السلام عليكم ورحمة الله وبركاته
كثير من الناس رواتبهم 20 الف درهم وهذا حالهم تعالوا نتعاون ولكن خل نشوف شو اللى صاير قبل .
اخوانى معوقات السكن كثيره وهى كالتالى :
1- انتظار برنامج الشيخ زايد للاسكان لسنوات طويله
2- ال 500 الف درهم ما عادت تبنى نص بيت
3- الاراضى .. تطلع روحك لحد ما تحصل الارض اللى بتبنى عليها
4- المقاول وما ادراك ما المقاول … ( يكرهك البيت وينشف ريقك ويشفط فلوسك ويعذبك ويمكن يخلص البيت فى موعده )
5- البنك .. ( هيه يا زمن .. يعرف انك محتاج له علشان جي ما يرحمك تاخذ من عندهم 300 الف علشان تسوي البيت وتدفعها 600 الف .. اخ يا القهر الحاجه ذبحتنا )
6- تأثيث البيت .. ( اذا البيت فيه 4 غرف تراك بتاثث غرفتين بالكثير والصاله والباقى لين الله يفرجها عليك لانه فى النهايه ما عندك فلس احمر تمشى فيه حالك )
خلصنا من مشاكل السكن ؟ ما اعتقد لانه اللى سبق ذكره تترتب عليه سلبيات كثيره لا تعد ولا تحصى للمواطن الفقير اللى فكر يستقر ويا عياله ويأمن لهم بيت يحتضنهم
1- كثرة الديون ( اذا راتبك 20 الف بيبقى منه 10 الآف )
2- عدم الاحساس بالسعاده بالبيت الجديد لانه صار هم عليك لانك تعذبت قبل لا تحصله سنوات وبعد ما تحصل بتتعذب ضعفهم من كثرة الديون
3- هبوط المستوى المعيشى لك ولأهلك ( يا حرمة اسمعى تراه راتبج الشهرى 1500 لج ولعيالج ماشى غيرهم ولا تدلعين اصبرى واتحملى )
4- مشتريات التزامات البيت من اكل وشرب لا تقل عن 1500 درهم شهريا
5- سيارتك مديل 1999 وكل يوم طايحه بالكراج ومن خساره لخساره لانك مش قادر تشترى سيارة يديده .
6- فواتير الكهرباء والماء والتيلفون والغاز والشغاله( لا تقل عن 2500)
7- ابوك وامك اللى ربوك وتعبوا فى تربيتكم ما تقدر تفرحهم ( آه يا القهر ) تعطيهم الف رهم شهريا مناصفه .
8- برنامج زايد للاسكان يخصم من راتبك 1660
9- مصاريف متفرقة ( لبسك .. عطرك .. بترول سيارتك .. عشاك مع ربعك .. الخ ) 2000 درهم
10- تضطر فى كثير من الاشهر انك تروح للبنك تكشف حسابك لاشياء خارجة عن ارادتك ومفأجاه وتبدا مشاكلك مع البنك .
شباب اكمل والا بس لحد اهنيه ؟
وايد اشياء ما ذكرتها لخصوصيتها بس بكل امانه بيت الاحلام صار هم وغم وصار ضد الاستقرار الاسرى بالرغم من انه الهدف الاول للحكومة الكريمه .
الله يرحم ابونا الشيخ زايد رحمة الله عليه … كلمته ترن فى اذنى ( زايد ما يباه حقه .. زايد يبا لهذا الشعب التعبان ) يا الله يا زايد نتعذب يوميا من فراقك الله يرحمك ويسكنك جنات النعيم .. وانعم الاب وانعم القائد .
ملاحظة : لو نكتب اهنيه من اليوم لبعد 10 سنوات ما راح يحسون فينا الشيوخ لانه اللى تحتهم يوصلون الفكره غلط عن المواطن الله لا يبارك فيهم .
ملاحظة : تعالوا نجتمع ونتصل فى برنامج البث المباشر ونثير هذة الطامة الكبرى لحكومتنا الرشيده وصدقونى شيوخنا فيهم خير ومحد بيقصر ويانا بس يبا همه من الشباب وعدم التخاذل وخاصه بالاعذار اللى ما تودى ولا اتييب .
قول الحمدالله على كل حال ، غيرك رواتبهم 5000 ومايقدرون يعيشون .
صدقينى يا اختى مش انتوا بروحكم اللى تعانوون هالمشكله اصبحت مشكله قوميه والسبب الطفره اللى احنا فيها وغلاء البترول ( مع انه دولة مصدرة للبترول ) ولكن باذن الله شيوخنا ما بيقصرون .
همسه : ال 500 الف درهم ما ستوي شى يا ناس تعبنا ….. اعطونا بيوت ما نبا فلوس .
