السلام عليكم…
اخواني و خواتي انا طالبة المشورة و ان شاء الله انا بمشي ع رايكم و بسوي اللي تشورونبه عليه…
يا اخواني ذبحني بنك ربوي معروف اسمه بنك ال
ادفع ..ادفع ..ادفع ..ادفع ما يطيح شي من السلفة الا القللللللليل بالنسبة للقسط الضخم اللي ادفعه..كل ما اسألهم ليش جي اونه انتي يالسه تدفعين فوايد لان الجزء الاكبر يسير للفوايد…زين الين متتتتتتى ؟؟؟ انا ع هالحال صارلي اكثر من ثلاث سنين و القرض هو هو ما يتزعزع ثابت و اللي ادفعه ما اعرف وين يسير…
قلت بتوكل ع الله و بسير بوظبي الاسلامي مع اني عارفةبيطلبون مني فوايد بس شسوي خربانه خربانه و طبعا بالاسلامي اكيد بخلص قبل الربوي بس الصدمة يوم قالولي انهم يبون 150 الف ارباح…
الحين ما اعرف شو الشور..احس بعد حرام يصير علييه 150 الف زيادة 
ما اعرف ما اعرف ما اعرف اخاف اغامر و اتندم و اخاف اتم في هالبنك و اتندم…ابي شوركم بليييييز 
150 الف تطهير ان شاء الله وحولي ولا تترددي
مرحبا اختي ام علا ..
انا بعطيج من خبرتي في هالمجال و تجربتي المريره ..
اول شي انا اللي افهمه من الموضوع اللي طرحتيه ان المبلغ اللي خذيتيه هو كرديت كارد مب قرض و الدلـــيل انج قلتي ان كل ما تدفعين ياخذون الفوايد … لكن اذا كان قرض فإنتي اصلا عارفه اللي لج و اللي عليج بمعنى اخر القرض دفعاته ثابته شهريا ..
و اما عن تجربتي فأنا خذيت كريدت كارد من بنك .. طبعا ربوي بمبلغ 35 الف درهم و كنت اسدد لهم دفعات شهريه تبدأ من 1200 و تتجاوز في بعض الاحيان 4000 درهم طبعا دفعات ذبحتني و بعد سنه و نص من الدفع شيكت مع البنك عن المبلغ اللي باقي لي قالوا لي ان باقي 35000 يعني درهم واحد ما نقص .. طبعا انا انصدمت و كان بيغمى علي .. و حسيت باليأس لاني تقريبا دفعت ما يقارب 14000 درهم خلال سنه و ما نقص درهم واحد من قيمة الكردت كارد ..
الحل اللي سويته كالاتي :
سرت البنك و معاي الوصولات عن المبالغ اللي كنت ادفعها و سرت عند مدير قسم الكولكشن ( التحصيل ) وقلت له تراني دفعت كذا و كذا و ما صار شي و انا شكلي ما رح ادفع و اللي فيها فيها .. و قلت له تراني بفضحكم بالاعلام (يعني الجرايد و غيرها ) بصراحه من قلت له هالشي حسيت انه خاف لانه اهم عندهم سمــــعة البنك ..
و بصراحه سويتها ومادفعت لهم شهر ونص و تمت على راسهم لين ما حولوا الموضوع للشؤون القانونيه و حليت الموضوع ويادهم ودي بمعنى اخر سوينا شي اسمعه اعادة جدوله يعني حولت ال كريدت كارد الى قــرض و عطيتهم شيكات لمدة سنتين ، و بصراحه الحين صرت الحين كم اللي المبلغ اللي ادفعه شهريا و الحين ادفع 1500 درهم و خلصت تقريبا 10000 من المبلغ الاجمالي ..
باختصار من تجربتي .. خليهم في الامر الواقع و سوي اعادة جدوله و حولي الموضوع الى قــرض و عطيهم شيكات ..
و أخـــــيرا ما انصح بتحويل الموضوع الى بنك ابوظبي الاسلامي ( اللي يسمونه عندهم قرض الخير ) لان اصلا ما منه فايده و رح اتزيدين الدين مرتين عليج ..
.. اذا حبيتي تستفسرين اكثر راسليني على ايميلي خالد kh_7@live.com
السلام عليكم و رحمة الله و بركاته
أول شي اطلبي توضيح كامل للقرض و متى بيخلص و اذا رفضو اشتكي عليهم في البنك المركزي بينجبرون و بيعطون كل التفاصيل و من بعدها بحساب المدة و تقليل مصاريفج و احذري من تأخير القسط او اعادة الجدولة او اخذ مبلغ علمكشوف او اي تعاملات اخرى تراهم يستغلون حاجة الواحد و يوقعونه على اوراق تورطج و لا توقعين في أماكن للتصيح الخطأ ترا الموظف يتعمد الخطأحتى يوقعج في أماكن غير مخصصة للتوقيع و بعدين يحط التعديل الي يباه و يكون قانوني تأخذبه المحكمه
طبعا إلزمي الاستغفار و الدعاء و فعل الطاعات و ترك المعاصي
و اسأل الله لك التوفيق
خلصي اللي عليج عقب حولي ع البنك الإسلامي ..
وعليكم السلام ورحمة الله وبركاته
ياأختي من البدايه وقت أخذ القرض أتفاقكم على كم سنه يتم السداد ؟ والأقساط الشهريه كم بتكون ؟
يلزم أخذ الأستفسارات كامله قبل المباشره بالتوقيع على القرض .
نصيحه . . دام بدأتي معاهم فلابد الصــــــــــــــــــــــــــــــــبر عليهم حتى تخرجي من هالظرف الصعب .
وحاولي تقتصدي في الصرف وتجدولي إحتياجاتك الأهم ثم المهم .
أما سداد القرض عن طريق مصرف أخر فهاذي دعـــــــــــايات البنوك اللي ماتخلص ، وبدل قرض واحد بيصيرون أثنين .
ألزمي وأكثري من الإستغفار والدعاء بأن يقضي الله دينك فهو على كل شئ قدير وبالأجابة جدير .
وموفقه توفيق خيــــــــــــــــــــر .
أنشاء الله أفدتك .