السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
صحيح يا خويه فيه هالنوعيه من البنات وبصراحه تقدر تعتمد عليهم اكثر عن الرجال ولكنهم قله .
شباب تذكرون لما قلت البنات نوعين ؟ نوع عقولهم عن 10 ريال والنوع الثانى اصغر من عقول الاطفال ؟
هالبنت وحسب كلامها من النوع الاول وبرافوا عليج اختى والله يوفقج دنيا واخره بس انا بعد لى عتب عليج ! كيف قريتى انى انتقدت بعض البنات ولا قريتى انى قلت انه فيه بنات عن 10 رجال؟
المهم اختى من كلامج عرفت انه بناء بيتكم كان بتعاون اكثر من جهه ولكن تخيلى انه اللى قمتوا فيه يقوم فيه شخص بروحه بدون مساعدت احد الا برنامج الشيخ زايد للاسكان !!
بيهلك صح ؟ فيا اختى وضعج غير اشوي
المهم بما انج تخالفينى فى موضوع البث المباشر شو البدائل اللى تشوفينها نافعه ؟ وشو قصدج كل شى بوقته حلو بس الانسان لازم يسعى؟
والله يا خويه ما اعرف كيف تبانى ارد عليك وللاسف انى كتبت ملاحظه بعد ما انت كتبت ولكن شوف يا خويه اذا انت مرتاح او مش حاس بمسؤوليه ناحية اهلك فهذا الشى يرجع لك واحنا اهنيه نتكلم عن الناس اللى على عاتقهم مسؤوليات كبيره ويبون يربون عيالهم ويسترونهم ويستقرون وياهم وحاسين بعجز من هالناحيه وبعدين شيخى ترى الاستقرار الاسرى فيه فوايد عظيمه لجميع الشعوب ولا تنسى انه توجة الحكومة الرشيده من هذا المنطق والحمدلله حالنا احسن عن ملايين غيرنا ولكن هل من المعقول مواطن اماراتى لليوم ما عنده بيت يستره ويا عياله وجنسيات ثانيه غير مواطنه تسكن بافخم الفلل !! هذة دولتى ودمى لها سواء عندى بيت او ما عندى ولا تنسى انه الطفره اللى فيها الامارات احنا اللى ندفع ثمنها وفاليت يا خويه يا تقول كلام منطقى ولا لا تشارك احسن لانه بصراحه احسك مش متحمل مسؤوليه . اعذرنى
ملاحطه : اشوف فيه اعضاء موجودين فى الموضوع بس وجودهم مثل عدمه يا ترى هل هم وضعهم غير من ناحية السكن او عقولهم فاضيه ؟
نتمنى اللى ما عنده بيت فقط اللى يدخل وما نبي اى شخص ( مرتاح ) يكون بينا لانه راح يكون يكون وجوده سلبى فى الموضوع.
ها رزقك ومكتوب لك ومحد بياخذ غير رزقه
وحالنا احسن بمليون الف مرة من دول كثيره سواء الخليجيه أو العربيه و الحمد لله … حاول تكون قنوع وتقتنع باللي عندك ولا اتشوف غيرك والله بتتعب
عيش على قد راتبك وحاول اترتب أمورك لا تعتمد على راتبك سولك بزنس
وبعدين حكومتنا ما مقصرة تعيننا على المساكن و منح صندوق الزواج والتعليم المجاني وموفرتلنا كل سبل الراحة والترفيه
الواحد ما يقول غير الحمد و الشكر لك يا رب
بعدنا ترى عايشين في خير و نعمة
همسة,,,
عيش حياتك ترى الحياة حلوة بالإتكال على الله في كل شي