السلام عليكم
بو شمه
جني انا الي ارمس
بيتنا تحت الانشاء..افتقرنا والسبه هالبنيان..عاااد الله والبنيان…صندقه بس مكبره ^.^ <<سوالف
لا صالات ولا ملاحق ولا هم يحزنون..بيت يسد حاجتنا
فلوسنا تروح ع الدفعات لمكيفات والسيراميك ومن غير مصاريف لعيال والجامعه والاجار…الخ
(((((والشكوى لغير الله مذله..<<
عنبو …تقول غرب!
هالهنود قووم الفلفل الاحمر ما خلولنا شي كل شي صرطو…
وفي النهايه الواحد لازم يشكر ربه و ترا نحن عايشين في نعمه والحمدالله والشكر على كل شي
نعم يا خويه محتاجين شرات الافكار اللى تسر الخاطر .. انزين خلنى اناقشك
1- تشريع قانون مشدد لوقف تلاعب موردى مواد البناء والمقاولين والاستشاريين .
تعرف وين تكمن الصعوبه ؟ فى انه دولتنا الحبيبه تعيش طفره عمرانيه كبيره فاستحاله يقدرون يصيطرون على تجار مواد البناء لانه الدولة اساسا فى حاجه لهم ولو تلاحظ انه وزارة الاقتصاد مش قادر عليهم .
2- بناء بيوت جاهزة مثل بيوت مؤسسة محمد بن راشد للإسكان .
عينى عليك بارده … هذا الحل الامثل فى نظرى لانه راح تكون فيه مناقصات لشركات المقاولات وبيصير تنافس بينهم وراح تقل كلفت البناء على الحكومة وبالهطريقه راح نضرب عصورين
الاول : انه البيت راح يكلف الحكومة تقريبا 600 الف ( لو تسويه بروحك بيصير بمليون )
الثانى : كل عائله راح تحصل على بيت يستقرون فيه ( بدون ديون وهذا الاهم )
اما اذا تكلمنا عن الفوائد الكبيره اللى راح يحسون فيها العائلات فهى كثيره وكثيره وكثيره وخاصه رب الاسره .
3- منح قروض بدون فوائد من جهة عمل الموظف للبناء فقط
يا اخى بسالك : اذا عندك هالعقليه الحلوه ليش حرمتنا منها فى البدايه ؟ برافوا عليك حل ممتاز ولكن اتوقع انه صعب تعرف ليش ؟ البنوك وطنيه فاعتقد لو كل جهة اعطت الموظف قروض بدون فوائد البنوك بتخسر صح ولا لا.
4- دور وسائل الاعلام فى توعية المجتمع باهمية التخطيط السليم للمستقبل .
ما اعتقد بيكون له دور فعال .
5- تقليل الرسوم من قبل الجهات الحكومية للمساكن الخاصه للمواطنين .
يمكن تصير فى بعض الامارات ولكن كل الامارات صعب ( علشان جي ما ظن انها بتصير ) !! واللبيب بالاشارة يفهم .
………………………………………….. ……………….
اقتراحاتى :
1- زيادة قرض برنامج الشيخ زايد للاسكان لـ مليون درهم وتسترجع بالتقسيط المريح المعمول فيه بالرنامج .
2- يتم التعاقد من قبل برنامج الشيخ زايد للاسكان مع شركات مقاولات ( كبيره ) فى الامارات السبع لدعم المواطن فى البناء مع تحديد سعر بناء المتر بين جميع الشركات على حسب الامارة ويكون سعر ثابت .
3- توقيع عقود طويلة الاجل مع موردى مواد البناء ( بجميع اشكالها ) باسعار تنافسيه .
4- الزام جميع بلديات الدولة بتوفير الاراضى المناسبه للبناء ( يعنى ما تقولى خذ ارض وادفنها او ابسطها) وبرسوم رمزيه للمواطنين .
5- دعم المواطن فى دوائر الكهرباء والماء بـ اسعار خاصه ورمزيه لتوصيل الكهرباء والماء للمواطن .
هذة الاشياء الاساسيه اللى محتاجها المواطن ( التعبان ) لبناء بيت الاحلام للاستقرار الاسرى الذى يخدم الوطن .
تحياتى
صحيح شيخى عندا فئه من الشباب يحبون المظاهر ومش متحملين مسؤوليه ولكن بهذا الموضوع اخويه نتكلم عن الشاب اللى مد رجله على قد لحافه واقتصد ونافع اهله ومش قادر يبنى بيت الاحلام اللى هو بيت الاستقرار الاسرى
فان شاء الله حد يسمع صوتنا من خلال الحمله اللى بنسويها مع بعض ونبا همتكم معانا .