السلام عليكم .. ابغي حد يساعدني في حل لهذه المشكلة ..

صديقتي من تزوجت وهي عايشة في مشاكل مع زوجها.. مرة يضربها بدون سبب .. ومرات تكشفه يخونها.. وكل مرة يطلع بشي يديد.. ومرة يطالع افلام اباحية.. ودايما مايعترف بغلطه وساعات يتاسف ويقول انه مابيكرر هالشي لكن ماشي فايدة ويكرره..وفوق هذا كله مايصلي ومايخاف الله

المهم الحرمة لاعت جبدها وكرهته وماتباه وتفكر تطلع من بيته .. بس اهلها مايبونها يوم تكلمهم يقولونلها ماعندنا بنات يرجعون بيوت اهلهم عقب مايتزوجون..

وهي مفكرة انها تطلع من بيته وتسير المستشفى وتكتب تقرير بالضرب على اساس توديه المحكمة اذا صار شي.. وتفكر تستأجر شقة وتيلس فيها لين مايتأدب الريال او يحصلون حل للمشكلة..

انا ماعرفت كيف يكون الحل لانه ماعندي تجارب وماعرف شو مفروض يصير… فقلت اسالكم اكيد حد عنده خلفية ..

شو اللي مفروض يصير؟ والمحكمة بتكون في صف منو؟

لاتبخلون عليه بردودكم الحلوة.. وياليت اللي عنده حل يساعدنا

19 thoughts on “رجل يضرب زوجته .. أرجو المساعدة ضروري”

  1. لا تــــــــــــــــــعليق ..

    الريال مسوي نفسه سوبر مان .. والحرمه يحليلها ( اذا الكلام هذا صح ) …

    الله يكون في عونها و يهدي ريلها .. و يصلح بينهم .. واخواني بسكم نصايح طلاق في طلاق .. ( صح ان الطلاق حل زين لهذه المشكلات بس تعالوا فوق 33% من حريم الأمارات عوانس ) ..!!!!

    الله كريم

  2. السلام عليكم

    عليها بالدعاء الصادق له والهداية وباين انه يحبها بس عليها الصبر وألله قادر يصلح حالهم

  4. اختي ليش اهل الحرمه ما يبونها وليش هم ما يصلحون بينهم

    يمكن في شي الحرمه مقصره فيه باتجاه ريلها

    ليش ما ترمس ابوووه وامه يرمسونه

    وابصراحه ما انصحها انها تضهر من البيت وتسكن بشقه بروحها

    وبعدين كيف بتدفع ايجار الشقه وهل هي تشتغل عشان تصرف على عمرها

    انتي لازم تسئلينها اكثر عن حياتها عن كل شي من الصبح لين المساء شو تسوي وشو ما تسوي

    وبعدين انصحيها ما تزيدين الطين بله

    تدرين الحينه لو ظهرت من البيت وراحت تسكن بشقه شو بيكون موقف اهلها وبعد اهل ريلها

    الحرمة رمست اهلها واهله من زمان وكانوا يكلمونه ويحاولون يصلحون بينهم .. لكن هو جدامهم يسوي نفسه طيب وخلاص مابيكرر هالاغلاط وعقب يكررها..
    والحين قالت ماشي فايدة ادخلهم لانهم ماقدروا يسوون شي..

    واهل الحرمة مايبونها لانه الابو صار كبير في السن ومب متفيج للمشاكل وتعب منها..

    ومن ناحية التقصير هي مش مقصرة يعني حتى ريلها مايشتكي منها ابد من اي شي ويقولها انتي مش مقصرة في شي..

    والريال يعني اي مناقشة تصير بينهم يمد ايده على طول وعقب ييلس يطلع اعذار ..ودايما ييلس يقولها انه هو يحبها ومرتاح منها ومايبا غيرها وهي مش مقصرة.. !! انزين يوم يقول هالكلام ليش يخونها؟ وليش يمدايده؟ وليش يشوف افلام؟

    اذا كان متأذي منها كان بيقولها وبيفهمها انها لازم تتغير..

    ومشكورين كلكم على الردود

Comments are closed.