السلام عليكم و رحمة الله و بركاته
مساؤُكم طيب و ريــــاحين، و كل عام و أنتم بخير
القصة و ما فيها أني زرت بيت قوم عمي أمس، و ما شاء الله ع التجديدات لي سوًوها في بيتهم
الصالة راقية جداً بألوان عصرية، و الأثاث فخم بأشكال رائعة و متناسقة مع لون الديكور
و الزوايا فيها حركات حلوة ما شاء الله
و مسووين بعد مغاسل للضيوف رخامية مع مرايا معشّقة و مزخرفة ” تبارك الله “
من الأخير عجبني بيتهم و ما رمت أرمس و لا ببنت شفة
:
الحين أبا حد يقولي و يساعدني لأني أبا اسوي تجديدات في غرفتي الخاصة مع الحمام
فياليت تساعدوني بالأفكار و الأهم شو هي المحلات المتخصصة بالفخار الصيني أو السيراميك
و لوازم الحمام و إلخ
لا تخيبون ظني فييييييييييييييكم و فزعتكم
عمّتكم
الله يبيّض ويهج دنيا و آخره اختي
أما بالنسبة للجملة الثانية لاتقراها أم ريم بتذبحج
بخصوص اللون البيج
رغم جمالية هذا اللون إلاّ أنه كئيب
مثله مثل الأسود و البني !
و مظهر اللون البيج غير حيوي و هو غير مناسب للغرف الصغيرة
حاولي عند تأثيث الغرفة
إختيار لون مناسب و مختلف عن لون الصبغ ( الستارة و مفرش السرير )
حتى تتمايز الألوان
لا تصيرين مثل البعض
إذا صبغ بيته أخضر مثلاً
كل شي في بيته لازم يكون نفس اللون !!
و أخوج فارس تحت أمرج و أمر جميع أعضاء المنتدى الكرام
في أي إستشارة بهذا المجال
اذا تبين اسم المحل بييب لج اياه بس هو غالي شوي
مسوي الحمام الواحد الله يكرمج فوق 30 ألف واللي في غرفته ب 60 ألف
بس ستايل جدا راقي
بخصوص الحزام أو البوردر الفاصل
إذا كنتي بتسوين الجدار لونين فـ الحزام لابد منه
أما إذا لون واحد فـ لا
بالنسبة للشاور : معظم اللي في السوق صيني و هو بقياس 90×90
سواء زاوية أو مستطيل تركيبه بيسبب لج مشكلة مع الشفاط
و بعد فترة بسيطة يصدّي و هو غير عملي أبداً
ممكن تسوّين لج شاور كابين تفصيل من عند سيدار بس بعد ما تغيرين موقع شفاط الحمام و تنقلينه
للزاوية القصوى للحمام
فيه وايدين ما يفرقون بين الشاور روم
و الشاور كابين
الشاور روم هو اللي يكون كامل ( فيه الخلاطات و الراديو و في بعضها التلفزيون ) هو حالياً ممنوع من مهندسي البلدية عشان فيه مشاكل وايده
بالنسبة للشاور كابين فهو بس غرفة زجاجية من غير أي ملحقات و هو الأفضل و الأرخص !
بالنسبة للأبواب
الحمام أنصحج يكون بحجم 75-80سم
و باب الغرفة 90سم
بإرتفاع 210سم
إنتبهي للإرتفاع لأن بعض الأبواب الجاهزة تكون أقل عن 210سم !
فيه محلات وايدة تبيع خامات أبواب ممتازة في الشارجه ( ما أعرف لسوق العين )
ما أبي أعطيج إسم محل معين ( كل المحلات فيها البضاعة الزينة و الشينه )
عليج إنتي الإختيار
عموماً أسعار الأبواب الصينية 900-1800 من غير التركيب
بيقولون لج نرويجي و غيره لاتصدقينهم !
معظم اللي في السوق صيني
حتى بعض محلات النجارة تشتري الأبواب الصينية الجاهزة من غير تفصيل بـ 350 درهم
و تفصّلها لج و تبيعها عليج بـ 2000 على أنها محلي !