بسم الله الرحمن الرحيم
جماعة انا يالس اكتب هالموضوع من القهر اللي فيني ، وحبيت أراويكم مدى اهمال بعض الموظفين المعنيين ، يا جماعة اليوم التاريخ 17 – 5-2009 شفت موقف صار جدامي ومحد خبرني عنه شفته بعيني ، ما بطول عليكم ، كنت ساير شيشة البترول وشفت ريال من الجنسية الآسيوية ميود قفص فيران ، و واقف عالشارع ، المهم الريال يود قص الفيران وحطه عالارض طلعت الفيران من القفص، الريال يبا يتخلص من الفيران فراح عقهن عالشارع الرئيسي ويا ريتهن فيران ميتة لا فيران حية وحتى هم مب فيران هم برصان وكل واحد فيهم أكبر عن كف إيدي بووووايد ، تخيلوا يعق برصان مب ميتات عالشارع الرئيس الصبح ؟ تخيلوا المنظر ؟ المهم أنا وقفت موتري ونزلت في نص الشارع من قهري وغيرتي على نظافة الإمارات ، وقلتله انت شو اتسوي؟ ما عرف يرد وقام يتمتم، المهم انا سرت ابركن موتري عسب إني اتسببت بزحمة وراي ، ويوم رديت ما حصلت الريال ، دورته وبعد من دون فايدة اتصلت عالبلدية ، قلتلهم الموضوع كذا كذا كذا قالولي انزين وين الريال قلتلهم ما لااعرف بس شفته طالع من بناية ودليتهم مكانها قالولي عطنا رقمك ونحن بنتصرف ، قلت اوكي عطيتهم رقمي وسكروا ن المهم أنا من القهر تميت أفتر أدور الريال الآسيوي بالسيارة وتميت احاوط أحاوط لين حصلته ، رديت اتصلت عالبلدية ، قلتلهم حصلت الريال تعالوا اتصرفوا وياه قالولي ما عليك دقايق وبنتصلك ، ومحد إتصل وتميت أتريا عقب أدق عليهم ما قاموا يردون علي ، آخر شي إتصلت على ربيعي خبرته السالفه لأن أخوه يدوام في البلدية اخوه عقبها اتصرف وطرشلي جماعة يشوفوا الموضوع ، أنا اللي بغيت أعلق عليه في هالمضوع شيئين ، واللي هم :
1_ تقصير البلدية يعني عسب اييون يشوفون السالفة ويرمسون الريال دورت واسطة .
2 – وصاخة هالآسيوي وعدم إحترامه للمكان الي عايش فيه ، هو ما يضر نفسه بس هو يضر المجتمع كامل ، هاي البرصان والفيران اتسبب في أمراض خطيرة مثل الطاعون وغيره ،هالإنسان ما خاف ربه يوم فرهم عالشارع الرئيسي؟؟ ويوم فرهن ما خاف من الناس اللي اتشوفه؟ يعني هو ما عبر أي حد ؟ اكيد عيل حس إن في تساهل من بعض الجهات المعنية ، لو كان ارتعد من البداية وحصل التصويب والشي اللي يردعه علطول ما كان سوى هالشي من غير خوف، اتعرفون حتى يوم أقوله خبرت البلدية يجاوبني بأسلوب استهزائي ويقولي (أوكيه) بس باسلوب استهزاء وعدم مبالاة.
شو رايكم في هالشي ؟؟ وشو رايكم شو هي الاسباب اللي اتخلي هالإنسان يسوي هالشي من غير مبالاة ولا إهتمام؟ وشو رايكم بتصرف البلدية اللي ما ردوا اتصلوا ولا قاموا يردون علي؟
وعلفكرة في موضوع ثاني عقب بخبركم إياه إنتظروني
أتريا ردودكم
المفروض تأخذ رقمة بدال مااتم ادورة يسار ويمين عشان يسهل البلاغ ،، بس يوم زخيتة بعد زين ياعاشق تراب الامارت وكفيت ووفيت وجزاك الله خير وهذا الموقف مايأخذة الا الرجال الا شراتك ومشكور وماقصرت اخي الكريم ،،
نفس كلام الوالد الله يطولي بعمره
كل ما انقهر منهم واقول مازرين بلادنا
يقول منو بيشتغل فالدكاكين ويبني البيوت وغيره
الله المستعان
__________________
لو انا منك بتصل بالشرطه
الله العالم شو من الامراض فيها
المشكلة ياخوي الوافدين هم اللي بنون البيوت ويشتغلون في الدكاكين والمحلات بكل أنواعها وهم اللي يشتغلون في الكافتريات وغيره ، وهالشغل ما يناسبنا فنحن بعد محتاجينهم ويمكن انكون نحن محتاجينهم أكثر من حاجتهم هم لنا، لكن لازم يكون في توعيه لهم ، نحن مب في بلادهم لازم ياخذون دورات في النظافة ودورات في الإهتمام بالفس ولازم تتوزع عليهم كتيبات وأوراق مكتوب يرشدونهم فيها للنظافة ويسوون لهم إعلانات على إذاعاتهم وقنواتهم وبلغتهم الأصلية عسب ما يكون لهم حجة
__________________