السلام عليكم ورحمة الله
طبعا كلنا فرحنا يوم زادوا رواتبنا 
بس يافرحة ماتمت 
من جهة يرفعون رواتبنا ومن جهة الاسعار ترتفع 
يعني اللي يعتمد على الراتب ماتمشي اموره الى نهاية الشهر 
شو رايكم تخبرونا كيف تصرفون رواتبكم 
يعني في الشهر كم تصرفون :
للإحتياجات الضرورية ؟؟ 
للكماليات مثل السيارة والعطورات ؟؟ 
لإيجار السكن ؟؟ 
وكم تجمعون وتخلون في البنك ؟؟ 
وكم تستثمرون في الاسهم او التجارة بشكل عام ؟؟ 
وشو تنصحونا لإدارة رواتبنا و استثمار فلوووسنا 
ملاحظة : يمكن الآراء تختلف ، صرفية العزوبي مب مثل صرفية المتزوجين 
الحرمة تقول له ييب لي ولا … 
يامرحبا بإسكيب لايف
ان شاء الله تحصلين وظيفة وتسوين لنا عزيييييمة 
تصدقين ، قبلما اشتغل كنت اصرف على عمري اكثر من الحين !!
احس كلما زادت البيزات زاد الطمع
مانسميه طمع بس ما ادري ليش نمسك فلوسنا ونريدها تكون في البنك وكل شهر نشوفها زادت وزادت ونحن نبخل على اعمارنا ؟؟!!!
اهم شي يوم تشتغلين ما اوصيج مب تاخذي سيارة فارهة وغالية !! لاتبدئي حياتج بديون وانتي مب محتاجة
خذي سيارة معقولة وحليييوة ولكجري لكن لاتبالغي اوكي
بالتوفيق لج اختي ^ـــــ^
بما اني من فترة قريبة كنت عزابي والحين دخلت قفص المتزوجين
لازم اوجه نصيحة للعزابية عشان مانخلي الشباب يدخلون في قروض :
يوم تكون عزابي مايكون عندك مسؤوليات غير نفسك ، فتصرف وماتقصر على نفسك في اي صغيرة ولا كبيرة
لكن موضوع الزواج موضوع مهم لكل عزابي
فلازم نعرف كيف ننظم حياتنا للإستعداد لهذه المرحلة المهمة من الحياة
معروف ان الزواج يحتاج ميزانية مب اشوي
من مهر الى سكن الى حفلة الزواج
فلازم الريال يحط له هدف ويسأل نفسه متى راح اتزوج ؟؟
وبناءا عليه يحاول يوفر مبلغ محدد لهذا الموضوع + يبدأ في ترتيب المواضيع المرافقة للزواج واهم شي موضوع السكن
فمثلا يبدأ تعديل غرفة الزوجية ،، او يبدأ ببناء ملحقه الخاص ..
يعني لازم الحين كل عزوبي يفكر متى راح يتزوج ويبدأ يخفف من مصاريفه الخاصة ويبدأ يجمع عشان لمن يوصل لمرحلة الملجة والاستعدادات ليوم العرس يلاقي نفسه قادر يشيل نفسه بنفسه ومايكون محتاج للديون او القروض
وشعارنا
زواج بلا ديوووووووووون
يووم اداوم بقوولكم كيف اصرف رااتبي
بس البيزات اللي توصلني على طول تنصرف اول بأول
ماخلي حق عمري قاصر
لووو اشتغلت اول شي بسويه باخذ مووتر والباقي على الله
هلا وغلا بالمستثمر الكبير باشووو
خلاص نحن لازم نعطيك لقب كبير المستثمرين 
بخصوص الفيزا كارد ،، هذي نقطة مهمة زين تطرقت لها
خلنا نتكلم اشوي عن الفيزا ونعرف مزاياها وعيوبها
الفيزا شي مفيد بس لازم نعرف كيف نستعملها
ومعلومة : ترى البنك يخسر من اللي يستعمل الفيزا بطريقة صحيحة
ويستفيد من الاستخدام الخاطئ للفيزا
فكرة الفيزا انك تقدر تطلبها بدون رسوم
ويوم تستخدمها تحصل عروض وخصومات وتسهيلات كثيييييييرة
ولكن لازم على العميل انه يسدد مستحقات الفيزا اول بأول
هنا مربط الفرس ( حلوة مربط الفرس هذي ) ،، الذكي هو اللي يستعمل الفيزا طول الشهر ويستفيد من الخصومات والعروض ، ولكن وقت استحقاق البطاقة يدفع المبلغ كامل
ومرة ثانية بداية الشهر يحرق البطاقة حراااق
بهالطريقة بيكون استفاد من الخدمات والعروض ونفس الوقت ماخسر شر ..
الطريقة الخاطئة في الاستعمال وهي الطريقة التي يستفيد منها البنك هي :
انك تستعمل الفيزا وتجي على نهاية الشهر تشوف كشف الحساب وتقول خلني ادفع المينيموم
يوم ندفع المينيموم يقوم البنك ويضيف شارش ورسوم مالها اول ولا اخر ..
وشهر ورى شهر تلاقي نفسك تدفع وتدفع وما ينقص شي من اصل مبلغ الفيزا !!!!!
فنصيحة : استخدموا بطاقات الفيزا ولكن لا تتكاسلوا وتقولوا بندفع المينيموم ،، ادفع المستحقات كاملة شهر بشهر
ولا تستخدم الفيزا استخدام عشوائي ، يعني راتبك 5,000 وعندك فيزا 50,000 تقوم وتشتري وتشتري وآخر الشهر تلاقي نفسك متراكم عليك مبلغ كبير !!!! استعمل بحيث انك تقدر تدفع المبلغ كامل نهاية الشهر
اقول باشو
برجع اتناقش معاك في باقي موضوعك 