السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
الله يفرج همنا جميعاً
في مثل يقول<<مد رجولك على قد لحافك>>
بعض الناس للاسف ينفق بيزاته وما يفكر ايش بايبقى له اخر الشهر وهذي هي المصيبه ويجي يقول لك الراتب قليل مايكفيني او الغلا كاسر ظهورنا او ………
سمعت ان واحد من الشباب مشتري سياره يديده سبورت 8 سلندر ويتمشى فيها يوميا ويلف فيها من حاره لحاره
وفي اخر الشهر موقف سيارته امام بيتهم ماعنده حق البترول ولما يريد يطلع يتصل باحد من ربعه او يطلع تاكسي
عيل اشترا السياره عسب يكشخ فيها وهو مايقدر يوفر حق البترول لسيارته
احتفظ بقرشك الابيض ليومك الاسود
ونسال الله العافيه والسلامه والرزق الحلال
والسموحه على الاطاله
صدقوني ياجماعة الخير اعرف واحد راتبة فوقة 70000 ولا يقدر يبني بيت
الله وأكبر 70 ألف ومب قادر يبني جيه شو يسوي في فلوسه ها الا لعاب
الله لا يبلينا عافانالله
1- تشريع قانون مشدد لوقف تلاعب موردي مواد البناء و المقاولين و الاستشارين
2- بناء بيوت جاهزه مثل بيوت مؤسسة محمد بن راشد للإسكان
3- منح قروض بدون فوائد من قبل جهة عمل الموظف للبناء فقط ( مثل اتصالات و بعض البنوك )
4- دور وسائل الإعلام في توعية المجتمع بأهمية التخطيط الجيد للمستقبل
5- تقليل الرسوم من قبل الجهات الحكوميه للمساكن الخاصه للمواطنين
تسلملي عيونك الله يوفقك يارب ويجعلك من العسر يسرررررررررر يارب العالمين
انا بادي من سنة 2003
مريت في كل ازمات البناء الحديثه
تخيل حوالي 5 سنوات و كل يوم ادخل البيت بعد المغرب
و الديون اللي على ما اعتبرها ديون
كاني مستأجر شقه
مخبرنك ضيعت 10 سنوات مثلك و مم مخلي مكان الا راجعته و كل فتره ناقز عليهم و اضاربهم
الحمد الله
الله هداني للطريق الصحيح
و عوضني عن صبري خير
انزين اخوانى واخواتى الحين تكلمنا وايد وقلنا وايد ولكن للاسف للحين ولا واحد شارك باقتراح او وجهة نظر !!!
يعنى شو فايدة كلامنا اذا ما تحول الى نقاش هادف لتوصيل المعلومه لحكومتنا الرشيدة ؟
نبا مشاركات فعاله يعنى حد يقترح وحد ينتقد وحد يصحح وحد يطور الفكره
كل واحد فيكم يقراء هالرساله نبا نسمع رايه ووجهة نظره بس يكون مع الفكره مش ضدها .