السلام عليكم و رحمة الله و بركاته
أخواني ان شاء الله تجاوبون على استفساراتي
في مشكلة الزواج من غير مواطن (امه مواطنة)
بنت خالتي مواطنة أصل تقدم لها ريال عماني الجنسية ملتزم (من ابناء المواطنات)
الريال امه مواطنة بس ابوه عماني ( ابوه منفصل عن امه من زمان)
البنت خايفة لانها تشتغل في هيئة حكومية – ابوظبي و ما تقدر تودر شغلها لانها ما تعرف كيف تعامل المواطنة يوم تتزوج عماني
كيف بتكون خلاصة القيد بروحها ؟
و امور ثانيه ما تعرفها مثل حقوقها كمواطنة كيف بتكون ؟
و هل فيه انواع من الوظايف تشرط انه الزوج يكون مواطن ؟
و اذا يابت عيال كيف دراستهم و علاجهم بيكون ؟
البنت صلت استخارة بس بعدها مترددة و ما تعرف ترفض الشخص و لا لا
اسمحولي لاني ما عندي فكرة و لا علم … و انتظر تساعدوها بنصايحكم و تجاوبون على استفساراتها
تسلم اخويه و ما قصــرت
لي اعرفه مسموحه لها تتزوج حتا لو كان هندي بس توقع عورقه انه مالها حق تطالب بجوازات حق عيالها مب باجر تيلس تصيح وتقول ابا جواز اماراتي لعيالي ؟؟؟؟؟؟؟؟ لان العيال ياخذون جواز ابوهم
وحلاة الثوب رقعته منه وفيه وهي وكيفها للاسف اعرف وحده مواطنه تزوجت وافد ويابت منه عيال و طلع عينها ويخليها تصرف عليه هو وعلى اهله وعائلته كلها انا اعتبر زواج الوافد من المواطنه مصلحه واستغلال ويقولها ما بطلق الا لو عطيتيني مليون بطلقج وشلي عيالج
او البنت شخصيتها ظعيفه واقول حق اسير بوظبي هب كل المواطنين يشربون ومديونين ترى حتا الوافدين يشربون ومديونين ومخدرات وشي منهم ياي لاجئ من بلاده مب لاقي ياكل ياي من الحرب
قبل كانو صح حتا الشياب يتزوجون وافدات لاكن الحين بصراحه ما يعجبني لي يتزوج من غير جنسية الامارات سواءا ريال ولا حرمه لان لها مشاكل واشياء سلبيه بعدين بيبين كل شي وبتتذكرون كلامي
انا اعرف واحد يمني ماخذ مواطنمه اداوم في الجيش وهو مايقربلها ولاشي واماورها طيبه ماسمعت انهم فنشوها او شي ؟؟
وايدين مواطنات معرسين بوافدين سواء خليجين او عرب وامورهم ماشيه في كل الدواير يمكن لا وبعد وحده ماخذه وافد وطلع لها بيت في الباهيه يعني الامور مافيها تعقيدات
بس مثل ماقالوا الاخوان الي بيكون ان العيال بيطلعون بياخذون جنسية ابوهم
وبعدين الحياه هي الي تقرر طريقة عيش الانسان هب جنسية او بطاقه او خلاصة قيد
لومواطن وكان مديون ويشرب وغيره شو بينفعها؟؟
الاهم ان الريال ونعم فيه هذا هو اهم شي في الزواج
يا جماعة الخير انا بتكلم عن الجوازات الصادره من اماارة دبي
عندي قريبه لي متزوجه من واحد ومن اهلنا ومش مواطن بالنسبه لها عطوها خلاصة قيد خاصة فيها وهي عندها ولد وطلعت الجواز الاماراتي لولدها وهي تشتغل والريال يشتغل وما في اي شي
بس اللهم العيال راح ينحرمون من ميزات المواطنين كما ذكرتم سابقا
وشو نقدر نقول اكثر عن جذه عسا الله يلين قلوب المسؤولين بخصوص الموضوع هذا وتنحل المشاكل بسرعة
امين يا رب
ثاني شي هذا ممكن نصيبها والواحد ما يدري
وانشاء الله يمكن تتغير القوانين
في البداية أنا مستغربة من سالفة ترديدج لعبارة ( ماله أي شيء يربطه في عمان ) .. وايد ذكرتيها وكأن وجود شيء يربطه بعمان فضيحة!
عموما اختي ,, ترا الحرمة بتوقع على ورقة بعدم المطالبة بجنسية لعيالها ف المستقبل ,, ويحق لها تقدم على بيت ( بس بيت لا مزرعة ولا غيره ) .. والبيت ينكتب باسمها وما اتكون لها اولوية في الحصول عليه .. يعني ممكن تتنظر 10 سنين واكثر
ما يأثر ارتباطها بعماني على وظيفتها .. الموضوع هذا بس للرياييل العسكرين ( ما ادري عن العسكريات ) يعني لازم موافقة أمنية بالنسبة لهم
ولمعلوماتج ريلها لازم ياخذ عنها هي موافقة أمنية من عمان ..
غير جيه تحسب حساب إن اي مشكلة يطيحون فيها لعيال بعدين ممكن تنحكم ابعاد وساعتها بتم تحووووووس في المراكز وحقوق الانسان علشان تييب استثناء واسترحام …
والاستخارة هي افضل نصيحة