االيوم يوم نشيت من الصبح تذكرت انه بنت يرانا تحب الرز بالحليب وامي خبرتني فليل انه كلنا بنتغدا في الخيمة الي بين بيتنا وبين بيتهم
ترى يرانا كلهم من اهل الوالده (^___^) الله يطول بعمارهم يارب
كنت مسوتنه قبل في رمضان
وتذكرت انه يوم ميلادها كان بالاثنين
يعني فرصه اسوي شي بيدي واسير اوديه حقها
المقادير الي احتجتها في السويت
11 كوب ماي
كوب أرز مصري
كوبين حليب بودره
كوب سكر
علبتين قشطة
وشوية ماء ورد حسب الرغبة
الطريقة هيه كالتالي:
يبت جدر وحطيت فيها الماي والحليب والسكر وخلطهم وبعدها حطيتهم على النار
من بدا يفور حطيت الرز
وخليته يفور لين ما وصل الماي لنص الجدر
بعدها حطيت القشطة والماء ورد وحركتهم شوي
خليتهم لين ما بدا يفور ويبقى شوي من الماي
سكرت على النار
وحطيته في طوس صغار ونثرت عليه ناريل( ملاحظة تقدرون تحطون اي شي فوقه او تتركونه شرات ما هو)
وخليتهم برع لانه حلاته تاكلونه وهو حار او دافي
والحين بخليكم ويا الصور بعد الانتهاء
وهاي الكمية الي ظهرت بالنهاية
يا الله وقت صلاة الجمعه اشوفكم على خير وحياكم على السويت عن تقولون اني ما عزمتكم والا اني بخليه
هاتراني بحرج
(^_________________^)
اختكم
بنت الامارات
الله يهنيك دنيا واخره اخوي
من عنوني ما طلبتي شي الغالية
ياسلام ياسلام لللاسف انا مسوي رجيم ولا جان ماخلييته لج والله شاطره وربة بيت نافعه انتي الله يحفظج
حطي جي المره اليايه
اخخخ بس لو شفت هالموضوع قبل الغداااء كنتوا رحتوا فيها
ههههههه أمزح بالعافيه عليكم
وشكرا ع الوصفه الطيبه
يمي يمي
صحتين و عوااافي
هاللمات ما في احلى منها