بعضها مرت عليكم وبعضها شفتوها على غيركم بس حسيتوا بطعمها ياسلام على ذيك الايااااااااااااااااااااااااااااام
——————————————————————————–
تذكرون.. يوم إيّيك واحد ماصخ من العايلة أكبر منك ويقول لك: تبا أرسم لك ساعة وانته تمد له إيدك ويعضّك هذيك العضة اللي تصارخ منها .
وبعضهم ايكون ارحم ويشخبط صورة ساعة بالقلم الحبر
تذكرون.. يوم كنا نصوّر فوري عند مصوّر الجمعية وطبعاً غصباً عليك الخلفية زرقاء مب بكيفك ولازم تمشط شعرك بالمشط اللي عنده.. كله شعر.. وبعدين يغسل لك الصورة بالآلة اللي عنده أم ذراع والأطراف مشرشرة ويعطيك الصور بعد أسبوع.
تذكرون.. أول يوم دوام بالمدرسة كانوا يسلمونا الكتب كلهم مع بعض وصافينهم من الكبير إلى الصغير وطبعاً الكبير كتاب العلوم وكانوا يربطونهم بحبل عشان ما يطيحون مع 6 دفاتر مجاناً.
تذكرون.. المعجون الصغير اللي ريحته تعوّر الراس ووياه عود لونه احمر وكنا نبطله بالمجلوب ونعصره ونلف العود عليه وننفخ عشان نسوي نفافيخ وطبعا ما تطلع النفاخة لين تطلع بلاعيمك وياها.
تذكرون.. يوم كنّا نشوف افتح يا سمسم ونتأثر بكعكي اللي ياكل بسكوت ونشتري بسكوت كاكاو ونتم ناكل مثله ويا البسكوت المالح.
تذكرون.. يوم الجمعة … نقوم من الصبح على شان نسمع أغنية في قصص الشعوب قصائص لا تنتهي
وعالم حلو بهي يسكن في القلوب في قصص الشعوب .
تذكرون.. تيلفون بوقرص اللي يتعب صبوعك وانته تتصل ويا ويلك يطلع الرقم مشغول لأنه ما فيه ريدايل.
تذكرون.. يوم كنا نربط الشرشف على رقابنا مثل سوبرمان ونصعد فوق الكبت وانط على الدواشق وآخر شي ناقز غلط ومنكسرة إيدك.
تذكرون.. يوم كنا نحط بالفريزر العصير الطويل بو نصين او لبن اب عشان يثلج وكل ما تسير تبغي تاخذه تلقى الوالدة منزلتنه تحت وما ثلّج.. يا حسرة راحت الفرحة.
تذكرون.. يوم كانوا الأولاد يغسلون الحوش بالبروش والصابون قمة الوناسة.. يمسك البروش أونّه بيساعد وآخر شي طايح له سكيتنج على الكاشي أوالزولية وفي الليل وارمة ريله.
تذكرون.. يوم كنا نودع و نستقبل الحجاج من زود الفرحة واللهفة على الصوغة وآخر شي كم مسواك وطاقيتين والكاميرا الحمراء وسيادة وللبنات سلسله تسود عقب العرق أو ساعة بلاستيك.
تذكرون.. يوم كنا نشوف مسرحيات الأطفال مثل السندباد والزرزور وألف باء تاء اللي فيها عبدالرحمن العقل ويوم الحرامي يكون وراه.. نصرخ من قمة راسنا: ورااااااك وراااااااك وهو يقول وينه وينه يميييييين يميييييين….
ياعيني على الاستهبال .
تذكرون.. عزايم قبل والسفرة المفروشة على كبر الصالة اللي على صورة (فواكه) وريحتها لازم مثل ريحة المطبخ وجالسين على الزولية اللي يوم تقوم تلقى ريلك كلها شخوط من الزولية.
تذكرون.. أيام الدراسة قبل يعني يكون بنشد حيلنا بالدراسة ونشتري قلم فسفوري أصفر وإلاّ برتقالي عشان نظلل على الشي المهم وآخر شي مظللين على كل الكتاب.. وين الشي المهم؟؟ ما أدري!!!!
تذكرون.. أول ما يسرقون الأولاد سيارة أبوهم كانت الريل اليمين على البترول والريل اليسار على البريك من الثوارة …. ولازم طبعاً يمر على الربع في الفريج يصيّح ويلات عليهم….ويعطيه بريك وبترول
تذكرون.. يوم كانت جائزة البيبسي سيارة في غطاة الغرشة كنا الظهر نسير وراء الدكان ونبطل الغراش كلها وبعدين نرد نسكرهم أي كلام تشوف الغازات كلها طايرة ومتبخرة ومستوي البيبسي ماي .
