توم أند جيري ….. ذكرياتي العزيزة…..وطفولتي

البارحة كنت جالس أنا وربيعي من أيام الفريج الحبيب قام وذكرني بالرسوم المتحركة توم أند جيري وكيف كنا نتريا الساعة 4 (أيام يصكرون التلفزيون الظهر وما عندك غير شاشة جلفاكس تابع المشاهدة) على الساعة 4 القرآن الكريم وبعدين الشيخ الداعوق (الله يرحمه) اللي كنت أحبه لأنه ما يطول وبعدين يحطون توم أند جيري 30 دقيقة….. وشوف عادة أحلى أستهبال … وهذي كانت بعض من أحلى الحلقات عندي:

1- يوم ولد عم جيري الكاوبوي يوصل وكل ساعة يأخذ شنب جيري حق الجيتار ماله.
2- يوم جيري يضرب توم على رأسه ويتحول توم الى فار.
3- يوم جيري يدافع عن البطة الصفراء الكتكوتة اللي ما تروم تطير.
4- يوم جيري يسوي عمره دونجوان وكازانوفا ويغازل القطوة ويخلي توم هدية حق القطوة الحلوة
5- أغرب الحلقات عن الموت يوم الكلب الاحمر يعطي فرصة حق توم علشان يكفر عن ذنوبه ويا جيري….الحبر يخلص…. شو أتغايظ….شو كانوا يراوونا ونحن صغار!
6- يوم الكلاب الثلاثة الصغار يلعوزون توم وجيري وبعدين يحصلون ضرب عدل من منهم.
7- يوم توم وجيري يستخدمون سائل سحري يساعد على الاختفاء.
8- يوم جيري وولد أخته الصغير يتكلمون فرنسي ويلبسون لبس مال أيام أول ويتضاربون مع توم على مائدة الطعام
ووايد حلقات ما بقدر أوصفها كلها…. أحلى شئ الدياي اللي يأكلونه شو شكله لذيذ…. ولا الستيك الدائري….. ولا صحن الحليب اللي يمصونه توم وجيري بالمصاصة….وأحلى أحلى شي الموسيقى التصويرية اللي تسمعها تجاري حركة توم وجيري….
يا ترى شو من حركات جيلنا فيها من توم وجيري؟

بعدين خربوا الموضوع كله سوواو توم وجيري كيدز…دمهم ثقيل…يتكلمون

ما بنسى الرسوم النتحركة الباقية: غريندايزر…جونكر منو بيغلب لو أتضاربوا..تتذكرون هالسؤال… ساسوكي…..سندباد……أحلى شيء في السندباد أول شي يوم يحطون كلمة بسم الله الرحمن الرحيم…ببيرو ….. جزيرة الكنز……..

منو يزيدنا