رحلتي الى بانكوك
مرحبا صبايا و شباب .. مساكم الله بالنووور و السروور
بغيت اشارك وياكم رحلتي الجميله الى بانكوك عل و عسى تفيد البعض منكم
و ببتدي من البدايه ..الرحله كانت مفاجئه ..لين قبل كم يوم من الحجز و نحن ما ندري اذا فعلا بنسافر و الا لا..خصوصا انا لاني روحي عايشه في عالم ثاني في بيتنا و دوم اكون اخر من يعلم
قبل السفر بيومين بديت القط معلومات منيه و مناك … من المواقع و من العضوات و الاعضاء هنيه في هالموقع و وايدين منهم ساعدوني وااايد …
بس عقب من كثر المعلومات انضغطت…قلت شو هالمصخره و فعلا صدعت ..حد يقول هالمكان حلو و حد يقول هالمكان زباله!! ما عرفنالهم
و انا عموما ما احب الدول الاسيويه احسها وصخه و ارف …بس قلت في بالي انا من زمان ما سافرت ..و هالرحله لازم استمتع فيها و لازم انظر لها بعين ايجابيه عشان تصير ايجابيه
شرات ما قتلكم كثر المعلومات خربطني ..فقلت خلاص اسير هناك و اشوف بروحي الا هي بانكوك
يا يوم الرحله و تسكرت الشنط و زهبنا عمارنا و يلا الى المطار ..سرنا من وقت عشان ما ننضغط
كنا مسافرين على الخطوط التايلانديه .. كان تعاملهم زين و سألوني انتو فاملي؟ قتلهم هيه ..فحطونا عدال بعض
و عقب ما دخلنا الشنط
تحوطنا و تمشينا و تعشينا و هذا عشانا من جريل اند تشيل في الفود كورت في المطار
و انا ما افوت الشوبنج ..سرت تشريت لي سوالف و اهم شي مكياجات السفر اللي تكون موجوده فقط في الاسواق الحره …و عقب سمعنا ينادون على رحلتنا انهم فجو باب الطياره لووول و جان نسير
و بدا الاكشن في الطياره …
يلسونا و عشونا و هذا عشى الطياره ..و كلت لاني ما تعشيت في المطار
مش حالك
و الطياره كلها عرب و دق سوالف ..و اللي يجسم لبان و اللي يجسم حلاوه و حطولنا فلم وات هابن ان لاس فيجاس..يلسنا نتفرج..لان الطياره التايلانديه بس شاشه عوده ماشي شاشات صغار حق الايكونومي …الموهيم قبل نهاية الرحله كنت تعبانه و احتاج كاكاووووووو….سبحان الله في نفس اللحظه واحد يالس جدام طرش لاخواني قوطي كاكاو ..شافهم اولاد مسوين حشره قال بيسكتهم…و جان اخذ حبه من عندهم
كليت اول قضمه!! طعم الكاكاو ارف!! و جان اصد صوب اخواني اشوفهم يسرطون..و بسرعه البق الليت و اقرا مكونات الكاكاو و الا يظهر فيه واين!! اعععععع و اصارخ بسرعه على اخواني لا تاكلووون فيه خمر!!
واحد من اخواني سار يزوع و الثاني تم مبهت و يقول بطنه يعوره..و انا تمت جبدي لالالالالالالالالايعه…و اقول حق اخوي قوله شحقه يعطينا كاكاو فيه خمر؟؟ لا و هو و ربعه ماكلين نصه…جان ييلسون يعتذرون و يتأسفون و قالو انهم ما يدرون << العبره من هالقصه ..لا تاكلون أي شي يعطونكم اياه الناس بدون ما تقرون شو مكتوب عليه !!
