يا لكنة احروف الدلع مـن شفايـاك
روعة نغـم ولّـى موسيقـة ابيانـو

قلي : دخيلك وش تضاريس جـوّاك
وقل للعرب وشلـون كنّـا وكانـوا

على سبيل الحب راهنـت رجـواك
وانته رهين ادموعـي اللـي تفانـوا

ليت الامانـي بيننـا بـس شبّـاك
واشواقنا مـن داخلـه مـا توانـوا

خذني من ايدين التعب ليـن القـاك
وخذني الى عزك اذا النـاس هانـوا

وكانك عرفت اللي يعاني من ارضاك
فآنـا أُعانـي والعشاشيـق عانـوا

()()()()()()()()()

هي عيونك ذات ألواح و دُسـر
وهي عيوني مرفأ شعور وقصيد

جدّفيني ليـن احضـان الجسـر
وانطريني تحت اكتاف الجريـد

قلبي المنهـك وانفـاس الاسـر
ما تقيّـد جيّـة الرجـل العنيـد

أوعدك و آواعدك عسر ويسـر
وهي على حطّة ادينك لا جديـد

كل كلمه منْـك تكسرنـي كسـر
موب حلوه كلمتـك انتـا بعيـد

الاماني ريش واحلامـي نسـر
والحظوظ اتعيش بقفاص الحديـد

الخساره ما تفيـد اللـي خسـر
لكـن انّـي بالخسـاره استفيـد

تذكري بس التقينا قلـت : سـر
قلت : احبك وانثنى غصنك رغيد

اعذريني كانـت الهجـره قسـر
شيّ ماهو في إدينـي كـمّ يكيـد

وعد ارجع واحضنك فوق الجسر
مثل حبّات المطر ترجـع اكيـد

7 thoughts on “خذني من ايدين التعب لين القاك”


  1. مبدع ياشاعرنا عــــناد

    قصايدك ما نشبع من قراءتها ^_^ قرأتها أكثر من خمس مرات ،، معانيها حلوة وأسلوبك الساخر أو الهزلي في كتاباتك هو اللي مخليني أقرأ قصايدك أكثر من مرة ..

    هذا موب مدح

    أنا فقط أقولك رأيي بدون مجاملات

    استمر بكتاباتك وخاصة لوصف الأحداث اليومية اللي تحصل حولنا

    القلم الحر

  3. صح لسانك وعلا شأنك شاعرنا

    إبداع

    شـكــ وبارك الله فيك ـــرا لك … لك مني أجمل تحية .

Comments are closed.