السلام عليكم ورحمة الله وبركاته
طبعا كل البنات والسيدات يلاحظون اسعار العبي كيف طارت خلال السنتين اللي فاتوا
بدون مبرر
والموديلات اللي تغيرت ,,عموما هذا مب موضوعنا
للاعراس والاعياد الكل يحب يكشخ
من يومين قلت بسير بدور لي عبايا للعيد
مريت توشيه اللي في جميرا
انا اعرف انه اسعاره غاليه
بس هالمره بالزياده ,,,وتحس انه استهبال للبنات
المهم اقل عباه ب 4000 الاف درهم والاحلى ب6000 والوسط ب5000
شو رواتب موظفين بقيمة عباه ,,انا اقدر اشتري لكن عندي مبادئ
انا يلين الحين مقاطعه الشنط الماركات
كل وحده ب6 وب 5 واخوانا في العراق وفلسطين مب قادرين تغمض لهم عين
الحين الكل مركز على زيادة اسعار المواد الغذائيه
وغاضين الطرف على ها الزياده والتفاهه وللاسف اصحاب ها المشاريع
مواطنات (سيدات اعمال )
ياليت لو بناتنا تكون لهم مبادئهم مب امعه
ياليت لو سيدات الاعمال هايلا يكون لهم خدمات مجتمعيه
ويحسون بالناس خاصه طالبات الجامعه الل مب قادره تشتري لاب توب للدراسه
وتحاول توفر لتشتري عبايه للكشخه
عشان ما تكون اقل من ربيعاتها
اللي يبا الرخيص بيلقى المكان الرخيص
واللي يبا الفشخره و الغالي بيلقى الغالي
…
شبلاها المحلات في بوهيل ونايف و المحلات الصغيره في الاماكن العاديه و عيمان و ربعهم
فصلنا عندهم الساده و فصلنا المطرز من تصاميمنا طبعا للي ما يحب المكرر
باقل الاسعار
لكن البطرانه اللي تقول اخ شو نايف و شو بوهيل و شو عيمان ما يطيع زيني و ما اتنزل …بروح المحل الفلاني و العلاني في المركز الفلاني و بالديكور الفلاني
بس عشان علامة المحل تنحط تحت على طرف العباه….عشان الناس تقول اوه شوفوا فلانه عباتها من هالمكان للفشخره
وعقب يقول اشحقى العباه ب 3000 و 4000 و 10000
هاي مشكلتها
…
انا عن نفسي مقاطعه المحلات اللي في المراكز و المواطنات اللي يبالغن
و اخيط باقل الاسعار في بوهيل و المحلات الصغيره و الحمدلله يضبطون الخياطة و الديزاين الليا باه من تصميمي وتصميمي ربيعاتي….
انا عني اغلى عباه فصلتها 200 درهم
طريقتي لروح المحلات اللي يبيعون اشرطة وفصوص وهاي الحركات وشتري
واروح محل ثاني واشتري خام
اوديها الخياط واقوله ركب الفصوص حسب ما انا ابا
بس بعد انا العبي والشيل عندي ما اسوي عليها البلاوي اللي يسونها البنات
مجرد شريط بس
وبهذا ما تطلع العباية اكثر من 200 درهم
واليي با180سادة كويتية لين الرقبة
وبقولكم عن حركة تسويها ربيعتي
تدخل المحلات الكبيرة وادور اذا لقت شي يعيبها صورت المديل وودته عند خياط ثاني وفصلت شراتها
وارخص بمليوون مرة
والمحلات الغالية ما ادخلها
الغاليه … اذا توشيه باعو عبي بقيمة 20 ألف … والبنات متخبلات .. ما اعرف على شو … وبصراحه اسعارهم غاليه … ولكن نحن نحصل سعر خاص … ويعني مره سويت وحده ابقيمة 4 وشوي … هذي مفروره في الكبيت .. ما اروم ألبسها … لبستها في عرس .. واستحي اطلعبها جدام الناس في المراكز وغيرهن … من ايام سرت اطالع .. شو يديد … ما يستاهلن … ولو بتقاطعين .. هم مب خسرانين شي … وبنسبه للعبي اثانيه … ما البس غير الساده سواء كان عيد لا غيره .. بلأخير اعقها … ..
بقولج شي .. اذا بترمسين عن المقاطعه .. والله ياما قاطعنا .. وسوينا .. انا روحي .. شفت فلسطينيه في ماركس تشرى .. وقلتلها نحن نقاطع عشانكم وانتو تجتلون هلكم من ماشريكم في ماركس .. ردت عليه … شو يعني ..محد قالكم تقاطعون… وانا من يمها ما اقاطع ولا شي … شي .. ترمسن من طرف خشمها … قلت في خاطريه براها جهنم طوتها … ما همتني …
يالله شو بنسوي ولا بنقول
تسلمين على هذا الموضوع الجميل
حتى العديد من الاناث ترى هذا الموضوع وعلى قدر ما تقدر تسوي مقاطعة للمحلات اللي اسعارها غالية
صراحة الحريم سووا لهم سالفة
وكل ما شافن موديل قالن خلاص نبغي مثل هالموديل واصحاب المحلات قاموا يرفعون السعر ويعطونهن سعر خيالي وللاسف الشديد تتم الموافقة من قبل الحريم
وهالشئ الي شجعهم اكثر لغلاء الاسعار
عموما العباية السادة انا اشوفها ستر والعبائة المطرزة والمنقشة ما ادري وايد اسامي شئ حقها
لجلب انظار الرجال والعديد من الناس
ليش ما نحاول نحن الرجال نمنع نسائنا من لبس مثل هالموديلات الفاضحة
وبذلك الكل يفصل سادة وراعي المحل ما عنده عذر يقول الخـــرز والفصوص سعره غالي
لا وانته الصاج..هاي النتيجه لتسليمهم للمواطنات…
ما استوت هالاسعار الا عقب ما بدن المواطنات يفصلن…اقل عباده عندهن ب500 ..لو ما فيها شي,,,
صدقني هالمحلات اللي جييه اسعارها لو تشوف منو صاحبها بتحصلها يا مواطنه او مواطن…