خلونا واقعيين شوي

السلام عليكم ورحمة الله وبركاته

شحالكم اخواني وخواتي

عساكم بخير

ادخل في صلب الموضوع ,,

في هاي الفترة لاحظت واغلبكم لاحظ شو يستوي في اغلب المواضيع سواء الي يطرحها محلل او عضو عادي ويظهرون من صلب الموضوع وتبدا الاختلافات وتتحول بعد ذلك لمشاجرات سواء بالكلام او غيره

اخواني اغلبنا له غرض يوم سجل في ها المنتدى يا يستفيد يا يفيد غيره بالي عنده ويعرفه , يعني ما سجل بس علشان يضيع وقته

ما علينا من ها الشي الي ابغي اوصلكم اياه انه الانسان منا مب معصوم من الخطأ ولا هو ظاهر من بطن امه يعرف كل شي ومب كامل الا وجه ربنا الكريم

يعني ما فيه داعي المشاجرات والتهجمات على بعض وانت قلت وانت سويت ولو ما سمعت رمستك كان الوضع غير وانت خسرتني وانت وانت… الخ

ومواضيع كثيره تطرح تهجم في فلان وعلان وردود في المواضيع مالها اول ولا تالي واغلب المشاجرات تستوي يوم السوق ينزل ومن يرتفع بدأ المدح والمجاملات وتسلم وغيره انزين هو يوم نزل او ارتفع السوق تراه نفس الشخص بس الي يرشون السوق في لحظات معينه هم الي يغيرون مسارات السوق من سلبي لايجابي والعكس صحيح

يا ناس هنيه المحللين يشوفون الاوضاع بنظرات تختلف عن نظراتنا ويمكن نظراتهم تصيب ويمكن تخيب بس زين منهم انهم يحاولون قد ما يقدرون يقدمون الشي المفيد لكم وتقليص خسائر الاعضاء وتقديم الدعم النفسي والمعنوي لهم بدال ما نشكرهم نذمهم

الي شاف السوق في بداية الازمة يقول خلاص ها السوق راح وطي ومستحيل نشوف الارتفاعات فيه وعلى الدنيا السلام

بس الي نشوفه الحين غير السوق يحاول يستعيد نشاطه وصحته بس كم من الوقت بقى او كم الارتفاعات والاحتمالات الي بيوصلها هاا الي ما نعرفه لانه محد يعلم الغيب بس من التحاليل يبين انه المسار الي يسلكه صح ولا تنسون انه من شهر 6 السنة الي فاتت ولين ها الوقت فترة مب قليلة يعني اذا انتوا ما صبرتوا وتسرعتوا في بيعكم ومن تخسرون تقولون هم خسروني بيكون ها كلام مب واقعي

والله انا متاكد انه المحللين مختارتنهم الادارة صح يعني لو ما حسوا بانهم بيفيدون الاعضاء وبأن أرائهم صح ما كانو بيعطونهم مسمى محلل او غيره لانهم بيكونون هم في الصورة وبتكون ادارتهم فاشله

فواجب علينا انه نحنا نشكره مب نذمهم على الي يقدمونه حقنا ترى هم يدورون وايبون ويحللون ويثبتون الاشياء مب من فراغ او تخمين والدليل الشرات والاشياء الي يدرجونها في ردودهم في المواضيع او غيره

اتمنى من كل قلبي انه نكون على قلب واحد والي عنده ملاحظه او شي على اي عضو او مشرف يراسله شخصيا لانه نظرات الانسان لنا غير عن نظرتنا لنفسنا ويمكن الناس تشوف اخطاء علينا نحنا ما نشوفها ولا نقدر نحكم على غيرنا الا لو عرفناه عدل ولا ننسى بانه النك نيم الي يختاره العضو يكون مسمى ما نعرف الي ورى ها الاسم ريال او حرمه صغير او كبير شيخ او فقير او انسان عادي الي نعرفه انه انسان بيكون مسؤل عن تصرفاته شو ما كانت سواء كانت تصرفات صح او غلط

مقال عيبني واباك تقرونه ويمكن يفيد البعض منكم وهو باسم تفائلوا بالخير تجدوه

http://www.serdal.com/archives/2005/02/19/success/

والسموحة لو طولت عليكم بس لا تنسون ترانا كلنا اخوه وخوات ولازم الي ما نرضاه على نفسنا ما نرضاه على غيرنا

والواحد منا ما يظمن انه يعيش لباجر بس اهم شي انه يترك اثر طيب وسط الناس

اختكم

بنت الأمارات