مستعمل
    خدوش في كل مكان
    وأثر على البراغي
    وفي قطعه بلاستيكيه في طرف التلفزيون مكسوره
    على طول اتصلت فيه وقلت له كيف تبيعني تلفزيون مستعمل على انه جديد
    تم يحلف والله إنه جديد
    مع العلم إن هالكلام كان في نهار رمضان !!
    قلت له تحلف كذب وانته صايم
    وطلبت منه يرد يشل تلفزيونه ويرد لي فلوسي
    قال انه بيرد بعد الإفطار
    وطنشني لمدة يومين
    واتصلت به من رقم ثاني وهددته بأني أفضحه في المنتدى
    وبالفعل صورت الكرتون والتلفزيون والخدوش اللي فيه وآثار الاستخدام اللي عليه
    وكنت ناوي أنزل موضوع
    لكنه بعد التهديد رد شل تلفزيونه ورد لي فلوسي
    وأتمنى فعلاً من الإدارة إنها تتخذ إجراء ضد هالأعضاء أصحاب الإعلانات المخادعة
    اللي يبيعون سلع مستعملة على انها جديدة
    لا … وبأقل من سعر المصنع

Comments are closed.