حملة المليون ……!!

السلام عليكم ورحمه الله وبركاته

اخواتي اخواني شحالكم ان شالله طيبين ..

شوفوا انا اليوم الله يسلمكم يايكم وكان عندي مشروع حلو ومناسب للكثرين .. وبنفس الوقت مجهز ردود للخاص والايميل وبعد كنت ارد على الاتصالات سواء من الاعضاء او من شركاؤي او اي شي يخص الاعمال وكنت عايش بزحمه الاعمال وانا ترى من النوع اللي يحب زحمة الاعمال لكن بترتيب..

ولكن مره وحده ياني تفكير ان لمتى …. صج كلنا نبي النجاح ونبي الفلوس ونبي الاسم … لكن لازم مانخلي هالامور تلهينا عن دينا ودنيانا

فمسحت المشروع اللي كنت بكتبه وقلت بنزل هالموضوع ..ّ!!

الموضوع الله يسلمكم هو حمله تبرعات الاكبر والاولى على مستوى المنتديات العربيه والعالميه وبتكون على عده مراحل الاولى بميه الف ان شالله

اخواني الطريقه ان من اليوم كل واحد فينا يروح ويتصدق على احد ويي يقول لنا بكم تصدق وطبعا هالشي بذمته ومانبي ان شخص يجمع التبرعات والصدقات لازم كل واحد بنفسه يدور المحتاجين والمساكين والايتام

احنا ماشالله في الشغل على طول نشتغل وندور احسن الصفقات ونسافر ونتصل فبيكون شي حلو لو وفرنا من وقتنا لمثل هالشي

صحيح ان صدقة السر احسن بوايد لكن بعد صدقه العلن عليها اجر واحنا هدفنا ان نوصل لمبلغ محدد كلنا مع بعض فعشان هالشي بنقول بكم تصدقنا او تبرعنا

وبخصوص التصدق سرا او علانيه نستديل بالايه الكريمه

‏{‏إِنَّ الَّذِينَ يَتْلُونَ كِتَابَ اللَّهِ وَأَقَامُواْ الصَّلَوةَ وَأَنفَقُواْ مِمَّا رَزَقْنَهُمْ سِرّاً وَعَلاَنِيَةً يَرْجُونَ تِجَارَةً لَّن تَبُورَ * لِيُوَفِّيَهُمْ أُجُورَهُمْ وَيَزِيدَهُم مِّن فَضْلِهِ إِنَّهُ غَفُورٌ شَكُورٌ‏}‏‏ سورة فاطر الايه (29)

وطبعا بعد استدليت من كلام الشيخ محمد بن صالح العثيمين بخصوص هالموضوع في سؤال توجه له ونقلت فتواه بموضوع مشابه لموضوعنا:

لا بأس بتكوين لجنة لقبول الصدقات والزكوات وغيرها من النفقات الشرعية؛ لأن ذلك من الوسائل إلى ضبط هذه الأمور تحصيلاً وتوزيعاً، وهذا مقصود شرعي لا يقصد به إلا ضبط هذه الأشياء، وما كان وسيلة لمقصود شرعي فلا بأس به ما لم يقصد التعبد بنفس الوسيلة‏.‏ كتبه محمد الصالح العثيمين في 11/7/1417هـ‏.‏

فاحنا هني بيكون هدفنا للتنظيم ان نشوف لكم وصلنا وكيف توزعت الصدقات

واللي مايبي يكتب جدام العالم يقدر يرسل لي ايميل او خاص ويقول لي ان اليوم تصدق بالمبلغ المحدد

اخواني حتى بدرهم واحد ترى بتكون صدقه ولها اجر … قليل مستمر خير من كثير منقطع

الاليه بتكون بهالطريقه: توزيع المال : يعني مانعطي 1000 لشخص واحد وانما نقسمها على عشر اشخاص بواقع 100 لكل شخص او نقدر نوزعها على 100 شخص بواقع 10 لكل شخص

فاهميني اخواني .. المهم ان الصدقات والمبالغ توصل لاكبر قدر من محتاجينها وهذا هدف احسن من اي شي ثاني ..

وطبعا انا مابي اقول لكم ان الصدقه تزيد الرزق وتيسر على الواحد اموره لان كلنا عارفين هالشي الحمدالله

واللي اقوله لكم يالله اخواني من الحين نبدا الحمله واول استهداف لنا 100 الف في خلال شهر واحد

وياما دفعنا عشر كبخشيش في المطاعم وياما دفعنا الاف على اكسسوارات او شغلات يمكن نستعملها مره او مرتين وغير.. وغير …!

فاخواني بهالحمله بنكون سوينا شي لنا ولغيرنا والبدايه من اليوم حتى لو كل يوم يكون بدرهم واحد بس نبدا الحين ان شالله

وننطر مشاركاتكم للفقراء واليتامى والمحتاجين ولاننسى حتى الاجانب من هالحمله ترى في هنود متغربين ويعيشون على ميه درهم في الشهر منها اكلهم ويرسلون لعيالهم بس نفضل ان استهدافنا اول شي يكون للعرب والمسلمين

وبالتوفيق ان شالله … وانا اتوقع ان نغطي اكثر من هالمبلغ بوايد في خلال شهر واحد وياليت الاخوان يفيدونا بعد اكثر بشرعيه هالشي لان مانبيه انه يدخل بالرياء لان هدفنا ان نتعاون مع بعض ونعرف لكم وصلنا ان شالله وتكون الحمله على عدة مراحل

ومن فتاوي فضيلة الشيخ ابن عثيمين ‏:
سئل فضيلة الشيخ ـ رحمه الله تعالى ـ‏:‏ بعض الناس يقول‏:‏ إني لا أزكي مالي أو لا أتصدق إلا بقصد نماء هذا المال والبركة فيه فما توجيهكم‏؟‏

فأجاب فضيلته بقوله‏:‏ لا بأس بذلك، وقد نبه الله على مثل ذلك في قول نوح عليه السلام لقومه‏:‏ ‏{‏فَقُلْتُ اسْتَغْفِرُواْ رَبَّكُمْ إِنَّهُ كَانَ غَفَّاراً * يُرْسِلِ السَّمَآءَ عَلَيْكُمْ مُدْرَاراً‏}‏، وقال النبي صلى الله عليه وسلم‏:‏ ‏”‏ما نقصت صدقة من مال‏”‏‏.‏

invgulf@hotmail.com