السلام عليكم
شحالكم يالربع عساكم بخير
يا أخوان عندي مشكله وحاله مستعصيه
أبا أنطق جمله بالانجليزي صح ومب عارف كيف
حد يعرف أو سامع عن مكان يعلمون فيه الأنلجيزي فالعين
فيدونا
فيدونا بارك الله فيكم
حد منهم يقولون معاهد مادريبهن إذا منهن فايده
قلت بتخبركم .. هل وعسى أني القى حل ؟
اخوي اذكر في دورات بكليات التقنيا العيا
انا كنت ماخذ بالعام 2001 ولكن اعتقد انها شويه غاليه…
بس مضمونين 100% واعتقد انهم احسن من المعاهد
وفي دوره بجامعه الامارات في ملتقى اسره الجامعه او بقسم التعليم المستمر اتصل عليهم وراح يخبرونك عن جدولهم…
طبعا هذي جهات معروفه وغير ربحيه بحته مثل بعض المعاهد اللي عندنا…
وماشاء الله ع الاخوان والاعضاء ماجصروا عطوك اكثر من طريقه وحل…وانت وظروفك واللي يناسبك
طبعا أول شي الاصرار ثم الاصرار !
والشي اذا انت مغصوب عليه ما راح تتعلمه يعني لازم اتكون تحب الشي اللي تتعلمه
الشي الثالث مدى حاجتك لتعلم اللغة ,, ما بتتعلم الا اذا كنت مضطر ! وفي زمنا هذا للأسف صارت الانجليزية هي الأساس .. مع ان قرار المجلس الوزاري بتعميم اللغة العربية برد قلوبنا بس ما زال الوضع بينا الانجليزي هو المستمر لانك تضطر تتعامل مع اجانب وخاصة في مجال العمل
الامر الاخير والأهم : انك تستعين بالله وردد يارب علمني ما ينفعني وانفعني بما علمتني ممكن تدفع آلاف على كورسات بس ما تستفيد منها شي ! وممكن تسوي شي بسيط لكن ينفعك الله به نفع عظيم وبالنهاية التوفيق من رب العالمين
كيف قدرت اتقن اللغة الانجليزية ؟؟
دشيت معهد في بوظبي وكان بغرض اني ادش امتحان التوفل وكانت المشكلة الاساسية هي الجرامر !
وقلت ابا اتعلم الاكسنت نفسه والمحادثة بس ما اريد الجأ اني اسمع أغاني غربية هابطة او اضطر اني اشوف افلام استأثم من حيث اني ابا اتعلم !
فرزكزت على افلام كرتون ديزني ” اصلا انا احبها ” وكنت اشوفها بالانجليزي بدون ترجمة وكنت اسمع لمحاضرات دينية بالانجليزي : قصة اسلام عبدالرحمن جرين ، وقصص الانبياء للشيخ العولقي ، وكنت احضر دروس الشيخ سالم العامري بالانجليزي لغير الناطقين بالعربية ” الله يرحم هذيج الأيام “
في اناشيد دينية هادفة باللغة الانجليزية : مثل اناشيد زين بيكا و فرقة نيتف دين و يوسف اسلام وغيرهم كلماتهم هادفة ونظيفة وبنفس الوقت اذنك تتوعد على شي جميل
القراءات متوسعة كانت اي شي يطيح بايدي بالانجليزي اقراه قصص مجلات جرايد مقالات واترجم
المحادثة كانت تساعدني اخت من امريكا اسمها فاطمة الزهراء وكانت تصحح لي وصديقة مسلمة من بريطانيا بعد واتعرفت على بعض الاخوات الامريكيات اللي هاجرن للامارات وطورت لغتي من خلال علاقتي الطيبة وياهن
ماشاء الله الحين اتكلم بالاكسنت الامريكي والبريطاني كأني منهم وبنفس الوقت خذيت من لهجاتهم اللهجات الراقية لأن بعض الاكنتس نتكلمها على بالنا كله واحد طلع ان عيال الناس والعائلات المحترمة لهم طريقة والناس اللي مستواهم اقل لهم طريقة وتعامل و ألفاظ مع ان الاثنين تحمل نفس المعاني
حاليا انا مركزة على تعلم الفرنسي في معهد ” بيرلتز” يمدحونه وايد بس اسعارهم غالية شوي وربنا يعلمنا ما ينفعنا وينعفنا بما علمنا
اول شي لازم تكون عندك اراده
2 حاول تفهم وتحفظ الكلمات الانجليزية الشائعة
وحاول ترتب جملة( مي يس جو اوت ……)
وبعدين روح معهد وتعلم كلمات مع قواعد
وشد الهمة
في معهد خلف كارفور يعلم اللغه الانجليزيه ربيعاتي ياخذن كورسات انجلش هناك ويمدحون تدريسهم لان اللي اتعلمهم بريطانيه
والشي الاهم في تعلم اللغه الانجليزيه هو الممارسه يعني لازم تتكلم انجليزي مع ناس يتكلمون انكليزي فالاول راح تغلط ويمكن مايكون كلامك صحيح 100% لكن مع الوقت راح تشوف نفسك اتطورت في اللغه الانجليزيه