بسم الله الرحمن الرحيم
جماعة انا يالس اكتب هالموضوع من القهر اللي فيني ، وحبيت أراويكم مدى اهمال بعض الموظفين المعنيين ، يا جماعة اليوم التاريخ 17 – 5-2009 شفت موقف صار جدامي ومحد خبرني عنه شفته بعيني ، ما بطول عليكم ، كنت ساير شيشة البترول وشفت ريال من الجنسية الآسيوية ميود قفص فيران ، و واقف عالشارع ، المهم الريال يود قص الفيران وحطه عالارض طلعت الفيران من القفص، الريال يبا يتخلص من الفيران فراح عقهن عالشارع الرئيسي ويا ريتهن فيران ميتة لا فيران حية وحتى هم مب فيران هم برصان وكل واحد فيهم أكبر عن كف إيدي بووووايد ، تخيلوا يعق برصان مب ميتات عالشارع الرئيس الصبح ؟ تخيلوا المنظر ؟ المهم أنا وقفت موتري ونزلت في نص الشارع من قهري وغيرتي على نظافة الإمارات ، وقلتله انت شو اتسوي؟ ما عرف يرد وقام يتمتم، المهم انا سرت ابركن موتري عسب إني اتسببت بزحمة وراي ، ويوم رديت ما حصلت الريال ، دورته وبعد من دون فايدة اتصلت عالبلدية ، قلتلهم الموضوع كذا كذا كذا قالولي انزين وين الريال قلتلهم ما لااعرف بس شفته طالع من بناية ودليتهم مكانها قالولي عطنا رقمك ونحن بنتصرف ، قلت اوكي عطيتهم رقمي وسكروا ن المهم أنا من القهر تميت أفتر أدور الريال الآسيوي بالسيارة وتميت احاوط أحاوط لين حصلته ، رديت اتصلت عالبلدية ، قلتلهم حصلت الريال تعالوا اتصرفوا وياه قالولي ما عليك دقايق وبنتصلك ، ومحد إتصل وتميت أتريا عقب أدق عليهم ما قاموا يردون علي ، آخر شي إتصلت على ربيعي خبرته السالفه لأن أخوه يدوام في البلدية اخوه عقبها اتصرف وطرشلي جماعة يشوفوا الموضوع ، أنا اللي بغيت أعلق عليه في هالمضوع شيئين ، واللي هم :
1_ تقصير البلدية يعني عسب اييون يشوفون السالفة ويرمسون الريال دورت واسطة .
2 – وصاخة هالآسيوي وعدم إحترامه للمكان الي عايش فيه ، هو ما يضر نفسه بس هو يضر المجتمع كامل ، هاي البرصان والفيران اتسبب في أمراض خطيرة مثل الطاعون وغيره ،هالإنسان ما خاف ربه يوم فرهم عالشارع الرئيسي؟؟ ويوم فرهن ما خاف من الناس اللي اتشوفه؟ يعني هو ما عبر أي حد ؟ اكيد عيل حس إن في تساهل من بعض الجهات المعنية ، لو كان ارتعد من البداية وحصل التصويب والشي اللي يردعه علطول ما كان سوى هالشي من غير خوف، اتعرفون حتى يوم أقوله خبرت البلدية يجاوبني بأسلوب استهزائي ويقولي (أوكيه) بس باسلوب استهزاء وعدم مبالاة.
شو رايكم في هالشي ؟؟ وشو رايكم شو هي الاسباب اللي اتخلي هالإنسان يسوي هالشي من غير مبالاة ولا إهتمام؟ وشو رايكم بتصرف البلدية اللي ما ردوا اتصلوا ولا قاموا يردون علي؟
وعلفكرة في موضوع ثاني عقب بخبركم إياه إنتظروني
أتريا ردودكم
اي غلط يسوونه عـ طول يتسفّرون بلاا رجعه
يعني تحملنا زحمتهم و منافستهم لخيرات البلاد ..
بس شو يجبرنا نتحمل وصاختهم و جرائمهم .؟
و في النهايه .. ما يصح إلا الصحيح يا نآس ..
الله يعين ولا حول ولا قوة إلا بالله ومشكورين على تفاعلكم وغيرتكم على بلدكم ، فعلاً شي يقهر ولازم البلدية اتشدد على هاييل الآسيوين واتوزع عليهم أوراق وكتيبات يبلغونهم فيها القوانين والأنظمة والمخالفات ولازم اتكون المخالفات رداعة ، انت اتعرفون يوم يوني موظفين البلدية خذو الريال وياهم كسر خاطري يوم ربكوه الموتر ، لكني قلت في خاطري لو ودروه وما خالفوه يمكن ما يعتبر والشي اللي سواه ما كان شوية ، فقلت خله عبرة لمن لم يعتبر ، أكيد هو بيخبر ربعه انه اتخالف وربعه بيخبرون ربعهم عن هالشي وبيخافون يسوون هالأشياء، أنا غمضني عسب هو أصلا بتحصل معاشه ضعيف ما بيطوف يمكن 1500 درهم لكني قلت لازم يعرف إنه هالشي غلط ومب أي غلط ، هذا يتسبب للمجتمع كله بضرر ، يعني ما ضر نفسه وضرني أنا بس عسب أقدر أسامحه ، لا هذا ضر المجتمع كله فأنا ما كنت أروم أسامحه وأمثل إسم كل المجتمع
لا حول ولا قوه والله شي يقهر وخاصه انك شايف الشي جدامك وتتصل في المعنيين ولا يسون سالفه والله قهر الله يعينك يا خوي
هم متعودين عالوصاخة فبلادهم يعني طبيعي نتوقع منهم هالتصرفات !!!
بس زين أنك بلغت عليه عشان يتأدب ويكون عبرة لغيرة.
كلامك صحيح 100%
و في تقصير واضح من البلدية …
حق الوظايف عندهم لازم واسطة ومشيناها
بعد علشان مخالفة قذرة صارت فالشارع بعد لازم يدور الواحد واسطة علشان اييبهم …
بصراحه مهزلة
خاطري اتشحططهم وماتسكت عنهم واتشوف منو هذا اللي اتجاهل الموضوع وما رد
انا منقهرة من الاسيوي من صوب ومن البلدية وهذا اللي اتجاهل الامر ومارد من صوب ثاني
هذي الرقابه لازم اتكون من البلدية مب من الناس
يحمدون ربهم بعد انه في حد شاف الموضوع وخبر
تفاااااااااااااااااااااهه