قام الواحد يكره يسوي خير في الناس يتعودون ويلصقون فيه لين ما الواحد يطفر من عمره
اسمعوا سالفتي ..
من اخلص الدوام أركب السيارة بروح البيت أشوف وحدة من الزميلات تتمشى ادور تكسي
غمضتني قلت مب حلوة أطوف جدامها وما أشلها وركبتها وصلتها مرة ومرتين وثلاث
الحرمة اتعودت شغلتني درويل عندها مع ان دربها غير عن دربي حتى قمت اتأخر مال نص ساعة عن البيت
مصختها… قبل ما يخلص الدوام أشوفها مرتزة في مكتبي واتقولي يلا حبيتي هوايا اتأخرنا ما خلصتي شغل
وانا عاد ويهي بويه المنتدى أقولها شوي مشغولة ومضغوطة وتعبانة من الشغل اللي ما يخلص
اترد عليه بكل برود ما عليه حبيتي بكره راح تكملينه الحين قومي انروح البيت نرتاح
وانا في خاطري بموت من الغصة قلت شو هالناس شو هالبلوة اللي الله بلاني فيها
والله قبل ما يخلص الدوام بربع ساعة تمسكني حالة هستيرية اتوتر واتصبب عرق يا انخش يا اطلع من وقت سوتلي فلم رعب الله يسامحها
اتفقت انا وزميلتي في المكتب ان قبل لا يخلص الدوام اندس في مكان واذا يت تسال عني اتقول لها ان عندي شغل وبطول والا في اجتماع حشى قمت العب صوير وياها
الصراحة انا ما عندي مانع أوصلها كل يوم بس لو كانت في دربي لكن هي دربها غير عن دربي
والواحد ما يصدق متى يخلص الدوام يرد البيت يرتاح
دخليكم فكوني منها قولولي شو اسوي وياها 
صح كلالامك الغالي وازييد لازم تصارحينها وتقوليلها اختي سامحيني ماقدر اوصلج تستويلي مشاكل فلبيت لاني كليوم اتاخر وهي بتفهم السالفه وبتستحي على ويها انتي بنت وحاسبي على نفسج
وعندي ملاحظه ثانيه بعد
وخصوصا للبنات
مب اي وحده كسرت خاطرج توصلينها حتى لو قالوا لج لوجه الله او اكسبي اجر
ترا مايندرى شو وراهن والدنيا مب مثل اول واهم شي للوحده سمعتها
انصحج لا توصلين اي بنت غريبه غير اهلج وربعج اللي واثقه فيهن
قولي لها الصر احة ، ان أهلك وخاصة الوالدة صارت تحاتي وتقلق عليكِ
لذلك اعتذري وقولي آسفة ما بقدر اوصلك مرة ثانية.
يمكن عندها ضروف ,, بس انتي هب مسؤوله عنها بعد
انا وصلت واحد من الدوام حصلته برى ماعنده سياره وقلتله اركب بوصلك ,, ودخلته زحمة الخالديه ووصلته البيت ويالله يالله لين ماضهرت ,, وبعدها بيومين يمر حتى السلام مايسلم
عادي الامور طيبه
شوفي يا اختي
انتي يوم توصلينها تكسبين اجر
فلا تحرمين نفسج هالاجر اذا كان عندج وقت توصلينها من حين للثاني
وعشان ما تحس انج متضايقة منها
خبريها انه عندج شغله او بتوصلين حد من اهلج مثل ما قالوا لج الاخوان والاخوات في الردود السابقة
وبعد كم يوم انتي خبريها انج بتوصلينها لانج فاضية اليوم
فبهالطريقة انتي كسبتيها وما زعلتيها
لان حتى هالنوع من الناس الي نقول عنهم ويههم لوح او ما يستحون او مدري شو
صدقيني عندهم مشاعر ويوم ينجرحون ينجرحون مثل باقي البشر
وكلمة من حد ممكن تجرحهم
تصرفاتهم مب معناه ويهه لوح
بس هي مسأله تعود ..
هالانسان تعود على هالتصرف بالتالي يشوفه عادي وبسيط
بعكس الناس الثانية الي تشوفه غلط