السلام عليكم

الغرض من هذا الموضوع .. انه يتم تبادل الخبرات وفي النهاية لمصلحة الاعضاء لهذا المنتدى العزيز

يعني اللي عنده اي مشكلة في سيارتة سواء ميكانيكية أو كهربائية ومب عارف الحل يعرض مشكلتة هنه.. وان شاء الله نفيدة بالحل .. والمجال مفتوح للاعضاء اللي عندهم خبرة أو واجهتهم نفس المشاكل من قبل انهم يساعدون اخوانهم بحيث انه يوفرون الجهد والوقت والمال ويتعلمون شي يديد فحياتهم.

اللي عنده مشكلة يذكر نوع السيارة والموديل ونوع المشكلة .. والاعراض لؤؤؤؤل

وحاضرين،،

332 thoughts on “حلول المشاكل المكانيكية والكهربائية+فرق مواصفات الوارد والخليجي”

  1. ومشكور وما قصرت وربي يعطيك العافيه
    اول ما احصل اجازه بسير وبخبركم شو يصير معايه

    الحمد الله انحلت المشكلة
    فعلا كانت المشكلة من الانجكترات بدلتهن والحينه الموتر يطير من القومه والريس خفيف مب شرات قبل
    لا قزوز ولا فلتر ولا غيره
    ومشكورين عالنصايح

  2. السلام عليكم أنا عندى شفرليه لو مينه م98بس مشكلتها القومه تجينى تنتيعه لين 20بعدين تستوى طبيعيه يوم أوقف وتوصل السرعه 25/20 بعد تنتع بدلت البلكات والويرات وسنسر البترول بس أحس ماحد عارف شو المشكله وعلا إعتقادى إذا حد يعرف كراج للامريكى فى ابوظبى مايبخل على أو كهربائى مشكورين مقدمن

  3. السلام عليكم مساكم وصباحكم خير

    عندي بوودمعه 2003 لارج وطبعا مكينتها s500 والله اشتريتها واتوهقت فيها بس من اختربت علي كرهتها وكرهت اليوم الي فكرت فيها اول شي الاكسل وطبعا هالي خلاني اكره سيارتي من جد لانه مسويلي فضيحه بابوظبي ماقدر احركها لانها اطلع طقه بصوت فضيع ومزعج والقهر بسياره فخمه هل صحيح ان اكسل البودمعه سريع الخراب وخاصة الموديلات 2003 وفوق الى 2005 وهل سبب الطقه العاليه جداُ الي تظهر من ورى السياره من تحت هي سببها الاكسل (او ) الدفريشن لاني والله العظيم ناوي خلاااااااص احرقها لانها من جد تعبتني رحت وبدلت الاكسل في محل شرات الوكاله بمصفح شغله مرسيدسات كلفني معا الاكسل 2000 درهم ( 800 شغل يد + وقيمته مستعمل 1200 حبه وحده ) وهاذا بس اكسل واحد مبدله والثاني قالي هب خربان وايد يعني القصد هل اكسل البودمعه سريع الخراب فاذا كان صح فمابيخلصني كل فتره ابدله وبالعسر هاذا بعد … بليز بليز ساعدوني واسالو اي حد عنده بودمعه ….

    والشي الثاني ماعليكم امر عندي الهيدروليك طايح بالمره وهاذا سبب معروف بالبومعه يعني اذا بدلته معا المكينه الي تنفخ طبعا وكاله بيخرب علي بعد فتره ولا يباله وقت لانه بيكون مكلفني دم قلبي قيمتهم بدون تركيب معا الخصم من الوكاله ( 10500 ) درهم . افيدوني ربي يجازيكم خير بخصوصه ….

    والشي الثالث والاخير مكيف المرسيدسات معروف بالسابق بالموديلات القديمه مايبرد كثر الياباني ويخرب بسرعه بس بالبودمعه الي عندي مبدله بــ 2500 معا فلتر الغاز بعد نفس الكلام ولا عدلوه وبعد في شي الهوا ماينفخ من الجوانب داخل السياره هاذا فلاتر المكيف ولا في شي غيره خربان … والسموحه وفي اشياء وايد بعد ابغي اعرف عنها البودمعه بس يكفيني عن اطمع لاني قبل عندي كامري والحين خخخخخخخ بودمعه شوفو الفرق …… بليز لحد يطنش ابغي اي رد واي حد عنده لو خلفيه بسيطه لاني شاريها سلفيه وموقفها بالبيت ومستاجر سياره انتظر ردكم الله لاهانكم ….

    والله حالتك حاله مشكلة البودمعة انه قطع غيارة ناااااااااااااااار بس سيارة حلوة فالنهاية..

    الله يقدرني اني افيدك .. شوف حبيبي ..

    1- مشكلة الأكسل .. اذا كنت شارنة من قريب.. يعني 10 ايام .. سير ادافن ويا اللي باعلك اياه وخذ لو نص بيزاتك .. لاني اعتقد المشكلة من الدفريشن مش من الاكسل

    2-
    بالنسبة للهيدروليك .. صحيح قيمتة فوق ال10.000 وسريع الخراب ..انصحك اتركب الجامبينات العادية بتكلفك اقل عن 1000 وبترتاح سنين

    3- انته شو بدلت بالضبط فالمكيف؟؟ بس بما انه المشكلة في الجوانب اعتقد انك بدلت الوابريتر .. واكيد هذا الشي يتطلب فك الطبلون.. واللي ركبلك اياه ماعرف يركبة مثل قبل.. رجع السيارة علية وقولة السيارة ماكنت جي من قبل ..

    4- .. شكلك سويت كل هذي الشغلات في كراج واحد .. وهذا اكبر غلط .. عط الخباز خبزة ولو باق نصة .. المكيف لة ناسة و الميكانيكا لها ناسها .. والجامينات لها ناسها بعد ..

    5- لو انته من دبي او الشارجة .. بساعدك بس للاسف ماعرف حد في بوظبي … بس رجع السيارة عند اللي صلحوها واذا ماطلوك هددهم بالشرطة ..

    واذا معزم تحرق السيارة عطني اياها احسن!!

  4. يااخواني الله يسلمكم ابي اسألكم … انا خذيت استيشن استاندر وكان عليه رنجات حديد اللي بيسموهم شمبر .. وماكان اي رجه في السياره الحين غيرت الرنجات برنجات مخبقه الي بيسموها مكحله عسب انه شكلها حلو غير الي قبل .. المهم اني السياره فوق سرعة 100 ترج وااايد ورديت اوزن الرنجات وماكو فايده مع العلم انه توايري فيهن درج يعني .. متاكلات من جمب واحد .. يعني لما احط يدي على التاير احس انه فيه شرات الدرج .. بس بالرنجات الي قبل ماكانت السياره ترج ابداً … والحين شو الحل يا اخون اغير التواير خايف اخسر مخساير وغير التواير وماحل المشكله … ورجعت للريال الي غيرلي الرنجات وقال (( انه رنجاتي القديمه حديد وثقال ونه ها النوع من الرنجات يخفي عيب التواير اما الرنجات الي غيرتهم هم خفاف المنيوم يتني ها الرجه بالسياره .. )) هل كلامه صحيح .. وتريا ردكم لأني مسافر بالموتر .. وجزاكم الله خير

    الله يهديك ياخوي بعد كل هذا ومتردد اتبدل التواير!!! لا وتبا اتسافر بعد بالتواير المتسحتة!! لؤؤؤؤؤؤؤؤؤؤؤؤل

    بدل التواير الله يرضى عليك .. لاجل حياتك أولا وراحتك ثانيا…

    وتقبل تحياتي

Comments are closed.