حصل معي موقف اليوم في مبنى الاتصالات باحدى الامارات دلالة على .. عفوا ان صح التعبير … تعقيد المعاملات لا اكثر …
اخذت ورقة الانتظار وقعدت مع المراجعين .. ومن نصف ساعة الى اربعين دقيقة تقريبا وصل دوري …
انا : – السلام عليكم
الموظف :- وعليكم السلام …
انا:- لو سمحت بغيت اطلع بدل فاقد
الموظف :- حاضر ( وقعد يسولف وياي شوي ) …
لكن عندك مشكلة يا اخي انت مشترك في خدمة جيرت تون ( النغمات ) وعليك عشرة دراهم ..
انا:- عادي مو مشكلة بدفعهم احينه ..
الموظف :- لا ماتقدر تدفعهم .. لازم تاخذ موبايل اي حد وتطرش رصيد على بطاقتك المفقودة عشان النظام يخصم العشر دراهم وتنتظر ساعتين تقريبا لأن ياخذ وقت .. بعدين نعطيك بدل فاقد ..
قلته الموضع كله عشرة دارهم … خذ العشرة واخصمهم ، قال مو بايدي هالموضوع .. وبعد قيل وقال وليش وكيف .. سألته عن المسوؤل .. اشرلي على وحده من الاخوات وقال اذا وافقت الاخت ما في مشكلة ..
انا: اختي لوسمحتي طلبت بدل فاقد وانتظرت دوري لكن وقفوا معاملتي والسبب العشرة ..
قالت مثل ما قال الموظف .. وزادت :
هذا النظام ما يقبل يطلع بدل فاقد الا بعد الدفع .. انت حول الرصيد عقب اتصل على 101 ( انسى الموضوع ) وتأكد اذا تم خصم العشرة دراهم عقب راجعنا …
انا:- يعني ما يصير …
هي:- لا ما يصير ..
____________
يعني الكمبيوترات وضعت لخدمة الانسان .. والانسان هو اللي اخترع الكمبيوتر مو الكمبيوتر يتحكم في الانسان على عشرة دراهم …
ووقتي ضاع هدر وعالفاضي ..
يا جماعة تطوروا شوي ليش كل هالتعقيد .. ادور على موبايل ثاني واطرش وانتظر ساعتين!!!…
هذا انا معاملتي بدل فاقد وجي … عيل كيف باقي معاملات الناس المساكين.. الله المستعان .
احيانا التطور يكون مب فصالحنااا
خاطري يكون عندي شركة اتصاالات منافسة لهم
ما احب اسير اي مكان ويقولي الموظف والله الكمبيوتر رفض
يعني خلاص الكمبيوتر رفض وقفت الاشغال
عاد اخس شي يوم يقولك السستم معلق
إنزين ..
لو قلنا أن النظام مايقبل شو نقول في الوقت الضائع
وليش ما يكون هناك خدمة موازية متوفرة في نفس المكان ؟
يعني موظف يكون له الصلاحية الفورية يقوم بإدخال المبلغ ..
وليش لازم ينتظر ساعتين ؟؟ يعني معقول أنه لا يوجد حل يسرع هذه العملية
الأنظمة الألكترونية المحاسبية فيها الكثير الكثير
المهم كيف يكون لدينا أناس يقدرون الوقت والجهد ويراجعون إجراءاتهم بحيث تتواكب
مع متطلبات الوضع الحالي والمستقبلي ..
التطوير المستمر والمتابعة للسلبيات ومعالجتها من اسس الإدارات الناجحة
وبالذات في الإدارات الخدمية ذات الخدمات الكثيفة