و هذا الكاكاو الفاشل
انزين وصلنا بانكوك بعد 6 ساعات
مطارهم صغير و الاجراءات سريعه ..و الشنط وصلو بسرعه ..و ظهرنا متحمسين
اول شي لاحظته ان ماشاء الله بلاد فنانه و جسور و شوارع و دنيا << مادري كنت اتحرا قرقره و شوارع طين هههههههههه
و جان اشوف تاكسي وردي
و استوت عيووني قلووب… و تميت حاقده و اتحرطم..ليش ما عندنا سيارات وردياااااااااااااااات؟؟ ليش ليش لييييييييييييييييييييييييييييييش!!
وصلنا شقتنا في فريزر سويتس و كانت فوق ما كنت اتصور..حلوه و وسيعه و شرحه…صح بعيده عن فريج العرب بس عادي لانها مجابله المستشفى الملكي و نحن اصلا رحلتنا علاج
و هاي صور الشقه..على فكره نظام فنادق من تنظيف يومي و روم سرفس و كل شي
اول ما وصلنا كان الصبح عندهم و نحن مواصلين و تعبانين ..بس قلنا ما بنرقد عشان ما نخرب رقادنا ..خل نسير نتحوط ..سرت عند الرسبشن و قتلهم وين نسير؟؟ قالولي سيرو سيام
قلنا اوكي ..زقرولنا تاكسي و ركبنا و سرنا…يوم وصلنا ممممممم ما عيبني؟؟ شو ها!! كل المحلات عندنا ؟
انا ابا اشوف شي غير ..و مساكين شلتي اللي وياي اللي هم امي و اخواني الصغار مخليني اقود الحمله..قتلهم نظهر يلا بسرعه بنسير مكان ثاني ..و يلست انبش في المسجات ..حبيبتي فاء كانت مطرشتلي مسجات عن الاماكن..اول شي طاحت عيني عليه هو MBK جان اقول يلا نسير
و هنيه واجهنا اول مشكله …الحبايب اللي هناك ما يعرفون يرمسون انجليزي الا شوي منهم ..و حتى انجليزيتهم فاشله لووول …وقفنا عند التكاسي..و اخوي كل ساعه يفتح الباب على واحد يرمسه كلمتين و يرد يصك باب السياره على ويهه و يقول ما ينفع ..لين ما لقينا واحد يمشي حاله ..ركبنا وياه و قلناله يلا توكل
انطباعي عن mbk : المول مدحوب عرب ..اللي يحوطون و اللي يالسين في المطاعم ..و يطالعون و يتصاصرون ..و البنات يطالعون بوغاده ..يعني حركات بو عراب..قلنا اللهم طولك يا روح..زين يوم ان ما سكنا عندهم لووول …تحوطنا و تشرينا حسيت الاسعار عاديه..يعني رخيصه بس مب واااااااايد ..المهم العصر هلكنا و استوت وايد زحمه في المول ..جان نشل بعمارنا و ردينا الفندق ..و و طلبنا برجرات ربيان كما هو موضح في الصوره
و عقب انخمدنا
اليوم الثاني انا من الفجر ناشه و يلست في البلكونه اصور الاجواء الجميله و اليكم الصور
قلت الحين يا دبي بيبي لازم تسوي جدول فنان للرحله و لكن ما فائدة الجدول بدون دريول فناني و هب ريح؟؟
دشيت المنتدى ادور دريول …و دلاني احد الاخوه الكرام على دريول..الموهيم يلست احرق رقمه و ما شي فايده ..ما كان يرد عليه !!
