السلام عليكم
شباب بسألكم عن تلوين السياره فيه عدة أنواع شي عازل أسود وزيرو زيرو وشي سلفر وفيه أسود عااادي قوم بوعبود والاسعار العادي يمكن 200 درهم والعازل من 700 الى 2700
الحين قولولي شو أركب صدقهم هذولاء الي يقولون عازل ولا يضحكون عليها وياخذون فليساتنا 
نركب قوم بوعبود ولا نركب لمسات وحركات 4 أم مدري ضب
الرجاء اعطاء وجهة نظركم
45 thoughts on “تلوين زجاج السيارة ؟؟”
Comments are closed.
السلام عليكم
انا عندي سياره الجلد فيها اسود
مركب على السياره عازل حراري زيرو زيرو على كل الجامات
وبعدين فوقه مخفي 50 % على كل الجامات ما عدى الجامه الاماميه
واشوفه الصراحه مسوي شغل ويوم اركب السياره ما تكونين فيها ذيج الحراره
وهالمخفي مركبنه عند في كول و
الصراحه اشوفه سوى شغل احسن عن غيره
لاني قبل ركبت عند كذى محل من ربع في كول
بس ما شي حمايه من حرارة الشمس
اخذي فواتير المخفي ودفعيها الوكالة
أنا ما أعرف عن محل بوعبود هذا ولا سمعت عنه!!!
سويت على سيارتي ب250 ومانفع كان حار وايد وإيديني إستون سود من السواقه في الشمس والمكيف ما يبرد. بعدين سويت في محل ثاني عند إيراني ودفعت 700 ونفس الشي بالظبط حر وشمس والمكيف ما تحس إنه يشتغل. وبعدين سويته ب1200 في محل ثالث مع ظمان سنتين وضد الخدش وبعد نفس الشي حار والشمس لاهوب والمكيف كأنه دفايه وتمن الدرايش ما ينفتحن بسرعه ولا يتسكرن بسرعه وبعد فتره إستوى فيهن خطووط في النص ولما رجعت المحل قالي المرسيدس لازم يسوي جي!!
بعدين دلتني ربيعتي على محل ينتهي إسمه ب…اااات وأكيد تعرفونه وحلف لي أيمان بأنه مظمون وما بشوف الحراره أبدا ودفعني 2700 ولا نفعني بشي والحال تم مثل ما هو حر والشمس تذبح والمكيف ما يبرد.
أخيرا عصبت وقلت يا أنا يا الشمس والحراره وجان أروح Vcool وأدفع 4600 وأركب أفضل نوع عندهم وتتوقعون شو النتيجه؟؟ طبعا نفس الشي حر وشمس لاهوب ومكيف ما يبرد!!!
سرت الوكاله EMC وسألتهم شو أسوي نصحوني أركب عندهم نوع إسمه “بنتاجون” وركبته ب5000 درهم. ونفس النتيجه حر وشمس والمكيف ما تحس إنه يبرد!!! بس بصراحه كان واظح وايد بالليل لي وغامج وايد من بره كيف لا تسألوني؟؟يمكن نوعه جي!!!
رجعت الوكاله EMC قلت لهم السالفه وكيف إني دفعت هالكثر وما فاد وإن تكيف سيارتهم تعيس وحار رغم إن السياره باب واحد وجديده، وراح معاني التكنيشن على قولتهم وتعبث في المكيف جان يظبطه والحين 100%. خسرت كل هذي المخاسير وطلع من المكيف كان معلق يطلع معظم الهوى عالجامه الي جدام وشوي بس من الهوى حق السايق بس دون الي عداله. هاي مرسيدس وجي وهي يديده من الوكاله.
عالعموم محد يظحك علي لو سمحتوا!!!! والخلاصه إني لين الحين ما عرفت أي مخفي أحسن وأفضل؟!!
بس مشكلة الحر إنتهت. وآسفه طولت بس كان لازم أشرح ولا بموت من الغصه!!!
مشرفنا
ضمان 8 سنوات …والموتر حده سنتين
يعني الوقت اللي ابيع الموتر فيه بحسب قيمة المخفي والا بشيله قبل لا يستلمها راعيها اليديد ( لعانه)
اخوي انت اذا متاكد ان الموتر بطول معاك ممكن تفكر في الاشياء الغاليه ..وبيني وبينك جماعه الفي كوول مزودينها باسعارهم … ترى ورق جلاد في النهايه
أنا ركبت عند 3m اللي في ابن بطوطة …
شغلهم مرتب والرؤية واضحة جدا من داخل …
كلف 850 درهم, يقولون 50% يعزل الحرارة …
وأنا أقول لو تغطي السيارة بطربال ما شي فايدة …
خلاص الحر واستوى اكسجين عندنا …
ركب شي مضمون عسب لا تتلعوز كل شهرين
وأهم شي تشوف زين لانه سلامتك انت واللي معاك أهم من كللللللللل شي ….