مرحبا صبايا و شباب
مساكم الله بالخير و النوور و السرووور
تعالوووو بقولكم
و رجاء يتم الموضوع هنيه في هالقسم
انا طول هالفتره ميوده في قلبي و ساكته بس لازم ارمس الحين لان ابغي حلول و مناقشه في الموضوع
السالفه يطولي بعماركم
انا في وضع صعب للغايه << تجاريا..و ممكن تصير ماليا قريبا اذا تمينا على هالحاله… و نزلت الموضوع عشان تشورون علي بما ان وايدين منكم مخوخ تجاريه ماشاء الله عليكم
السالفه و ماافيها
اني انا لازم لازم لازم ازيد سعر زيت شما
الاسباب:
1. اول شي صار سعر الاستكرات زاد 100 درهم
2. سعر الغراش بيزيد..البارحه يوم خذت غراش قالولي المره اليايه سوي حسابج السعر بيزيد و لانج زبونتنا هاي اخر مره نحسب لج بالسعر القديم..بس ما قالولي كم بيصير!!!
يعني كلهم رفعوو علي مره وحده….و انا مبهته و فاجه حلجي و لا اعرف شو اسوي؟؟!!
شوفة عينكم سعر زيت شما = 70 درهم
حسبو منه الشحن من الهند لين هنيه و الاستكرات و الغراش و اكياس توصيل البضاعه و ستكرات اللي اكتب عليها المعلومات من غير الستيشنري و هالامور..و فوق هذا كله وقتي اللي اقضيه في تجهيز الطلبات
الحين انا لازم ازيد السعر الى 100 درهم للغرشه …و سعر الجمله بيكون 70 درهم طبعا اقل شي درزن
غصبن عني لازم ازيد بسبب الاسباب اللي ذكرتها فوق
لكن المشكله وين؟
المشكله في تقبل الزباين للموضوع..انا قلت بكون صريحه و بقوللهم الاسباب بصراحه ..لان فعلا هالشي مب بيدي
مابا الزباين يقولون والله دبي بيبي سمعت عن زيادة الرواتب و قالت بتزيد الاسعار و يقولون هاي طماعه و ما تخاف ربها و تبا تستغل الناس و تنهب بيزاتهم
و الشي الثاني اللي مفكره اسويه اني بنزل موضوع هاليومين بقولهم ان الحين زيت شما سعره 70..و لكن على بداية شهر 3 راح يصير 100 درهم..يعني اعطيهم مجال شهرين و هي فتره طويله جدا عشان يتخذون قراراتهم ..و مب مشكله بتحمل فيها الخساره ..بس اهم شي ما اخسر سمعتي كتاجره و لا اخسر زبايني ..و لا ابغي حد يتهمني بالطمع
هاي مشكلتي و هذا حلي للمشكله
الحين من كمن يوم و انا افكر..اقووول يوم اني مب مستفيده شحقه ابيع و اعور راسي..
و على فكره هذا ارخص كوست عندي..لان لو اسوي الستكرات في البيت بيكلفوني ثروه..في المطبعه ارخص لي..و الغراش هالموجودات ..ماشي غيرهم لو كنت ابا اقلل الكوست…للاسف ما يتقلل
انتو شو رايكم؟؟و اذا عندكم شور ثاني خبروني لان احترت و دار راسي…بين الخساره و بين الاتهام بالاستغلال
مشكور اخووووي على التشجيع بس لا تتحمس وايد
اذا الله راد ازيد السعر بيكون في شهر 3
عشان اعطي الزباين فرصه
و اظن جيه عدل
هاللي جدامي…يا ازيد..او يا اوقف لان مب مستعده ابيع بخساره و اضيع وقتي
لكن ما اعرف مدى تقبل الزبائن لموضوع الاسعار اللي تزيد
و هاللي ابا اعرفه منكم
الله يحيج
نعم ماخذ الامور ببساطة لان الامر واضح وهو ارتفاع الاسعار وهذه الامر ليس بيدج وامر ذكر سمعة المراء انا في نظري ان الانسان او التاجر بكلمته والوضع العام يوضح الامور الكثيرة وان الغلاء في الدولة بشكل عام وليس خاص
في بعض الامور الاساسية من غراش وهكذا تقدرين ان تستوردينها من الخارج لاكن يجب ان تطلبي كميات معينة لكي يلبون لج طلبج وفي اعتقادي انها سوف تاتي بسعر رخيص مقارنة برفع الاسعار لدينا
ارباب
انا بشتري غرشتين بالسعر الجديد 100 درهم باااجر