السلام عليكم..

بخصوص دراسة الماجستير،، في معهد في دبي اسمه “آفاق المعرفة” “knowledgehorizon” يمنح درجة الماجستير من جامعة كامبردج المرموقة في بريطانيا على النحو التالي:

السنة الأولى
دراسة سنة كاملة في دبي والحصول على دبلوم عالي في أحد التخصصات المطروحة بواقع يوم واحد في الاسبوع وبهذا كأنك أنهيت 50% من برنامج الماجستير.

السنة الثانية أو نصف السنة
الـ 50% تكتمل بدراسة 4 شهور في بريطانيا والحصول على الشهادة

أو..

السفر لبريطانيا 10 أيام من شهر 3 و 10 أيام من شهر 9 وخلال الفترتين تكون الدراسة عن طريق النت.

رجاءا لو عندكم فكرة عن الموضوع أو تعرفون حد جرب هذا المهعد اتفيدونا لأن الدراسة تبدأ الشهر الياي و أنا محتارة واااااايد.. على فكرة ايقول وايد من الدوائر والوزارات داخلين في البرنامج.

19 thoughts on “دراسة الماجستير”

  1. اتصلي بوزارة التربية والتعليم وعطيهم اسم الجامعة وهم بيخبرونج ,… وبعدين ترا في لعبة ثانية تلعبها المؤسسات التعليمية اليديدة … يعني الجامعة معترف فيها من الوزارة بس التخصص بعده مب معترف فيه … انا بيخبلوني يوم التخصص مب معترف فيه ليش تفتحون باب الدراسة وباب التسجيل وليش تعطون الجامعة من الاساس اعتراف …

    المهم ادخلي على موقع قرية المعرفة بتحصلون مليون جامعة وكلهن جامعات عريقة ومعترف فيها …. ودوري في محرك البحث حسب التخصص والدرجة اللي تبينها وتوكلي على الله .. أما الشي اليديد واللي بعدج ما عندج خلفية عنه فانصحج لا تسعيله .. الدراسة يبالها تعب عشان تحسن بقيمتها … يعني معقولة ماجستير في اربع شهور وعشرين يوم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

    شكرا على مرورك اختي العزيزة.. صدقت بما ذكرتي.. بس ترى الدراسة سنة وأربع شهور تقريبا.. 50% في دبي 50% في بريطانيا..

  2. السلام عليكم,

    حاليا أدرس في هذا المعهد والطريقه اللي وضعتيها أختي العزيزه هي اللي راح أطبقها يوم أخلص أول سنه لأني توني بادي وياهم من شهر 9/2007

    وبالتوفيق لج أختي العزيزه في دراساتج العليا وكل اللي يحب يواصل تعليمه العالي

    بو مسلم

    موفق اخوي.. بس هل تأكدت من الاعتماد.. ارجو افادتنا؟؟

  3. السلام عليكم

    للاستفسار عن مؤسسات التعليم العالي الخاص المعترف بها وبرامجها المعتمدة داخل الدوله يرجى زيارة الموقع الالكتروني لهئية الاعتماد الاكاديمي :
    http://www.caa.ae
    او الاتصال بالهيئة على
    الهاتف :6427772-02

    للاستفسار عن البعثات الخارجية يرجى الاتصال بوزارة التعليم العالي والبحث العلمي هاتف : 6427121-02

    وبالتوفيق للجميع

    شكرا على المعلومات. بتصل بهم ان شاء الله ..

  4. كلية آفاق المعرفة” “knowledgehorizon” اللي قريب حديقة الصفا في على ما اعتقد هذي معترف بالماجستير اللي يقدمونه وربيعي الحين يدرس عندهم بنفس النظام اللي ذكرتيه وبيروح يكمل 4 شهور في برمنجهام تبتدي من 15 فبراير وبيرجع وياه الماجستير وهي معترف بها في الدوله

    الله يوفقج والتعب في سبيل العلم يهون وأتمنى اكون افدتج

    بارك الله فيج وفالج الماجستير <<<<<< متأثر بشاعر المليون

    شكرا اخوي.. هو مهعد وليس كلية.. يقع في شارع الشيخ زايد. وهم فعلا يقولون ان وايد امسجلين في البرنامج والي عرفناه انه مو معترف به بس بمجرد الحصول على الماجستير بشرط البقاء 4 شهور في بريطانيا يعتمد من التعليم العالي.. وهذا إلي ابا اتأكد منه

Comments are closed.