السلام عليكم و رحمه الله و بركاته
اخواني الأعزاء أسمحولي أن أفضفض عندكم شوي لأني زهقت من الوضع الي نحن عليه ..
نشوف اعلانات وظايف من دوائر حكومية و شبه حكومية بأعداد كبيرة ..
و نحن نزهب السي في و نرسله لهم مع المتطلبات و الشهادات .. لكن وين الردود
مجلس التوطين الي شادين فيه الحيل … وينهم عن الناس الي قدمو عليه لين الحين ماشي حس
يا حسافة والله العظيم انا المواطن ما احصل فرصه عمل داخل بلادي …
شو نسوي يا عالم … معظم الدول تحصلون حاطين خطه تنفرض على المستثمرين و الشركات و الدوائر انهم يوطفون مواطنيهم و احنا هني الدوله نشوف التشريعات و نشوف الهيئات التوطينيه لكن مافي فعل يذكر … غير بعض الامور البسيطه على قولتهم يسكرون فيها حلوجنا ..
يعني كل نقدم على وظيفة الحمدلله المؤهلات العلمية متوفره و حتى الخبره موجوده و لكن عقب المقابله الي انته حطيت فيها كل ما تملك من خبره في الحوار و المناقشات و عقب اختبارات شحليل شخصيه على قولتهم يخيسون الواحد 3 ساعات و يقولون له خلاص يؤسفنا انك لم تقبل في الوظيفه الي انته مقدم عليها و بنحفظ اوراقك … طيب تعال اسأل منو خذا هذي الوظيفه واحد اسمه (طوني, جورج, اندرو … الخ) يعني نحن بيكون عنا الخبره يوم انها ما تنعطا لنا الفرصه نكتسبها.
طيب ييبو هالطوني ولا الجورج وظفوهم و حطو مواطنين تحتهم يتعلمون و الي..
المواطن مب شرات قبل يدور الراحه, الثقافة تغيرت لأنه نحن الحين في جو التحديات و كل مواطن موجود عرف شو مسقبل بلادنا ووين لازم نوصلها نحن مب محتاجين خبرا و لا مستشارين نحن محتايين عيال البلاد الي يشيلون هالبلاد …
انا و اعوذ بالله من كلمة انا .. أتحدى أي اجنبي في وظيفتي الي أنا فاهم فيها من ناحية معرفه تقنية او فنية .. لأني اعرف عمري سهرت ليالي درست و تعلمت و كونت نفسي عندي 7 سنين خبره لكنها مثل الي عنده 17 سنه خبره لأنه احتكيت مع جميع المستويات الوظيفية عندي شهادات البلا وكلها عالمية مش في الدوله … حضرت مؤتمرات عالمية في مجالي (من جيبي) عشان اعرف شو الجديد في مجالي
لكن انته يا مواطن بتم في بعض نظر المسؤولين عاله
و نعم تحيا الواسطه
والله الحال من بعضه
شو أقولك ياخوي ،،
تييني ضيجه من هالحال أحيانا ،، عقب استغفر الله وأقول الحمد لله على كل حال
يعني نحن ندرس ونشقى ونتعب وأخر شئ نتم في البيت
توني اليوم أتصلت في مدرسه ابا اطالع عندهم وظيفه إداريه
ردت عليه السكرتيره << مب مواطنه
طبعا عقب ماكلمت الوكيله و خلصت قالت لي تقدمين في المنطقة
يعني لا المنطقة تبانا و لا المدارس و هااي اول وحده ردت علي مب مواطنه شو نسوي
نحن عيال البلاد ولنا الحق في الوظائف هاي و يقوموا يشغلوا غيرنا ليش
و الله اني مقهورة أكثر عنك
حرااام عليك والله حراااام عليك …. ما لقيت غير الجيش … عزيزي انا ما يالس اشكي قلة الحيله
انا يالس اشكي ضعف سياسة التوطين في بلادنا
و بعدين الجيش ليش اروحه و ادمر كل مستقبلي الي بنيته شهاداتي و دوراتي و خبرتي و فنياتي
و اخر شي (حاضر سيدي) …
للأسف لو كان الجيش مكان للتحديات و مكان يبرز فيه الناس بتشوفني اول واحد لكن للأسف من خبره لأني انا كنت في الجيش اخوي … الجيش مكان حسد الناس الي حواليك تحفر لك لو كنت انسان ناجح و اذا ما تبعت اهواء مسؤولك ما تتوفق و لازم شوي لواته و تعطيهم صبغ باليس ..
و السموحه لأخواني العسكريين انا ما اقول الكل لكن البعض. بس مثل ما قلت الجيش مش مكان للي عنده احلام و آمال و طموح
اخوي ليش ما تجرب الجيش ممكن تلاقي وظيفة عندهم ومراتباتهم زينة بعد
المشكله ياخي تنقهر يعلون في رأس السنه يقولون متوفر 800,000 فرصه عمل من وزارة العمل
بس وينهم هالفرص وين اختفن. اذا نحن كمواطنين عاديين ما نقدر نعرف عنها لك في عندك جهات متخصصه في امور توطين الوظايف وينهم عنها
الكل يعانون مثلك ياخوي
الله يكون بالعون