تذكرون.. يوم يقول الأستاذ أو المعلمة ان هذي الصفحات ملغية
تعال شوف الشخابيط اللي على الصفحة من فوق لين تحت وإلاّ نطرها من الكتاب…..ليش هالحقد عاد؟
تذكرون.. يوم نتضارب مع ولد الييران وتقول له: خوز عن بيتنا وعن رصيفنا..
يقول لك: مب رصيفكم هذا رصيف الحكومة
كلام منطقي, ويتم يحوس جدام البيت ويمر جدام ويقول لك ما جستك ما جستك.
تذكرون.. يوم يسيرون الأولاد السوق ويّا أبوهم يشتري لهم قطع كنادير للعيد ..وآخر شي شاري طاقة كاملة نفس اللون وتشوفهم بأول يوم العيد من الوالد لين الأخو الصغير نفس لون لابسينه كلهم تقول فرقة عيالة.
تذكرون.. يوم يبغون الشباب يشلون حديد قبل يترسون قواطي النيدو اسمنت ويحطون بينهم بيب حديد وهووووووووب وآخر شي منكسرة ظهورهم.
تذكرون…يوم نجسف الدواشق ونسويهم خيم…أو ناخذ التكي
ونسويهم بيوت.
واللي ما سوى شي من المذكور فوق بيكون من عيال وجيل ماكدونالدز و هارديز و ايد هاردي..
فاتتكم هاذيك الأيام
عيال هالأيام تلقاه عايش مرحلة وحده بس ألا وهي مرحة الكبار سيارة وموبايل و حواطه في المولات. ماشاف لا رسوم ولا لعب واهوه صغير..
أول ما يفتح التلفزيون تلقاه يطالع هيفا ونانسي وروبي
وعلى أيامنا قصص عالمية و برامج دينية ومحمد عبدو يغني ليلة خميس
وجابر جاسم يغني غزيل فله
وبالخير يغني يا علاية لووووووول
والظهر مراكيض الهجن والله أيام
وألحين الصغار يطالعون ويسمعون دقنيييييييييييي هههههههه
للأسف صار الجيل الجديد بلا هوية
أيام حلوة ليتني اعيشها مرة ثانية تسلم
والله احلى ايام بعمري .. ذكرتني بعد اذان العصر كل يهال الفريج يتيمعون جدام التلفزيون حق فترة الاطفال … طبعا بعد دعاية سلامتك خخ
أيام حلوة ليتني اعيشها مرة ثانية
في غير الزمان
في نفس المكان
مرتني الذكرى وانا واقف
في نفس المكان
في غير الزمان
*****
في ذا ضحكت أيام لكني بكيت
في ذا حلمت أحلام لكني صحيت
ومنها ابتديت
وفيها انتهيت
إلا من الذكرى
في نفس المكان
في غير الزمان
*****
قالت لي الذكرى كلام عني
كلام والله بغيت أنساه
وصاحت ربابه شوق واثر النغم مني
يشكي وانا شكواه
وغنى صوت في ليلة فرح
وهلت عين وقلب انجرح
في صوتها جرح وتعب
وفي عيونها نظرة عتب
وشفت ابتسامه عليها هلت الدمعه
ونظرة ملامه من الماضي على ربعه
وانا مع الذكرى
في نفس المكان
في غير الزمان
*****
تعطيني الذكرى ولا تاخذ أبد
تحكي لي الذكرى ولا تسمع لاحد
وانا عندي كلام ممنوع حتى عن الخاطر
لا ياخذه امسي ولا يقبله باكر
ما اقدر أوضح غايم الصوره
ولا أزود للمسا نوره
الله يا ذكرى ياما فهمتيني خطا
ياما قدم رجلي على جمرك وطا
واليوم هيضني هواي
أشكي ولا أدري وش بلاي
هو من شقاي اللي مضى
والا هناي
زانا مع الذكرى
في نفس المكان
في غير الزمان
الله على زمان اول
ايامنا ما كنا نشوف رسوم لانه ما عندنا تلفزيونات وبالاساس ما كانو يعرضون لا رسوم ولا مسلسلات
ساعتين في اليوم فلم هندي
تلفزيون واحد في الفريج ويشتغل على بطارية سيارة
عيال هالأيام تلقاه عايش مرحلة وحده بس ألا وهي مرحة الكبار سيارة وموبايل و حواطه في المولات. ماشاف لا رسوم ولا لعب واهوه صغير
فعلآ ياخي نحن طفولتنا كانت بريئه لا موبايلات ولا مولات ,,,,,,, كله لعب كوره ولا بالسياكل ولا البحر
والله كل ما يمر زمان نفتقد الزمان اللي قبله
تسلم أخوي