السلام عليكم ورحمه الله وبركاته

حبيت احط هذي القصه للعبرة وعشان محد يقص عليكم

يوم من الايام رحت البقاله الي جنب بيتنا وقتله عطني 4 اورنامين سي (مشروب الطاقه ) و 10 سفن اب

الاورنامين سي الواحد ب 2.5 درهم و السفن اب سعرة معروف درهم واحد …. المجموع = 20 درهم

————————————————–

رحت بعد يومين نفس البقاله لاكن هذي المره ياني هندي ثاني مش نفس الشخص الاول .. وطلبت نفس الطلب بالضبط وعطيته ال 20 درهم …. قالي ارباب باقي 4 درهم ونص …..قتله ليش خير ان شاء الله…قال السفن اب سعرة ارتفع وصار 1.25 درهم … و الاورنامين سي سعرة ارتفع وصار سعرة 3 دراهم

قتله من متى هذا الكلام قال من 5 ايام الاسعار مرتفعه … رديت عليه اني شاري من يومين من عندهم بالسعر القديم وقتله ينادي الشخص الثاني .. قال محد في البقاله غيري …. ومستحيل يكون السعر 20 درهم لان الاسعار تغيرت من المورد الرئيسي … قتله امسك الكيس وسحبت الفلوس من ايده وقتله اسمحلي غيرت رأيي مابغي خلاص … طبعا تم يحاول يقنعني ويبرر موقفه بس انا ما سويتله سالفه سكرت الجامه وروحت

رحت بقاله قريبه منه ورى نفس البنايه .. وعطاني ب 20 درهم نفس الطلب

ارجوا من الجميع اخذ العبره من هذا الموقف لانهم يستغلون الناس ولازم نسوي فيهم هذي المواقف عشان يحسون على دمهم شويه

تحياتي للجميع

9 thoughts on “رفع الاسعار و قصتي مع صاحب البقاله”

  1. الحذر فعلا من تلاعبات الاسعار ..

    وانا سبق وكتبت موضوع عن البقالات بالذات لانها ما عندها لا ذمة وضمير..

    هاي سرقة في وضح النهار…..

    لذلك وجب الانتباه والحذر ….

  2. اليوم كنت رايح دكان مواد بناء دايما اتعامل معاه

    متعود اشتري نوع من البراغي من عنده الكرتون بي 30 اليوم يقولي 70 درهم و نوع من القواعد كان سعرها 50 استوت 70 بعد مادري ليش معلق على 70

    قلتله من اسبوع شاري من عندك البراغي بي 30 و القواعد بي 50 طلعني جذاب قلتله لانه اليوم شفتني بكنوره و كنت دايما تشوفني بلبس رياضه

    رجعت البيت ادور الفواتير بس للاسف ما حصلت الا فاتوره وحده مال القواعد و رجعتله و راويته فاتورته مال القواعد و اشتريت على اساس السعر القديم و البراغي ما اشتريتهم من عنده لانه اصر ان اخر سعر 48 و الدكاكين اللي عداله للاسف مسكره

    بتسير تشتكي عليه وين …. وزارة الاقتصاد …. بيقولوك تجاره حره

    بتشتري اسمنت من عنده …. بيقولك ببيع عليك من دون فاتوره

    ما في فايده الا نستوي مثل المحقق كونان و نتنكر يوم بنشتري شئ عن يقصون علينا

  4. أسعار المشروبات الغازية (بيبسي ,كوكا,7اب)=4.5درهم

    في اينوك وايبكو 4 دراهم بس

    شيش البترول لها دور كبير في رفع الاسعار

Comments are closed.