الموهيم تفقدت الفندق و تريقنا و استمتعنا و عقب قتلهم اييكم شوور..خلنا نسير فريج العرب..نحن الحين متوهجين ما عندنا بطايق تلفون و نحتاج نبدل بيزات و نحتاج سوبرماركت ..و سواقين التكاسي ما يفهمون انجليزي ..ينقع راسك لين تقولهم وين تبا تسير…
طلبنا تكسي من الفندق و سرنا ..نزلنا الحبيب و سار..و نتمشى وحليلنا من الفجر هناك..و الروائح التعيسه ..و ايون التكاسي يدورون علينا شرات الذباب..و كلهم ميودين بروشورات يراوونا الصور …بس رمسهم بالانجليزي يتمون فاجين حلوجهم..سوينالهم طاف و كملنا مشي نتريا الفرج
و فجأة من بين السكيك ظهر علينا تاكسي مغوار و ينزل الدريشه … و يقول هلووو أي تيك يوو..قلت يمكن ها متحفظ كلمتين ..خلوني اسويله تست …و اسأله عن تحويل البيزات و فهم ..قلت حق اخوي نركب؟؟ و الا تريا بسويله تست ثاني ..جان اقوله نبا بطايق تلفون…و فهم..قلت غايته خلاص ركبوووووووو
و نركب ويا الدريول المغوار و نسير نبدل بيزات و ناخذ بطايق و هنيه نفسيتي ارتاحت …قال بوديكم سفاري شو رايكم؟؟ قلنا الراي رايك و الشور شورك…و انطلق في رعاية الله
سرنا سفاري على قولته …جي شرات الحديقه فيها كل الحيوانات و عروض و خرابيط ..و تصورت ويا نمر بعد لووول ..و بعدين دشينا حديقه مفتوحه للحيوانات و حطنا في السياره بها
و هنيه بعض اللقطات
و نحن رادينا ردينا بفريج العرب اللي و جان اشوف هالشي الجميل
بس ما جربته ..ما كنت ابا اخاطر لووول
الموهيم طفنا سوبرماركت و تشرينا و دحبنا الثلاجه ..و هاي بعض نشاطاتنا في ذلك اليوم
و ثلاجتنا شبه متروسه
و تعشينا مالح
و رقدنا
انزين و اليوم اللي عقبه سرنا المستشفى عشان الوالده كانت تبا تسوي فحوصات و ما تم عندنا وقت غير العصر حق الحواطه
تغدينا عيش و جاشع
و خلينا الفندق يطلب لنا تاكسي و يودينا باتونام
و هاي صوره من فوق الجسر
اسمينا تشرينا هناك لين عيزناااااا و لين ما بند علينا المول لوووووووول كان شي مب طبيعي و الاسعار رخص التراب
و ردينا و رقدنا لووول
اليوم اللي عقبه كنا متواعدين ويا الدريول من الصبح عشان نسير السوق العائم …و هو سوق على الماي نسيرله بقارب..اليكم الصور
تسوقنا و كلنا فواكه و شفنا رقص تايلاندي مجاني ..كان شي استمتاعي ..
و عقبه سرنا حديقة الفيله و عروض القرود
ركبنا على الفيل و حواطه و اليكم الصور
و عقب القرد عفد على اخوي و عضاه و هنيه الاكشن
وينا اخوي المستشفى و ضربوه ابرتين و كل شي تمام
موجوده في مطعم في الشارجه اسمه بانكوك تاون قريب من البحيره .. رهيبه و مجربه
و يسلمووووووووووولي على الطله الحلوه
ذكرتيني بتايلند يحليلها ….صور حلوة الصراحه وان شاء الله انج استانستي …بسالج حد اتضارب من الشباب وياكم على الطيارة وانتوا راجعين للبلاد؟؟؟؟ وعقب ردوا يضاحكووون ؟؟؟؟خبرتني ربيعتي عنهم ..
رحلة رائعه
عقبالنا ماروحها المره 3
رحلة رائعه وانا ايضاً هذا الصيف كنت هناك .. بس مثل الشوربة التايلنديه الحاره شي اسمها تام يام اعتقد ما اظن بلقى احسن منها .
و مرينا على محلات شرات سوق الجمعه يبيعون سوالف بحريه مجففه
و ردينا عقب الفندق حوالي العصر … و يلسنا نزهب للعزيمه لان عرب من هلنا الحلوين كانو في تايلاند و بيمرون علينا
و هاي صوره عشانا اللي طالبينه من مطعم بيروت بالاضافه الى عيش و جاشع لووول
و باعدين رقدنا
اليوم اللي عقبه
ظاهرين نتحوط كالعاده و نلقى واحد يبيع شعر البنات على الناصيه ممممممممم
يا سلام على الاستمتاع ..
