السلام عليكم
الصراحة هذي اول مشاركة لي و ما دري شو اللي خلاني اكتب المشكلة يمكن لاني حسيت اني بلاقي حل من عيال بلادي و بلاد اجدادي شكلي طولتها و بدش في الموضوع ….
الله يسلمكم احنا من من المتضررين في منطقة سطوة و هذا بيتنا من اربعين سنةايام لما كانت البيوت من العريش بيتنا الوحيد كان طابوق لان ابوي هو اللي بناه بيده و بعد سنين لما تطورت الدنيا و قلنا له نطلع و ناجره كان يقول انا عشت في هالبيت و بموت فيه و ما بطلع لو عوضوني بالملايين و الحين بعد التثمين كل اللي عوضوننا مليونين و ثمانمية الف اللي هالايام في دبي بالنسبة للعقارات و لا شي و خيروننا يا ان ناخذ بيت في القوز او ناخذ ارض و نبنيها . طبعا لان ابوي ريال كبير في السن و يسمع عن المقاولين و عن الغلا فضل ان ياخذ بيت جاهز و ساروا شافوا البيوت من بره شكلها معقول بس من الداخل كانها قفص فغير رايه و قال لهم ان بياخذ الارض لان بعدهالعمر مب مستعد يعيش في بيت اضيق عن بيته و بالفعل سار للبلدية بعد اللجنة و المفاوضات وافقوا يعطونه ارض في الورقا الثانية و يخصمون المبلغ من المليونين و ثمانمية الف و طلع سعر الارض 1915000والباقي اللي هم 885000 بيكون للبناء و المبلغ بيندفع بعد اخلاء البيت قولوا لي يا اخوان اي بيت بينبني في هالغلا بهالسعر و بعدين لازم نطلع من البيت عشان يعطوننا البيزات و لازم نسكن في الايجار لين ما يخلص البيت و البلدية راح تدفع للايجار لمدة سنة فقط يعني اذا ما خلص البنا بعد سنة ما راح يدفعون و بعدين التعويض لازم يكون اكثر من جذي لانهم بيطلعونا من بيتنا اللي موقعه قريب كل شي و بعدين البنيان صعب و الاسعار ترتفع يوم بعد قولو لي شو الحل شو نسوي و احنا واسطتنا الوحيدة الله خبروني ياخواني شو اسوي لان حاسة ان مظلومين…
يزاك الله خير ..
بارك الله فيك وفي عملك وكثر من امثالك ورزقك الخير دائما
ليش ما تطالبون بتعويض مادي و أرض؟ و التقييم يكون على سعر السوق؟
على طول سيروا المحاكم .
انا مستعد اساعدج وبتبنين ان شاء الله بــ 885000 الف
بس بهالسعر لازم تقللين من عدد الغرف والبناء ف دبي عندكم نااار
ع العموم التصميم بيكون من صوبي بعطيج اياه ببلاش وماباخذ منج ولا فلس
واعرف واحد من ربعي عنده مقاولات ف دبي وماشالله شغال وبعرض عليه الفكره وان شاء الله يراعيج ف
السعر
ومابغي منج سوى الدعاء
وتواصلي وياي ع الخاص اذا ماتبين تكتبين ع العام
بس حبيت أسالج حد في البيت يشتغل ؟؟
اذا حد يشتغل ترومون ترتبون الوضع ،، وترومون تخلصون البيت في سنه ونص
هاييل ييرانا كلهم بنوا فلل كل وحده أكبر من الثانية وخلصوها في سنه بس نص كانت تشطيبات من كهربا وماي و ترتيبات داخل البيت
يعني اختي لو حد يشتغل بترومون تدفعون الايجار حق نص سنه ،، بس انتوا وقفوا فوق راس المقاول خلي يخلص اموركم بسرعه
أختي اذا قلتي انه الايجار غالي وانتوا من دبي وجيه //
6 شهور الباجي حاولوا تدوروا لكم شقه رخيصه وصغيرونه ( 3 غرف) اصبروا وحاولوا تتحملونها لين يخلص البيت ،، حتى ترومون تنقلون فيه قبل لا تأثثونه
السموحه نحن حالنا حالج ماعندنا واسطه والا والله كنت ماقصرت وساعدتج
الله يكون في عونج