السلام عليكم و رحمة الله و بركاته
اخواني تذكرون قصيده ماسات مواطن يدور وظيفة ….
والله هالحال ما تغير لين الحين … و مثل ما قلت دام في الموارد البشرية ميسون و طوني اسمحلي يا ولد بلادي مالك وظيفه زينه …
عنبو معظم الوظايف المعلنه للمواظنين يا صراف , يا استقبال ولا ضيافة … و بأدنى الرواتب …
اخواني انتوا يالمواطنين يالي قسم الموارد البشرية ارحموا اخوانكم الي اييون المقابلات وظفوهم و بالنسبه للخبره تراه بيتعلم من الميسون و الطوني الموجودين عطوهم الفرصه …
أكيد بعض الأعضاء بيقول بلاه هذا محتشر بسببب الوظايف …
هذا ردي : من حقي أحتشر مواطن و ادور على حقوقي كيفي وين معورنك … ادور على حقوقي الي ما تم وافد في هالبلاد ما كلا منها و انا مالي نصيب فيها …
أنتوا يالي في الموارد البشريه فكروا في اخوانكم الي ما توظفوا و بدوهم على غير المواطنين و صدقوني بيبيضون الويه.
والي عنده مداخله يتفضل
وش عاد يا دار ٍ بها صار ( توطين ) *** و في مكتب التوظيف سوسن و ميسون !
مديرهم مدحت و نائبْته نسرين *** و على الرسبشن حمّص و فول و زيتون !
كل ما اتصلت اسمع ( ألو مرحبا مين ؟ *** بدّك وظيفه ؟ .. مين دلّك على هون ؟ )
اقول انا لي اتصل صار شهرين *** و انتوا وعدتوني متى بس توفون ؟
اسمي ( مواطن ) ( جامعي ) طيب و زين *** كني ابخطب عندكم و اتّغلون !
عندي شهاده طايحه بجبدي سنين *** عشش عليها شي له ستة عيون !!
لو للشهاده لسان قالت ( على وين *** ناوي توديني .. تلف فيني الكون ؟ )
من كثر ما صورتها غارق بدين *** للهندي راعي المطبعه صرت مديون
لا ليلي ليل ولا نهاري نوى يبين *** دقيت راسي لين ما صرت مينون !
مطلوب خبره عالأقل في مجالين *** ولا تجينا بواسطه و سير مدهون !
ولا انثبر في بيتك .. افرك بكفين *** يومك يشابه امسك و عيش مغبون
تعدادنا ويّاهم اربع ملايين *** و اهل البلد للحين ما صاروا مليون !!
ويلاه من باكر اذا وضعنا الحين *** و احنا اقل من الربع حالنا شجون !
و اللي ابتسم له حظه والله مسكين *** حصّل وظيفه .. بس في وين .. تدرون ؟
ساكن في راس الخيمه حطوه في العين *** و اللي سكن في الذيد في السلع مدفون !
يشوف اهله بس في الأسبوع يومين *** و اذا حسبتوا الدرب كم ساعه .. تبكون
يعني في كل احواله ذاق الأمرين *** شغّال محزون و بلا شغل محزون
و الأجبني اللي راتبه فوق عشرين *** فله و سياره و تذاكر .. و طاعون
عنده بدل كل شي عالراتب ألفين *** حتى بدل معجون اسنان و صابون !
و من بعد ما يجمع من بلادي فلسين *** و يربّي من القعده على الكرسي بطون
و يصير في بلاده غني و عنده برجين *** يرحل و هو جاحد .. و كم مثله ملعون !
و حتى الجماعه قوم مدحت و نسرين *** مردّهم لبلادهم لو يطولون
يرضون بشوية دراهم .. و شفتين *** صبح و عصر .. لو حتى في الليل يرضون
بس لو سمعتوا همسهم بينهم بين *** وسط القهاوي يلعنون و يسبون !
لا تحسبوني عنصري .. كلنا طين *** و الخل لو عاتب محبينه يمون
داري و انا اولى بها من الغريبين *** ما يوصلون لحبها لو يموتون
و ( الأقربون أولى ) .. كلام ٍ من الدين *** ما جبته من شعري مع الهام و ظنون
ولد البلد ما يبغي لبلاده الشين *** بالروح بالدم يفتديها ولا يخون
لكن سؤاله يوم قلتوا له ( توطين ) *** يا كيف بيد الغرب توظيفه يكون ؟؟!!
شعارهم معروف ( راجعنا بعدين ) *** و باين من التأجيل .. انهم يخافون
اذا معك خبره .. يا اهلين و سهلين *** و اذا شهاده بس .. عنك يصدون
ما عندنا شاغر .. و بطلنا تعيين *** ولو تحرق الهاتف ترى ما يردون !
من وين اجيب الخبره ؟ من وين من وين ؟ *** دام الوظيفه عند سوسن و ميسون !
عندي بمطبخ بيتنا خبره سنتين ! *** تنفع اذا صاروا المطاعم يوطنون ؟؟!
ولا اهاجر و آخذ الخبره في الصين ؟ *** صح العيون صغار .. لكن يقدْرون
سؤال يا دار ٍ ..صراحه بترضين ؟ *** اني اسافر و اطلب الغرب لي عون ؟
و سؤال يا ناس ٍ على الراس و العين *** صدق الوظايف واسطه و سير مدهون ؟
اما الجواب الشافي يجيني الحين *** او هاتوا تأشيره .. اذا كنتوا ترضون !
الشاعر: ساقي الشوق
انا بتكلم بالنسبة عدنا فى اماة ابوظبي
انا اشتغل فى الموارد البشرية فى دائرة حكومية
اللهم لك الحمد من اصغر موظف فى الموارد البشرية الى مدير ادارة الموارد البشرية والى مدير ادارة الشؤون المالية والادارية كل ابوهم مواطنيين والحمد الله ولا وافد عدنا مع كل الاحترام لاخوننا الوافدين
اما هذا اللى تقصدونهم طوني وميسون وممدوح وما عرف شو فى اماره ثانية غير ابوظبي والعين ما عندي علم
وبالتوووفيق لكل الاخوان
صادق
و الله يوفقك ياااا رب ّ و يسرّ أمورك .. و ما ضاع حقّ وراءه مـُطالب.. أهم شيّ الحماس و اتحمل عن تبرد الهمة اللي عندك 