السلام عليكم ورحمة الله وبركاته
ساعدوني أبا أتعلم المحافظه على السيارة يديد على هاي السوالف ؟
أنا عندي سيارة مستعملة كورولا موديل 2002 وأبا أتعلم أحافظ عليها
أنا من دبي أدري شيء موضوع مثبت في المنتدى بعنوان
كيف تحافظ على سيارتك؟
بس أنا ابا أعرف المكان اللي أسيرة والخطوات ويكون في دبي مب بعييد يعني قريب من مطار دبي
ههههههه توني أسئل ربيعي يقولي سير محطة الإمارات اذا تبا تبدل الآيل قتله الآيل هو نفسه الزيت؟؟
هههه
يديد لاتلوموني كنت معتمد على غيري في هاي السوالف الحين لازم أحسب كم كيلو متر مشيت ؟؟؟
عشان أبدل الزيت (الآيل) وفلتر الزيت يبدلونه في نفس المكان محطة الامارات ماشي مكان ثاني؟؟؟
الحين يوم أسير هاي الأماكن أبا أعرف شو أقوللهم مايستوي أسير هناك وانا ماعرف شو السالفه ؟؟
يوم السيارة يبالها زيت مايولع ليت ؟ والبتري لو ولع الليت ماله شو يعني ؟؟
نصحيه اخوي لا تبدل زيت إلا في المحطه أدنوك
لانه عندهم جهاز يسحب الزيت سحب أفضل من تنزيله تحت
حتى الفلتر بعد فالمحطه يبدلونها
مرة تبديل آيل بس .. ومرة تبديل آيل و فلتر
و آيل الجير كل 10 الآف كيلو
و السفايف مع الحشره اللي بتسمعها وقت البريكات
عاد ما شاء الله الكوكو عسل .. لاتحاتي تتبند عليك .. جيه قالولك بي ام ولا رنج *_^
موفق شباب ما يقصرون ان شاء الله
مشكوور الغالي ماتقصر والفلتر ؟
أنا أبا أحسب حسابي ماتبند عليه لاني بتوهق لو بندت عليه أو إخترب فيها شيء تاكسي المطار
تخلي الواحد يكره كل شيء مره سرت عند مكتب دبي للمواصلات قتلهم أنا موظف أبا تكسي عصب
وحرج مدير المكتب قالي نحن مب موقعين عقد ويا شركتكم عشان نفتح العداد ب 3 دراهم لازم 20
درهم والسايق مابيطيع يبا كمشير هههههه ولازم أوقف في طابوور طوووووووووويل ههههه ماعليه طلعنا
من الموضوع شوي
مشكور ماتقصر إخوي يزاك الله خير ^_^ واللي عنده نصايح يفيدني والسموحه عن الاطاله
السلام عليكم
هلا اخوي
اول شي مبروك عليك الكورولا
ويعطيك خيرها ويكفيك شرها
بالنسبة لتبديل الزيت
خله كل 5000 كيلو
ويوم بتسير المحطة او عند البنشرجي
قوله تبديل زيت وبس
مايبالها شي يعني
وبالنسبه لحساب المسافه
البنشرجي او عامل المحطة بيعطيك ستيكر تسجل فيه تاريخ التبديل ونوع الزيت وكم المسافه المقطوعه حاليا للسيارة مثلا الحين السيارة مشت 100 الف
وبيكون مسجل بعد تبديل الزيت في المرة القادمه وراح تكتب مثلا 105 الف لانك مبدل الزيت حق 5000 كيلومتر
وبالنسبة لليت اللي يولع ,,, الكورولا ماشي فيها هالشي
لكن
ليت البتري يوم يولع عندك بتكون دينمه الجارج تعبانه ويبالها تبديل
واحتمال السيارة توقف عليك في اي وقت
هذا اللي قدرت افيدك فيه
وموفق يالغالي