و صح براويكم سقف تاكسي ركبناه..طاع شقا ملصق بيزات من جميع انحاء العالم في سقف السياره
و لقينا مطعم هندي انما ايه يجنن و تغدينا عنده تندوري و برياني و اليكم الصور
و طبعا ما فوتنا و ركبنا التكتك ..و انا سقته بعد لوووول شرات ما قلت حق اماراتيه …<< اوكي ما سقته بس يلست مكان اللي يسوق لوول
و اليوم اللي عقبه نشينا من الفجر و سرنا نتريق في ستاربكس
و سرنا اوشن ورلد في سيام و اليكم بعض الصور
و عقبه تغدينا
سمج من مكدونالدز لوووول
الموهيم كانت رحلة العوده باليوم الثاني
فوليل تعشيت بيض و طمام لان الوالده كانت تبا تخلص السوالف اللي في الثلاجه قبل لا نرد لووول
و اليوم اللي عقبنا شلينا قشارنا و انطلقنا الى المطار
و شرات ما لاحظتو ما كلنا اكل تايلاندي هناك..فحبينا نعوض ..و كلنا في المطار قبل لا نركب الطياره
و تمت باختصار شديد
و هذا و انا مختصرتنها خذتلي 3 ايام اخلص الموضوع هذا
شرات ما تشوفون ركزت على الاكل لانكم وايد تحبون الاكل لووول
في النهايه الرحله كانت استمتاعيه للغايه و حبيت بانكوك وايد ..و الحين متولهه عليها وايد ..صدق بلاد فنانه و فاقت كل توقعاتي
مساكين الشله اللي وياي هلكتهم و عذبتهم كلهم ريولهم تنفخت من المشي و استوو دواوير سود حوالي عيونهم..كل يوم انش الساعه 6 الصبح …ازهب عمري و من تستوي 7 اسويلهم زلزال و ادق دق البيبان و صريخ و زعيج بليا قياس هههههههههههه..كنت زعيمة الجروب و اتمنى انهم استانسو شرات ما انا استانست..و أي حد يبا يرقد..نسويله طاف نخليه راقد في الفندق و نشرد عنه ..نلقاه اليوم الثاني ناش قبلنا و يتريا ههههههههه مأدبتنهم ادب << لان بصراحه في السفر ما احب اضيع دقيقه و الفندق بس للرقاااااااد فقط فقط فقط
و الصراحه بانكوك يبالها على الاقل اسبوعين او شهر لين تخلص كل سوالفهم..لان صح احب الاسواق..لكن بعد احب الرحلات السياحيه و ردينا و احس وايد اشياء ما سويناهم..بس ان شاء الله الرحله اليايه تكون افضل و بدون يهال عشان نقدر نخمس بالقطار و نتهور بدون خوف عليهم
على طاري حب الاسواق الوالده كانت تتحرطم عليه و كل ما ادش عليها اسمعها ترمس في التلفون و تقول دبي بيبي ما تتودى اسواق من تدخل محل تقولهم هاتلولي من كل شي كل الالوان لوووووووووول ..و يوم ردينا البيت نفس القصه تتحرطم عليها عند الوالد لووول
اما الصرف يعني يباله مال الفين او 3 الاف درهم يوميا مصرف لي روحي كبنت << يعني هالمبلغ مشبع..بس اقل احس بيكون شوف و حراق يوف
الرحله و البلاد اعطيها A+ و هذا كله بفضل الله اولا و ثم بفضل اللي ساعدوني من هالمنتدى …صدقوني لو مب مساعداتكم و خبراتكم جان كلت تبن هناك
ان شاء الله يعيبكم الموضوع