تحيدون؟؟

تحيدون؟؟

مساكم الله بالنور و السرووووووووور

و انا يالسه بحالي و لحالي ..شدني الشووووووووق و ذكرته

ماضينا الجميل

تحيدووووووووووون الظاهرات اللي انقرضت

ايام الطفوله الجميله

1. كل جمعه البتان يطيرون نواويم على شارع دبي الشارجه << جمع نوام الا و هو طائره ورقيه

2. اسكريم الحليب اللي ورقته من برع اصفر و بيج..مممممممم كان لذيذ و اسكريم البيبسي بعد احمر و فضي

3. نظهر من المدرسه نلقى راع الهمبا الاخضر يبيع برع..بالاضافه الى جميع انواع النخي و الحب لووول

4. كل خميس فلم هندي على دبي الانجليزيه << جانل 33 لووول

5. مسلسل مايكل نايت و سيارته العجيبه اللي ترمس…اووووووه الزعامه..من نشوف سياره سبوورت طاعوووو سيارة مايكل نايت << يعرضونه على ام بي سي اكشن للي يحب يعيد ذكريات طفولته

6. المذيعات في تلفزيون بوظبي بشيلهن ..تلقاها مسويه كشه هالكبر و معلقه شيله ساري رفيعه << على الاقل احسن عن الحين

7. ماشي غير الاتاري و لعبة طرزان << بس عند عيال العز لوووووووول

8. ايام الرسوم بس كل يوم ساعه ..يحطون الرسوم الساعه اربع و مااااشي و لا ياهل في الفريج هاييج الحزه..الا جونكر و الرجل الحديدي…و يخلص الرسوم و طبعا متأثرين الحبايب ننش نتصافع و نتكافخ..لين تروغنا الوالده برع << الحين الرسوم 24 ساعه

9. هييييييييييه ايام الفريج الجديمه و ما نعترف بالنعووول و لا بالزنانيب ..ما نخلي لا سكه و لا فريج << الحين ماشي يهال يلعبون في الفرجان<< ده كان زمان

10. العاب اول..الحويم و الكوووك و صايح << ماظن حد من عيال هالزمن يعرف شو هاييل حتى << راكضنا و تدبغنا و تصلخنا من على اليدرات في سبيل هالالعاب << يهال الحين حدهم بلاي ستيشن

و شاركوووني جان عندكم زيادات