اليوم بكلمكم عن موضوع كــنت دايما الاحظه ونـاوي اني اكتب عنه لكـن ما سمحــت لي الفرصه ..
وانا اتصفــح المنتدى دخلت على موضوع المواطن اللي كـان مسكــن متسللين عنده في بني ياس .. ليــن الحين ما كانت عندي اي مشكلة وانا اقرى الموضوع .. مواطن خـالف القانون والقانون أخذ مجراه وتــم الحكــم عليــه ومعاقبته
هذا رابط الموضوع
لكــن الطــامة الكبــرى والشــي اللي خلا اعصابي تفور .. يوم اني شفت نــاس يعتبرون من مواطنين الـدولة يذكــرون الآخرين بأحدى الفئات الثلاث هذي ( يمني او ايراني او عمـاني ) وكأن كلمــة مــواطن انلغت من معجمهم.
انا بس عندي ســؤال للفئه هذي .. انتو ما تؤمنون بشي اسمه وطــن وجنسيــة ؟؟ اذا تؤمنون بهالشي على اي اساس كــل واحد منكم يزقر الثاني باحدى هالمسميات الثــلات ..وكـان مواطنين دولة الامارات انحصرو في الفئات الثلاث هذي ..
خــلاص المفروض تنســون الفئات هذي .. مهما كـان انتماءك السـابق .. حــاليا انته اماراتي .. سواء كــنت من اهل الامارات القدماء او المجنسين .
انتو في منتدى تتصفحه فئات من جميع انحاء الوطن العــربي .. هل هذي هي الفكره اللي تبون توصلونها للناس عن شعب الامارات ؟؟
لا الحكومة ولا انحن نرضــى بالفكــره هـذي .. وكل واحد يحط في باله انه الامــارات مع انها جنســت العديد من ابناء الخليج العربي واليمن والجــزر .. لكــن الامارات لهــا اهلها اللي ما خلوها لا في الرخا ولا في الشدة
وبـعد ما بنسى الاشخـاص اللي كــل ما صــارت مشكله .. قال هذا مجنس وكــذا ..
وكــلامي للفئة هذي .. هذا مواطن غصبن عنك .. وفي يوم من الايام ممكن يكون في موقع اعلى من موقعك ويخدم بلده اكثــر منك .. ودام انه الدولة أمنته على الجنسيـة فالدولة اعلم منك بشئونها.
وسامحوني اذا كــنت قاسي شوي ف كــلامي .. رمسة في خاطري من زمان وظهرتها
وبيض الله ويوهكم على سعة الصدر
أتمنى من الإدارة أن تقوم بحذف الموضوع السابق
لتفادي مزيد من المشكلات
وخصوصا بعض الأعضاء، رأيتهم في هذاك الموضوع وهم يتلذذون بالإصطياد بالماء العكر.
تسلم اخويه ع الموضوع
مايدرون بأن هولاء الاشخاص بأنهم قنابل موقوته 
طبعا ليس كلهم نحن مانقول شي هولاء أخوان إعزاز حشام ولكن ليس نحطهم عندنا في البيت وهم مخالفين لقوانيين الهجرة … الموضوع يطول ويتشعب 
هناك نوعين للمواطن بإكتساب الجنسية وكلكم تعرفون طبعا
مواطن بحكم القانون
مواطن بحكم التجنس ولا أريد أن أدخل في جنسيات اللسته تطول …….
طبعا نرجع لموضوع المواطن الي حكموا عليه وعاقبوا طبعا الدوله أدرى بقوانينها مالنا نخوض في أمر أكبر منا
بطبيعة أهل الامارات وكرمهم والقيم الطيبه التي غرسها فينا أجدادنا ولله الحمد والخير الي أنعم بها هذه البلاد وبفضل من الله و الشيخ زايد الله يرحمه ويغمد روحه الجنه ويبارك في عياله والمجلس الاتحادي كلهم ماقصروا في رفعة شعب الامارات
يوم تقول هذا أيراني ولا يمني ولا فلسطيني قال يا حليله هذا متربي مع عيالنا ونعرفه من زمان
جزاك الله خير على هذا الطرح…اؤيد كلامك
اشكرك على موضوعك الرائع
فعلا نحن نعاني من هالشي في الامارات